Read Biblija - Pe Baltitko Romani čib (Romanes) 2019 Baltic Romani Bible Galatenge 6 Bible Online

Galatenge 6 - Biblija - Pe Baltitko Romani čib (Romanes) 2019 Baltic Romani Bible bible

Galatenge 6

¹Pšalále, kóli manúš isyn uhtyldo dro vari-savó nálačho réndo (diélo), tedy tumé, savé dživéna pir dúho (fáno), poden vast (pomoginen) léske te terdjol pale pe čačunó drom kovlé ilésa, i dykhén pal péste, sob (kaj) tumé kokoré te na perén pe propatiakiriben.

²Pomoginen jekh jekhéske te lydžán pharipén, i dalésa tedy tumé spolninena Xristosóskiro Zakóno.

³A kóli vari-savó manúš ginéla pes vari-konesa, kiéli jov kokoró ničý na mol péstyr, tedy jov xohavela pes;

⁴ne mek kažno manúš te del čol (te sprobinel pes) péske, tedy jov javéla te radynélpe kokoró péskire keribnastyr, a na javire manušéndyr.

⁵Pal-dová so kažno manúš lydžála péskire džiibnáskiro pharipén.

⁶Mek manúš, savó sykljola, te del paš péskire mištypnástyr kodoléske, kon sykliakiréla les.

⁷Na denpe dukhá: Devlés naštý te xohavél; dová, so manúš čhuvéla dre phuv, dová-pac' jov i skedéla.

⁸I kon čhuvéla dre phuv vaš péskiri loč (plot'), odová čhinela krig aplodostyr Duhoskiro meribén, a kon čhuvéla dre phuv vaš Dúho (Fáno), kodová sčhinela aplodostyr viéčno džiibén Sventoné Duhóstyr:

⁹kiéli ame kerása šukár, tedy aménge te na khinjovas, pal-dová so ame javása te skedas aplodo dro péskiro časo, kóli ame na perasa dro dúho (fáno).

¹⁰Paldavá, kóli isyn časo/saštypen, to javása te kerás lačhipén sarénge, i drieván fedýr kodolénge, savé isyn pšála pir patiaibén.

¹¹Dykhén, savé baré bukvenca me čhindjom tuménge miré vastésa.

¹²A odolé, savé kaména te sykavén pes pir loč manušénge, začhuvena tumen te občhinenpe, jekh vaš dová, sob (kaj) len te na tradén pal Xristosóskiro trušúl.

¹³I jone kokoré, savé isyn občhindlé, na rikiréna Zakóno, ne jone kaména, sob (kaj) tumé te občhinenpe vaš dová, sob (kaj) te šarenpe, so jone kerdé občhinyben pe tuménde.

¹⁴Ne mánge te na šaravpe nisosa, jekh amaré Ráskire-Devléskire, Isusóskire Xristosóskire trušulesa, pir Konéste svéto isyn primardo pe trušúl vaš mánge, i me adiáke-pac' vaš davá svéto.

¹⁵Pal-dová so, kon isyn dro jekhipén Xristosósa, na značinela nisó: ni občhinyben, ni naobčhinyben, a nevó manúš.

¹⁶I kodolénge, kon dživéla pir davá uphenybén, te javél pe lénde ramánjo (miro) i tangipén (láska) i pe saré Devléskire manušénde.

¹⁷Paldavá adiáke: mek nikón te na pharjakirel man, pal-dová so mánde isyn Isusóskiro šramy (morima) pe masá.

¹⁸Mek bahtalypén amaré Ráskire-Devléskire, Isusóskire Xristosóskiro te javél tumaré Duhósa, pšála. Amín'!