Read Biblija - Pe Baltitko Romani čib (Romanes) 2019 Baltic Romani Bible Galatenge 3 Bible Online

Galatenge 3 - Biblija - Pe Baltitko Romani čib (Romanes) 2019 Baltic Romani Bible bible

Galatenge 3

¹Ne, Galaty, savé tumé bigodiakire san! Kon davá čovahaniakirdia tumen, sob (kaj) tumé te na kandén patiaibén; angíl ža tumaré jakhá Xristóso sys sýrby sykado primardo pe trušúl?

²Jekh réndo (diélo), so me kamám te udžinav tuméndyr: ci tumé doresné (dolyne) Dúho (Fáno) pir Zakonóskire butiá? Ci šunybnastyr pir patiaibén?

³Save tumé san bigodiakire! Tumé lyné te dživén nevéstyr pir Dúho (Fáno), a kakaná tumé končynena pir péskire-ločakiri zor.

⁴Ci tumé pirilydžine adákicy ivjá (naprásnes)? Kóli te javél davá čačunés ivjá?

⁵Devél dyjá Dúho (Fáno) tuménge i kerdiá dívy maškír tuménde, ci sys davá pir Zakonóskire butiá, ci šunybnastyr pir patiaibén?

⁶Adiáke Avraámo patiandyja Devléske i Devél prilyjá les čačunesa pal léskiro patiaibén.

⁷Paldavá, džinén, so odolé, kon isyn patiaibnastyr, jone isyn Avraamóskire čhavé.

⁸I Svénto Čhinybén angíl dykhciá, so Devél pridžinela čačunenca Najuden pir patiaibén, i angíl rosphendiá bahtalý zan (zvies') Avraamóske: “Devél bahtiakiréla saré manušén pir túte.”

⁹Paldavá, saré, kon isyn patiaibnaskire, isyn bahtiakirde, syr Jov sys.

¹⁰A saré, kon rozginela pe Zakonóskire butiá, isyn prokošne, pal-dová so isyn čhindló: “Kažno manúš, kon na rikirlape sareske, sob (kaj) saró te kerél, so isyn čhindló dre Sventoné-Čhinybnaskiri lylvarí, sob (kaj) te javél prokošnó!”

¹¹a ni jekhe manušés Devél na pridžinela čačunesa angíl Léste, pal-dová so: “Čačunó manúš dživéla pir patiaibén.”

¹²Dro Zakóno nane ni savó khetanypen patiaibnása, jekh so dová: “Kon spolninela saró Zakóno, odová javéla te dživél.”

¹³Hristóso vykindia amen Zakonóskire prokošybnastyr, kiéli Jov lyjá Zakonoskiro prokošybén pe Péste, syr isyn čhindló dro Zakóno: “Kažno manúš, kon isyn ublado pe kašt, te javél tel Devléskiro prokošybén”,

¹⁴sob (kaj) Avraamóskiro bahtiakiribén te javél pe Najudénde pir patiaibén dre Isusóste Xristosóste vaš dová, sob (kaj) ame moginasas te doresas (te dolas) Dúho (Fáno), pal Savó Devél dyjá lav pir patiaibén.

¹⁵Pšalále! Me rakiráva pir manušýtko godý: nijékh manúš dujendyr na otparuvela ci dočhuvela vari-so ke podčhindlo zavieto, savó angíl sys sčhudo maškír dujende.

¹⁶Ne Devél dyjá Léskiro lav Avraamóske i léskire-čhavéngire čhavénge: dro Svénto Čhinybén rakirlape na pal “semencende” sýrby pal buté manušénde, a pal jekhe “semencate”, pal Xristosóste.

¹⁷Me phenáva kakaná: Zakóno, savó sys dynó štaršelá trijánda berš korigedýr (pozžedýr), na otparuvela zavieto, savó Devél dudvaliakirdia (utvierdindia), i léskiro dynó lav na xasiakiréla zor.

¹⁸Kóli meknó mištypén isyn pir Zakóno, tedy nane butýr pir dynó lav, a Devél dyjá les Avraamóske pir dynó lav.

¹⁹Vaš so tedy sys dynó Zakóno? Jov sys dočhudo, sob (kaj) te sykavél, so dasavo čoripén isyn, paka na javéla Avraamóskire-rodoskiri seménca, vaš konéske sys dynó lav; Jangóly piridyne Zakóno pir maškiratuneste (posriednikoste) — Mojzaste.

²⁰Ne Devléske na treindiá maškiratuno, kiéli Jov dyjá lav Avraamóske jekh pe jekh.

²¹So ž tedy Zakóno isyn proti Devléskire dyné lavá? Sarésa nad! Pal-dová so, kóli te javél dasavo Zakóno, savó moginelas te del viéčno džiibén, tedy ame moginasas te doresas čačipén Zakonóstyr;

²²ne Svénto Čhinybén rakiréla, so saré manušá isyn tel grehoskiri zor, paldavá bahtalypén, pal savó Devél dyjá lav, pir patiaibén dre Isusóste Xristosóste, te javél dynó odolénge, savé patiána.

²³Ne angíl patiaibén dre Isusóste Xristosóste, ame sámas sýrby zaphandle tel Zakonoskiro rakhiben vaš dová, sob (kaj) te užakiras, kiéli otkerelape patiaibén.

²⁴Paldavá Zakóno dykhciá pal aménde i sys sýrby sykliaibnari (vospitatieljo), savó lydžijá amen ke Xristóso vaš dová, sob (kaj) Devél te pridžinel amen čačunenca pir patiaibén.

²⁵A kiéli javdiá Xristóso, aménge kakaná butýr na trej sykliaibnari te dykhél pal aménde;

²⁶pal-dová so ame saré sam Devléskire čhavé pir patiaibén, dro jekhipén Isusósa Xristosósa.

²⁷I saré tumé, savé boldepe dro jekhipén Isusósa Xristosósa, tumé sýrby khetaniakirdepe Xristosósa pir Svénto Dúho (Fáno).

²⁸Nane ni Judos, ni Griekos; nane ni pisharís, ni vol'none manušés; nane ni muršés, ni džuvliá; pal-dová so tumé saré san jekh dro jekhipén Isusósa Xristosósa.

²⁹A kóli tumé san Xristosóskire, tedy tumé san Avraamóskire rodóstyr; manušá, savé doreséna dová, pal so Devél dyjá lav.