Read Biblija - Pe Baltitko Romani čib (Romanes) 2019 Baltic Romani Bible Galatenge 5 Bible Online

Galatenge 5 - Biblija - Pe Baltitko Romani čib (Romanes) 2019 Baltic Romani Bible bible

Galatenge 5

¹Tedy, rikirenpe zoralés syr vol'na manušá, pal-dová so Xristóso mekciá pe vólia amen i, sob (kaj) tumé nevéstyr te na ur'jen pishariskiro ĥámo.

²Šunén! Me, som Pávli, phenáva tuménge, so, kóli tumé občhinenape, na javéla ni savó lačhipén tuménge Xristosostyr.

³I me dophenava kažnoné manušéske, so jov isyn bangó (musinela) te rikirél saró Zakóno.

⁴Tumé durine Xristosóskire lačhipnastyr, kóli kaména te javén pridžindle čačunenca angíl Devléste pir Zakóno; tumé ž otpyne bahtalypnastyr.

⁵Pal-dová so ame pir Svénto Dúho (Fáno) užakirasa zoralés, kiéli Devél pridžindia amen čačunenca pir patiaibén.

⁶Pal-dová so, kiéli ame sam dro jekhipén Isusósa Xristosósa, ni občhinyben, ni naobčhynyben na mol ničý, a saró smyslo isyn dro patiaibén, savó sykavéla pes pir patýv ke javír manušá.

⁷Tumé kerdé adiáke šukár sýrby prastándyne čačipnása pir stadiono! Kon otriskirdia tumen, sob (kaj) tumé te na kandén čačipén.

⁸Kadasavó otriskiriben nane Devléstyr, Savó prikhardia tumen.

⁹Tykny droždža (roščyna) ĥazdéla saró xumer (tiasto).

¹⁰Me džinóm zoralés, so tumé adiáke duminéna, kon isyn dro jekhipén Xristosósa, i kodoléske, kon ladžakirela tumen, javéla kára, na dykhí, kon by jov te na javél.

¹¹Ne palsó ž manušá tradéna man, pšalále, kóli me rosphenava lav pal občhinyben? Tedy bar, so isyn paštó pe drom angíl manušénde, te patián dro zrakhibén pir Xristosóskiro trušúl, isyn kedyno krig.

¹²Me kamám, sob (kaj) manušá, savé ladžakirena tumen, až te počhinen péske masá.

¹³Tumé, pšalále, sánas khardé te javén vol'na. Jekh so, sob (kaj) tumarí vol'nyma te na del saštypen te kerén pir ločakire-nalačhé kamibena.

¹⁴I saró Zakóno rikirlape pe jekh priphenybén: “Sykáv patýv péskire pašatuné manušéske, syr kokoró péske.”

¹⁵A kóli tumé košenape i xanape maškír péste, tedy rakhénpe, sob (kaj) tumé te na xasiakirén jekh jekhés.

¹⁶Ne me phenáva, dživén pir Svénto Dúho (Fáno), i tumé na javéna te kerén pir nalačhé-ločakiro kamiben.

¹⁷Pal-dová so ločake na trej dová, so Duhoske trej, i Duhoske (Fanoske) trej na dová, so ločake trej: kadalé duj kamibena isyn vérgi jekh jekhéske; paldavá tumé na keréna dová, so tumen tyrdela,

¹⁸ne kóli Svénto Dúho (Fáno) lydžála tumen, to tumé na san tel Zakóno.

¹⁹Ĥáda, so keréna manušá pir ločakire kamibena: jone keréna biladžaipén, dživéna džuvliénca bi sevlakiro, lydžána pes syr murdalá (žyvotna);

²⁰mangénape idolénge, čovahaniakirena, na sykavéna patýv javire manušénge, košenape, zevlynena, zamarena manušén, pričhuvena zor te javén fededýr javire manušéndyr, rospernape xoliása pe grupy, kandéna xohané sykliakiribena,

²¹žalinena lačhipén javirénge, p'jena syr matybnarja, gulinena biripiribnaskires i but javír; pal kadasavende me phenáva angíl, syr i rakirdjom angledýr, so, kon adiáke keréla, na doreséla paš dro Devléskiro Kralipén.

²²A pir Svénto Dúho (Fáno) manušá dživéna patyvása ke javír manušá, radymása, spokojnymasa, dlugone vyrikiribnasa, lačhé-ilytkimasa, lačhipnása, čačipnása;

²³jone isyn štyl (tiha), obrikirena pes, — kadasavé manušén prityrdela ke pe Zakóno.

²⁴I adalé manušá, savé isyn Xristosóskire, primarde péskiri manušýtko grehítko natura pe trušúl péskire nalačhé kamibnasa i grehoskire tyrdypnasa.

²⁵Kóli ame dživasa pir Svénto Dúho (Fáno), aménge trej i te kerás pir Svénto Dúho (Fáno).

²⁶Na javása te rikiras vučés nakh, na javása te das zor xoliake jekh pe jekhéste, sob (kaj) te na das jakhalo jekh jekhés.