Read Biblija - Pe Baltitko Romani čib (Romanes) 2019 Baltic Romani Bible 1 Korinfianenge 9 Bible Online

1 Korinfianenge 9 - Biblija - Pe Baltitko Romani čib (Romanes) 2019 Baltic Romani Bible bible

1 Korinfianenge 9

¹Ci na som me vól'no? Ci na som me Apostolo? Ci na dykhcjom me Isusós Xristosós, amaré Ras-Devlés? Ci tumé na san sýrby otdyibén miré butiátyr vaš Ráske-Devléske?

²Kóli me na som Apostolo vaš javirénge, ne me som Apostolo vaš tuménge; pal-dová so tumé, savé isyn dro jekhipén Isusósa Xristosósa, tumé san sýrby dophenybén pal mirí Apostoloskiri butý.

³Me zaterdjovava pal péste vaš odolénge, savé propatiakirena man dro davá:

⁴“Ci nane aménde pravo te xas i te pjas?

⁵Ci nane aménde pravo te las paloróm patiaibnaskirja pheniá pir Raste-Devléste syr romniá, adiáke-pac' syr javír Apóstoly kerdé, miré pšála, pir Raste-Devléste, i Kifa?

⁶Ci mánde kokoreste i Varnavaste nane pravo te na kerás butý?

⁷Savó xalado (ruldo) lydžála maribén pal péskire lové? Kon isyn, savó čhudiá vinagrádniko, sob (kaj) te na xal múri? Kon isyn, savó čaravela gurto, sob (kaj) te na p'jel thud léndyr?

⁸Ci me rakiráva pir manušýtko godý? Ci na dová rakiréla i Zakóno?

⁹Ci nane adiáke začhindló dro Mojzáskiro (Moisiejoskiro) Zakóno: “Na zaker muj butiarné guruveske pe giv.” Ci pal guruvende adiáke duminéla Devél?

¹⁰Ci adiáke-pac' Devél na rakiréla vaš amaró lačhipén? Paldavá isyn phendló vaš amaró lačhipén, so odová, kon pahinela (pharavela) phuv, mek jov te pahinel lačhé užakiribnasa, i odová, kon marela giv, mek te marel lačhé užakiribnasa te lel péskiri paš daléstyr.

¹¹Kóli ame čhudiam Duhoskiri ziárka dro tumaró iló, ci baró isyn davá réndo (diélo), kóli ame skedasa tuméndyr dová, so isyn trej vaš džidé masá?

¹²Kóli javirende isyn pravo pe tuménde vaš davá, ci nane aménde butýr pravy? Ne ame na lyjam nisó pir davá pravo, a ame pirilydžasa saró, sob (kaj) aménge te na kerás vari-saví vánta angíl rosphenyben pal Xristososkiri bahtalý zan (zvies').

¹³Ci tumé na džinéna, so odolé, kon keréla svénto butý, čaliakirenape daléstyr, so isyn jandlo syr svénto dyibén dre Khangirí; odolé, savé dynarinena pašýl altárjo, léna péskiri paš doléstyr, so janelape pe altárjo.

¹⁴I adiáke-pac' Devél dyjá uphenybén odolénge, kon rosphenéla bahtalý zan (zvies'), te dživén dalé butiátyr, so jone keréna.

¹⁵Ne me ná lávas nisó dasavo. Ĥáda, me čhindjom davá na vaš dová, sob (kaj) adiáke te javél mánca; pal-dová so fedýr by sys vaš mánge te merav, sob (kaj) vari-kon te na šarel man, so me kerdjom davá bi lovengiro.

¹⁶Paldavá, kóli me rosphenava bahtalý zan (zvies'), mánde nane sósa te šaravpe; pal-dová so davá isyn mirí trébima; davá javélas pharipén mánge, kiéli me te na rosphenav bahtalý zan (zvies').

¹⁷Pal-dová so, kóli me keráva davá pir péskiri vólia, mánge isyn otdyibén, a kóli na pir péskiri vólia, tedy me keráva dophendly mánge butý.

¹⁸Savó ž tedy mánge mazúri (nagrada)? Dro dová, so kiéli me rosphenava bahtalý zan (zvies'), tedy me džindliakirava bahtalé zaniása bi lovengiro, me na lavá l'góta miré pravendyr rosphenybnastyr.

¹⁹Paldavá, kiéli me som vól'no saréndyr, me kerdjom pes pisharisa vaš sarénge, sob (kaj) mánge te kedav len so butýr vaš Xristosóske.

²⁰I me jacjom Judosa vaš Judénge vaš dová, sob (kaj) mánge te kedav len vaš Xristosóske: vaš odolénge, kon isyn tel Mojzáskiro Zakóno, me sómas sýrby tel Mojzáskiro (Moisiejoskiro) Zakóno, sob (kaj) mánge te kedav tel-Zakonoskiren vaš Xristosóske:

²¹vaš odolénge, konéste nane Zakóno, me sómas sýrby bi Zakonoskiro (ne me na gijom telé Devléskiro Zakonóstyr, a me som pir čačipén tel Xristosóskiro Zakóno) vaš dová, sob (kaj) mánge te kedav kodolén, konéste nane Mojzáskiro Zakóno.

²²Me jacjom sýrby bizorjákiro dro patiaibén vaš odolénge, konéste nane zoraló patiaibén vaš odová, sob (kaj) mánge te kedav odolén, konéste nane zoraló patiaibén. Vaš saré manušénge me kerdjompe sýrby kažnonesa léndyr vaš dová, sob (kaj) mánge te zrakhav vari-konés, syr féni saštý.

²³I me keráva davá saró vaš bahtalé-zaniakiro lačhipén, sob (kaj) mánge te javav butiarnesa pir mirí paš lénca.

²⁴Ci džinéna tumé, so saré, kon prastala pe stadiono, prastána so isyn sygedýr jekh angíl jekhéste, ne féni jekh léla prizo. Paldavá, prastan saré, sob (kaj) tuménge te vybašaven prizo.

²⁵Ne kažno manúš, kon marelape pal prizo, obrikirlape saréstyr, so isyn namišto vaš léskiro prastaiben: kodolé manušá vaš dová, sob (kaj) lénge te len viánka (koróna), saví kirnjola, a ame vaš kodoia viánka, saví na kirnjola.

²⁶I paldová me prastava na sýrby manúš, konéske nane smyslo, paldavá me maravpe pal prizo na syr manúš, savó pekavela pir fáno (vozduho).

²⁷Ne me khiniakirava miré masá i rikirava les dre vastá, sob (kaj) kiéli me javáva te rosphenav bahtalý zan javirénge, mánge te na jačavpe nalačhesa vaš prastaiben.