Read Biblija - Pe Baltitko Romani čib (Romanes) 2019 Baltic Romani Bible 1 Korinfianenge 14 Bible Online

1 Korinfianenge 14 - Biblija - Pe Baltitko Romani čib (Romanes) 2019 Baltic Romani Bible bible

1 Korinfianenge 14

¹Mek tumarí pšalýtko patýv ke manušá te pirizorjakirel saró, i otdén péskiro iló zevlynypnytkes (rievnosnes) vaš Duhóskire talany, ne butýr pal dová, sob (kaj) tuménge te angilphenen.

²Pal-dová so odová manúš, kon rakiréla pe nadžindly čib, jov rakiréla na manušénge, a Devléske, pal-dová so nijékh na ĥaljola les, jov rakiréla pal čorahane čačipená Duhóskire zorjása.

³Ne odová, kon rosphenéla Devléskiro lav, odová manúš podrikiréla manušén dro patiaibén, déla lénge tvárdyma dro iló, déla ramánjo (miro) manušéskire Duhoske.

⁴Odová, kon rakiréla pe nadžindly čib, podrikiréla pes dro patiaibén; a odová, kon rosphenéla Devléskiro lav, podrikiréla Khangirjákiro skedyibén.

⁵Me kamám, sob (kaj) tumé te rakirén pe nadžindle čibá (čibjá), ne butýr, sob (kaj) tumé te angilphenen (te rosphenén) Devléskiro lav. Manúš, kon angilphenela (proročynela) Devléskiro lav, janéla butýr lačhipén manušénge, syr kodová, savó rakiréla pe nadžindle čibá, kóli jov na piriphenela, so sys phendló, sob (kaj) te podrikirél Khangirjákiro skedyibén dro patiaibén.

⁶I, ĥáda, pšála, kóli me javáva ke tumé i javáva te rakiráv pe nadžindle čibá (čibjá), savó lačhipén javéla tuménge, kóli me na rosphenava tuménge sykadyiben Devléstyr, ci džinybén, ci rosphenava Devléskiro lav/sykliakiribén?

⁷Až bašaibnytka strumiénty, ci davá isyn svirol', ci davá isyn arfa, savénde nane džiibnáskiro dúho (fáno), kóli jone na javéna te den jásnes tóno, kon da ĥaljola, so jone bašavena?

⁸Paldavá adiáke-pac' isyn rogosa (trubasa); kóli joj bašavela, so nikón na ĥaljola, tedy kon xaladendyr (ruldendyr) javéla te kedelpe pe maribén?

⁹Tedy adiáke-pac' isyn nadžindle čibása (čibjasa): kóli tumé na phenéna adiáke, sob (kaj) manušá te ĥaljon, tedy kon ĥaljola, so isyn phendló pe nadžindlý čib? Davá tumé javéna te rakirén sýrby pe balvalia.

¹⁰Ĥáda, kicý isyn but manušýtka lavá dro svéto, i so dro jekh lav isyn péskiro ĥalyibén.

¹¹Paldavá, kóli me na ĥaljovavas čibakire lavá; pe saví rakiréna, tedy me som javiré-phuvjákiro manúš vaš kodolé manušéske, savó rakiréla, i jov adiáke-pac' isyn sýrby javiré-phuvjákiro manúš vaš mánge.

¹²Pal-dová so tumé adiáke-pac' otdena péskiro iló Devléskire talanénge, sob (kaj) tumé te len lačhipén léndyr te podrikirél Khangirjákiro skedyibén.

¹³Paldavá odová manúš, kon rakiréla pe nadžindly čib, mek jov te mangélpe Devléske pal taláno te piriphenel.

¹⁴Pal-dová so, kóli me mangavape Devléske pe nadžindly čib, miro dúho (fáno) mangelape, ne tedy mirí godý jačélape bi butiakiro.

¹⁵So ž tedy? Me javáva te mangavpe Devléske Sventoné Duhósa, ne me adiáke-pac' javáva te mangavpe Devléske godiása; me javáva te bagáv Sventoné Duhósa, ne me adiáke-pac' javáva te bagáv godiása.

¹⁶Tedy, kóli tu javésa te barjakires Devlés Duhósa, syr prosto manúš, konéste nane taláno i savó isyn terdó pe skedyibén, phenéla “amín'” pe tyró bahtiakiribén, pal-dová so jov na ĥaljola, so tu rakirésa?

¹⁷Paldavá, mek tu i bahtiakiresa Devlés lačhés, ne tu na podrikiresa javire manušén dro patiaibén.

¹⁸Me parikirava Devléske, so me rakiráva pe nadžindle čibá (čibjá) butýr, syr kažno tuméndyr:

¹⁹ne pe Khangirjákiro skedyibén me kamám te phenáv pandž lavá miré godiása te sykliakirav adiáke-pac' javire manušén, syr me phenáva deš tysjoncy lavá pe nadžindle čibá (čibjá).

²⁰Pšalále! Na javén čhavorénca pir péskiri godý, a javén čhavorenca pe xolý: ne javén baré manušénca dre péskiri godý.

²¹Isyn čhindló dro Zakóno: “Me javáva te rakiráv adalé manušénca pe javír čibá (čibjá) i javire ušténca, ne i tedy jone na javéna te kandén Man, rakiréla Raj Devél.”

²²Paldavá, taláno te rakirén pe javire čibá (čibjá) davá isyn dophenybén na patiaibnaskirenge, a odolénge, kon na patiála; ne angilphenybén Devléskiro isyn na vaš napatiaibnaskirenge, a odolénge, kon patiála.

²³Kóli tedy saró Khangirjákiro skedyibén skedelape khetané pe jekh štéto i saré javéna te rakirén nadžindle čibenca (čib'jenca), i zadžána prosta manušá, napatiaibnaskire, ci na phenéna jone, so tumé zdylnandyne.

²⁴Ne kóli tumé saré angilphenena Devléskiro lav, i zadžála prosto manúš ci napatiaibnaskiro, tedy saré manušá sýrby sykavéna i sendinena léskiro grého;

²⁵i léskire-iléskire garadé dúmy otkerenape pe jakhá, i jov peréla telé mósa, i phenéla mamúj “Čačes, isyn Devél tuménca.”

²⁶So ž tedy, pšalále? Kiéli tumé moginéna te skedénpe khetané, kažnoné manušéste isyn, ci péskiro psálmo, ci sykliakiribén, ci sykadyipen (otkeriben) Devléstyr, ci te piriphenel dová, so isyn phendló pe nadžindly čib, mek saró davá te javél, sob (kaj) te podrikiren patiaibnaskiren dro patiaibén.

²⁷Kóli vari-kon rakiréla pe nadžindly čib, mek dujdžiné te rakirén, a trindžine uže but, ne kažno manúš pir jekh, a javír manúš te pirilydžal (te piričhuvel);

²⁸a kóli nane pirilydžaibnaskiro, to te bešél odová manúš štyl pe Khangirjákiro skedyibén, i te rakirél péske i Devléske.

²⁹Mek proróki te rakirén duj ci trin, a mek javír manušá te roskedenpe, so jone rakiréna.

³⁰A kóli javire manušéste, kon isyn beštó pe skedyibén, javéla sykadyipen te phenél lav Devléstyr, tedy odová, savó rakiréla, mek jov te bešél štyl.

³¹Paldavá tumé saré moginéna te angilphenen vaš dová, sob (kaj) tumé saré te sykljon i te doresen podrikiribén dro patiaibén.

³²I prorokéngire dúhi kandéna prorokén.

³³Pal-dová so Devél na priléla bizlado, a priléla ramánjo (miro), syr davá isyn pir saré Khangirjákire skedyibena.

³⁴Mek tumaré džuvliá te javén štyl pe Khangirjákiro skedyibén, pal-dová so naštý te rakirén lénge, pal-dová so lénge trej te kandén péskire romen, adiáke syr isyn phendló dro Zakóno.

³⁵A kóli jone kaména te sykljon, tedy mek jone te phučén péskire romendyr kheré; pal-dová so davá ladžaipén vaš džuvliáke te rakirél pe Khangirjákiro skedyibén.

³⁶Ci vygijá tuméndyr Devléskiro lav, ci jov dogijá féni (tóka) ke tumé?

³⁷Kóli vari-kon ginéla pes pal prorokoste, ci léste isyn vari-savó Duhoskiro taláno, mek jov te ĥaljol, so dová, so me čhináva tuménge, isyn Ráskire-Devléskire priphenybená.

³⁸A kóli vari-kon len na priléla, mek jov te na ĥaljol.

³⁹Paldavá, pšalále, otdén péskiro iló vaš dová, sob (kaj) te angilphenen Devléskiro lav, ne na zaphenen te rakirén nadžindle čibenca (čib'jenca).

⁴⁰Ne mek saró te javél patyvales i adiáke-pac' syr isyn prilyno, te javél pe Khangirjákiro skedyibén.