Read Biblija - Pe Baltitko Romani čib (Romanes) 2019 Baltic Romani Bible 2 Korinfianenge 2 Bible Online

2 Korinfianenge 2 - Biblija - Pe Baltitko Romani čib (Romanes) 2019 Baltic Romani Bible bible

2 Korinfianenge 2

¹Paldavá me rossendindjom péske te na džav ke tumé nevéstyr baré piridživipnasa.

²Kóli me janáva tuménge baró piridživipen, kon ža isyn odová, kon adiáke-pac' i obradynela man, kóli na odová-pac', konéske me janáva baró piridživipen?

³I me čhindjom davá-pac' tuménge darátyr (darjatyr), so kiéli me javáva, tedy, sob (kaj) mánge te na piridživav pal odolénde, konéske trej te radynel man, me zoralés patiáva dre tuménde, so mirí rádyma isyn rádyma vaš saré tuménge.

⁴Pal baró piridživipen i dukhano iló me čhindjom tuménge baré jasvénca na vaš dová, sob (kaj) tumé te piridživen, a sob (kaj) tumé te udžinén mirí bari pšalýtko patýv ke tumé.

⁵Ne kóli vari-kon jandiá piridživipen vari-konéske, jov jandiá piridživipen na vaš mánge, a na rakirí but, sarénge tuménge.

⁶Vaš kadasavé manušéske uhtýlla (dósi) vyrakiriben, so sys léske butendyr tuméndyr;

⁷sob (kaj) tumé pe proti fedýr te primangen léske i te podrikiren les, sob (kaj) jov te na javél stasadó piridživipnása.

⁸Paldavá me mangáva tumen te prilén les laskasa.

⁹Pal-dová so me čhindjom, sob (kaj) te propatiakirav tumen, ci kandéna tumé dro saró.

¹⁰A vari-konéske tumé primangena i me adiáke-pac' primangava; pal-dová so, kóli me primangdjom vari-so, me primangdjom davá pal tuménde pir Xristosóskiro pravo;

¹¹sob (kaj) nálačho te na pirizorjakirel amen, pal-dová so ame džinása, so jov kaméla.

¹²Kiéli me javdjom dre Troada te rosphenav Xristososkiri bahtalý zan (zvies'), kiéli Devél psiradia vudár vaš mirí butý,

¹³mánge sys pharó dúho (fáno) pe iló, kiéli me na lathjom Titos, miré pšalés, paldavá me roziacjompe lénca i gijom duredýr ke Makiedonija.

¹⁴Ne parik Devléske, Savó ŭsády (sak) lydžála vučés amen dro jekhipén Xristosósa i piridela pir aménde džinybén pal Xristosóste, savó ame sungasa (sungavasa) syr gudló khandypen.

¹⁵Pal-dová so ame sam sýrby gudló thuv (dymo), so Xristóso janéla Devléske vaš odolénge, savé isyn zrakhné i vaš odolénge, savé xasjona;

¹⁶vaš jekhe manušénge davá isyn meribnaskiro khandypen, vaš javire manušénge davá isyn džiibnáskiri sung. Kon ža, tedy, isyn lačhó pe davá?

¹⁷Pal-dová so ame na janasa doš Devléskire lavéske, syr but manušá adiáke keréna, ne ame saré iléstyr, Kokoré Devléstyr rakirasa Xristosóskire zorjása angíl Devléskire jakhá.