Read Biblija - Pe Baltitko Romani čib (Romanes) 2019 Baltic Romani Bible 1 Korinfianenge 4 Bible Online

1 Korinfianenge 4 - Biblija - Pe Baltitko Romani čib (Romanes) 2019 Baltic Romani Bible bible

1 Korinfianenge 4

¹Tedy mek manušá te ĥaljon amen syr Xristosóskire dynar'jén i kheritkoné barydyrén pir Devléskire čorahane čačipená.

²Jekh so trej vaš kheritkoné barydyréske, sob (kaj) jov te javél patiaibnýtko pir saró.

³A vaš mánge davá isyn nabaró réndo, syr tumé déna čol (timín) mánge, ci manušýtko séndo déla. Ne me adiáke-pac' na davá čol péske.

⁴Pal-dová so ni savó čoripén nane pal mánde; ne davá na dophenéla, so me na som bangó: davá Raj Devél, Savó déla čol mánge.

⁵Tedy na sendiakiren angíl dová, syr Raj Devél javéla, Savó dudvaliakirela (obsvencynela) i kalé (cjomna) čorahanybena i otkerela pe jakhá adiáke-pac' ĥaradé mysli dro manušýtko iló; i tedy sváko (kažno) manúš doreséla (dolela) šaribén Devléstyr.

⁶Ĥáda, davá saró, otlydžalape ke me i ke Apoloso vaš tumaró mištypén, sob (kaj) tumé te sykljon améndyr te na duminen vučydyr kodolestyr, so isyn čhindló, i te na phutjon jekh angíl jekhéste.

⁷Paldavá, kon ža vykedéla tut javirendyr? I so isyn túte, so na sys dynó túke? Tedy sóske tu šaresape, sýrby tu na dorescian (na dolyjan) davá syr taláno?

⁸Tumé uže čalyne, tumé akaná jačné barvalé, tumé uže jačné kral'jenca bi amaró; i me kamám, sob (kaj) tumé čačunés te kralinen, i aménge adiáke-pac' te kralinav tuménca.

⁹Paldavá me duminava, so Devél čhudiá amen te javas Apostolenca pe sámo kónco (jagóro) palatunendyr, savén Jov vykedyjá te meras, syr i Xristóso myjá. Paldavá ame jaciám sýrby ladžakirdó sykaibén (primiéro) pe svetóskire jakhá i Jangolenge, adiáke-pac' i manušénge.

¹⁰Ame sam dylyné pal Xristosóste, a tumé san god'varé dro jekhipén Xristosósa; ame sam bizorjákire, a tumé san zoralé; tumen slavinena, a ame sam dre ladž.

¹¹Ke davá-pac' mardó (štúnda) me iščo (inké) sam bokhalé i aménde isyn smega (truš) i ame sam dre patave i domardé, i ame psirasa syr bikherítka,

¹²ne ame kerása butý pharés péskire vasténca. Amen košena, a ame bahtiakirasa; amen tradéna, a ame pirilydžasa;

¹³amen košena, a ame otphenasa lačhé lavénca, ame sam syr dalé-svetoskiro gnejo (mesta), ame jaciám syr bláta dalé phuvjákiri ke/žýko kakaná.

¹⁴Me na čhináva davá, sob (kaj) te ladžakirav tumen, a sob (kaj) te dav godý tuménge, syr miré drogoné pšalénge.

¹⁵Paldavá, kóli tuménde isyn deš tysjoncy sykliar'jen (nastavniken) pir patiaibén dre Xristosóste, ne usajékh tuménde isyn jekh dad; pal-dová so me jacjom sýrby dad vaš tuménge pir bahtaló lav, so me jandjom.

¹⁶Paldavá me mangáva tumen, te kerén adiáke, syr me keráva.

¹⁷Pal-dová me bičhadjom ke tumé Timofiejos (Ximas), miré drogoné i patiaibnytkone sýrby čhavés pir patiaibén dre Raste-Devléste, savó dolydžala ke tumarí godý miro džiibén dro jekhipén Xristosósa, adiáke syr me i sykliakirava dre khangirja.

¹⁸I pal-dová so me kakaná na džáva ke tumé, to vari-savé tuméndyr phutine.

¹⁹Ne me syg javáva ke tumé, kóli Raj Devél déla, i me udžinava vaš péske na dová, so adalé phut'kirdé manušá rakiréna, a Duhoskiri zor, saví isyn lénde.

²⁰Pal-dová so Devléskiro Kralipén rikirélape na lavénca, a Duhóskire zorjása.

²¹So ž tedy tumé kaména? Ci mánge te javav ke tumé destesa ci laskasa i tihone Duhósa?