Read Biblija - Pe Baltitko Romani čib (Romanes) 2019 Baltic Romani Bible 2 Korinfianenge 9 Bible Online

2 Korinfianenge 9 - Biblija - Pe Baltitko Romani čib (Romanes) 2019 Baltic Romani Bible bible

2 Korinfianenge 9

¹Me duminava, so na trej te čhinav pal dynaribén (služenijo) te den vast sventonenge;

²pal-dová so me džinóm tumaró xačkiribén te pomoginen (te den vast), sósa me šardjom tumen manušénge dre Makiedonija, pal dová, so Ahaija[1] sys skedynó berš pale i tumaró iléskiro xačkiribén te den vast sýrby ĥazdyjá buté-manušéngiro iló.

³Ne me bičhadjom pšalén ke tumé, sob (kaj) amaró šaribén pal tuménde te na javél čhučó (pusto), sob (kaj), syr me phendjom, tumé te javén skedyné,

⁴a so, kiéli manušá Makiedonijatyr javéna mánca i dykhéna, so tumé na san skedyné, savó ž ladžaipén javéla aménge (na rakirí pal tuménde) pal amaró tvardo šaribén.

⁵Paldavá me pridumindjom te mangav pšalén, sob (kaj) jone te džán angledýr ke tumé i te dokončynen te skedén lové vaš bahtiakirdó dáro, pal so sys dynó lav, sob (kaj) jov te javél bahtiakirdó dáro iléstyr, a na sýrby tyrdena zorjása.

⁶Davá isyn čačipén, so, kon čhuvéla giv nábut, odová i kedela aplodo nábut, a kon čhuvéla giv but, odová i kedela aplodo but:

⁷mek kažno manúš te del adákicy, kicý isyn léske pir iló, a na pir zor; pal-dová so Devléske isyn drógo kodová manúš, kon déla radymása.

⁸Paldová so Devél moginéla te bahtiakirél tumen adákicy dro saró, sob (kaj) tuménde te uhtylel (te javél dósi) saró, so trej tuménge, i upredyr daléstyr, sob (kaj) tumé te javén skedyné pe kažno lačhó réndo:

⁹syr isyn čhindló: “Jov rozdyja saró, dyjá bogenge, Léskiro čačipén javéla pe saré beršá.”

¹⁰I Devél, Savó déla ziárki te čhuvén dre phuv i maró te xan, déla tuménge saró i barjakiréla saró i javéla barvaló aplodo tumaré čačipnastyr:

¹¹Devél keréla tumen barvalé ilénca pe saré lačhé réndy, so but manušá javéna te parikirén Devléske pal tumaré dáry, savé jone doreséna (dolena) améndyr.

¹²Pal-dová so dasavo lačhó dynaribén na so féni pomoginela sventonenge dre léngiri trébima, ne iščo (inké) butedýr vykharela léndyr baró parikiriben Devléske;

¹³i jone slavinena Devlés, dykhí pe dasavo lačhó dynaribén, pal-dová so, syr tumé pridžinena, adiáke-pac' i tumé keréna saré iléstyr pir Xristososkiri bahtalý zan (zvies'); i pal tumaré ilýtka dáry lénge i javirénge,

¹⁴i jone dre péskire patierja (molitvy) Devléske tyrdenape ilésa ke tumé pal barvaló Devléskiro bahtalypén, savó Jov sykadiá pir tuménde.

¹⁵Parikirasa Devléske saré godiatyr i iléstyr pal Léskiro taláno, savó naštý te vyphenas.