Read Biblija - Pe Baltitko Romani čib (Romanes) 2019 Baltic Romani Bible 2 Korinfianenge 13 Bible Online

2 Korinfianenge 13 - Biblija - Pe Baltitko Romani čib (Romanes) 2019 Baltic Romani Bible bible

2 Korinfianenge 13

¹Davá javéla tríto mólo me džáva ke tumé. “Trej duj ci trin jakhítka (svidiétieli), sob (kaj) te čhuvén zor (tvárdyma) pe lav pir davá réndo.”

²Me phendjom tuménge ĥaredyr i me phenáva angíl kakaná (adiáke-pac', syr me rakirdjom, kiéli me sómas ke tumé javír mólo, kakaná me na som tuménca čačunés) odolénge, kon kerdiá grého angíl i saré javire manušénge, so kiéli me javáva nevéstyr, me na potanginava (na požalinava) len.

³Ci rodéna tumé dophenybén, so Xristóso rakiréla pir mánde? Jov isyn na bizorjákiro vaš tuménge, a Jov sykavéla Péskiri zor maškír tuménde;

⁴pal-dová so Jov sys primardo pe trušúl Péskire bizoralypnasa, ne Jov isyn džidó Devléskire zorjátyr; pal-dová so ame, čačes, sam bizorjákire dro jekhipén Lésa; ne ame javása te dživás Lésa pir Devléskiri zor, saví isyn dyný tuménge;

⁵propatiakiren pes, ci dživéna tumé pir patiaibén; otphenen kokoré péske: ci džinéna tumé kokoré, so tumé san Xristosóskire? Kóli na adiáke, tedy tumé na san lačhé.

⁶Mánde isyn lačhó užakiribén, sob (kaj) tumé te džinén, so tumé san lačhé.

⁷Ne me mangavpe Devléske, sob (kaj) tumé te na kerén čoripén na vaš dová, sob (kaj) aménge te sykavas, so ame progijam propatiakiriben, ne sob (kaj) tumé te kerén pir čačipén, — ničý, kóli ame i na javása pridžindle syr lačhé.

⁸Pal-dová so aménde nane zor proti čačipén, a pal čačipén.

⁹Paldavá ame radynasape, kiéli ame sam bizorjákire, a tumé san zoralé. I ame adiáke-pac' mangasape Devléske, sob (kaj) tumé te javén bidošakire.

¹⁰Paldavá me čhindjom davá, so, paka me na som tuménca; a kiéli me javáva ke tumé, mánge te na otlydžavpe strogimasa tuménca pir pravo, savó Raj Devél dyjá mánge te podrikirav tumen, a nad, sob (kaj) te xas tumaró iló.

¹¹Palatunó lav, pšalále: radynénpe, javén bidošákire, podrikirén jekh jekhés, javén jekhé-godiákire, javén dro ramánjo (miro) jekh jekhésa.

¹²Piridén “ramánjo” jekh jekhéske sventoné čamudypnasa.

¹³Saré svénta piridena “ramánjo” tuménge.

¹⁴Mek bahtalypén amaré Ráskire-Devléskiro, Isusóskire-Xristosóskiro, Devléskiri láska i patýv i Sventoné Duhóskiro khetanypén te javén tuménca. Amín'.