Read Biblija - Pe Baltitko Romani čib (Romanes) 2019 Baltic Romani Bible Galatenge 1 Bible Online

Galatenge 1 - Biblija - Pe Baltitko Romani čib (Romanes) 2019 Baltic Romani Bible bible

Galatenge 1

¹Apostolostyr Pavlístyr, savó sys vykedyno na pir manušénde i na pir manušýtko godý, a pir Isusóste Xristosóste i Devléste Dadéste, Savó ĥazdyjá Les muléndyr,

²i saré pšaléndyr, kon isyn mánca, Galatijakire khangirjake.

³Te javél bahtalypén i ramánjo (miro) tuménge Devléstyr Dadéstyr i amaré Rástyr-Devléstyr, Isusóstyr Xristosostyr,

⁴Savó otdyjá Pes Kokoró pal amaré gréhi, sob (kaj) te zrakhél amen dalé xohané svetóstyr pir Devléskire-Dadéskiri vólia,

⁵te javél sláva Devléske Dadéske pe saré beršá i viéki. Amín'.

⁶Me divinavape, so tumé adiáke sýges risjona Léstyr, Savó khardiá tumen pir Xristosóskiro bahtalypén ke javír bahtalý zan (zvies'),

⁷saví nane javír Jevángielija, a davá isyn vari-savé javír manušá, savé dylniakirena tumen i kaména te piririskiren Xristososkiri Jevángielija.

⁸Ne kóli ame, ci až Jangólo Bolybnástyr javélas i javélas te rosphenel javír bahtalý zan (zvies'), ne na dasaví, so ame rosphendiam; mek jov te javél prokošnó.

⁹A syr ame phendiam angledýr, adiáke-pac' i me kakaná phenáva: kóli vari-kon rosphenéla vari-saví javír bahtalý zan (zvies'), i na dasaví, so ame rosphendiam, mek jov te javél prokošnó.

¹⁰Naúšto me patiakirava manušén ci Devlés? Ci me rodava vari-so, sob (kaj) me te javav lačhó manušénge? Pal-dová, so kóli me te javav lačhó manušénge, tedy me na javáva Xristosóskiro pishári.

¹¹Ne sob (kaj) tumé te džinén, pšalále, so bahtalý zan (zvies'), saví me rosphenava tuménge, isyn sčhudy na pir manušýtko godý.

¹²Pal-dová so i me na prilyjom la manušéndyr, i nijékh manúš na sykliakirdiá man pal bahtalý zan (zvies'), a Jekh Isúso Xristóso sykadiá mánge, so te phenáv.

¹³Tumé, xači, šundlé pal dová, syr me dživdjom pir Judýtko sykliakiribén, syr me phagirdjom miéra, kiéli me tradavas Devléskire khangirjákire manušén i pričhudjom zor te xasiakiráv len;

¹⁴i me sómas slavutnedyr javire terné Judendyr miré beršesa pir Judýtko sykliakiribén, mánde sys butýr iléskiro xačkiribén pal amaré-dadéngiro prisykliaiben.

¹⁵A kiéli sys lačhó Devléske, Savó vykedyjá man tedy, kiéli me iščo (inké) sómas dre dakiri ločoví (utroba); i Savó prikhardia man pir Péskiro bahtalypén,

¹⁶i otkerdia Péskire Čhavés dre mánde, sob (kaj) me moginavas te rosphenav bahtalý zan Najudénge, i tedy me na lyjom te radinavpe manušénca,

¹⁷i me na gijom dro Jerusalimo ke odolé manušá, savé jačné Apóstoly (Apostolenca) angledýr mándyr, a me gijom dre Aravija, i tedy javdjom pale dro Damásko.

¹⁸Tén'ci, paló (poslie) trin berš me gijom dro Jerusalimo te dykhavpe Petrisa, i me jacjompe lésa dešupandž dyvesá;

¹⁹ne me na dykhcjom ni savé javire Apostolos, jekhe Jakovós, Ráskire-Devléskire pšalés.

²⁰A dová, so me čhináva tuménge, ĥáda, — angíl Devléste, me na xohavava.

²¹Tén'ci me gijom pir Sirijakire i Kilijakire phuvjá.

²²Ne patiaibnaskire dre Xristosóste khangirjákire skedyibnástyr dre Judéia na džindlé man dro muj;

²³iekh, so jone šundlé pal mánde, sys dová, so odová manúš, kon tradelas len vari-kiéli, rosphenéla bahtalý zan (zvies'), saví jov, xači, ĥaredyr xasiakirelas:

²⁴i jone saré slavindle Devlés pal mánde.