Read Biblija - Pe Baltitko Romani čib (Romanes) 2019 Baltic Romani Bible Efiesianenge 1 Bible Online

Efiesianenge 1 - Biblija - Pe Baltitko Romani čib (Romanes) 2019 Baltic Romani Bible bible

Efiesianenge 1

¹Pavlístyr, Isusóskire Xristosóskire Apostolostyr, savés Kokoró Devél vykedyjá, Sventoné manušénge, savé dživéna ke Efiéso, i patiána dre Isusóste Xristosóste:

²Mek te javél bahtalypén i ramánjo (miro) tuménge Devléstyr Dadéstyr amarestyr, i Rástyr-Devléstyr, Isusóstyr Xristosostyr.

³Mek te javél bahtiakirdó Devél i Dad amaré Devléskiro Isusóskiro Xristosóskiro, Savó bahtiakirdiá amen dro jekhipén Xristosa kažnoné Duhóskire bahtiakiribnása dro Bolybnáskiro svéto

⁴Jov vykedyjá amen dre Léste angledýr, syr sozdyjá svéto, sob (kaj) ame te javas svénta pir jekhipén Xristosósa i bidošakire angíl Léste pir patýv ke javír manušá;

⁵Jov vykedyjá amen pir Isusóste Xristosóste, sob (kaj) ame te javas Léskire čhavé pir Péskiro vykedyiben i vólia,

⁶sob (kaj) te slavinas Léskiro šukár bahtalypén, savó Jov dyjá aménge pir Péskire Drogoné Čhavéste:

⁷dre Savéste i pir Saveskiro Rat ame sam vykindle (vyrakhne), amaré gréhi isyn otmekne pir Léskiro barvaló bahtalypén;

⁸Savó Jov bi tangipnaskiro dyjá aménge saré godiása i džinybnasa,

⁹pir Péskiro celjo/res (čačipén) Devél otčhakirdiá aménge Léskire-voliákiro čorahanyben, savó Jov ĥaredyr zadumindia te kerél pir Xristosóste,

¹⁰vaš dová, kiéli javéla pherdó časo, sob (kaj) te khetaniakirel saró, so isyn pe bolybén i pe phuv, pir Xristosóste,

¹¹pir jekhipén Lésa i ame jaciám Devléskire manušénca pir Léskiri myslia, kiéli Jov vykedyjá amen i Savó keréla saró dro svéto pir Péskiri vólia samone anglypnástyr,

¹²sob (kaj) ame, savé pérva doresciam (dolyjam) lačhó užakiribén Xristosostyr, te šaras Devléskiri sláva;

¹³dre Léste i tumé adiáke-pac' šundlé čačunó lav, bahtalý zan (zvies') pal tumaró zrakhibén, syr tumé upatiándyne dre Léste. Tuménde isyn jakhítko (piečat'), savó sys Sventoné Duhóstyr, Saves tumé ĥará užakirde,

¹⁴Savó déla lav syr symadý (zalogo) pal amaró anglatunó džiibén i Devléskire-manušéngiro vyrakhiben vaš Devléskiri sláva.

¹⁵Paldavá i me adiáke-pac', kiéli ame šundjom pal tumaró patiaibén dre Isusóste i pal láska ke saré svénta,

¹⁶nijékhvar me na pirijačava te parikiráv Devléske pal tuménde, i me ripirava tumen, kiéli me mangavape Devléske pal tuménde,

¹⁷sob (kaj) Devél amaré Ráskire-Devléskiro, Isusóskiro Xristosóskiro, slavútno Dad, te del tuménge pir Dúho (Fáno) godý i te sykavél, sob (kaj) tumé fedýr te udžinén Les,

¹⁸i sob (kaj) Devél te kovliakirel tumaré ile i te otčhakirel tuménge jakhá, sob (kaj) tumé te udžinén dová lačhó užakiribén, ke savó Jov tumen khardiá, i savó barvaló isyn meknó mištypén pir dynó lav, Léskire slavakiro, vaš sventonenge,

¹⁹i savó bimierakiro isyn Léskiro baripén zoralypnaskiro vaš aménge, savó Jov déla saré sventonenge, savé patiána dro Léskire-zoralypnaskiro keriben,

²⁰Savó Jov sykadiá dre Xristosóste, kiéli Jov otdžidiakirdiá Les muléndyr i čhudiá pir čačuný rig Péstyr dro Bolybnáskiro Rajo,

²¹vučedýr baré randyr, saré zor'jendyr i kažnoné zorjátyr dro davá svéto i kažnoné lavéstyr, so isyn na jekh dro davá viéko, ne i dro viéko, savó angíl javéla;

²²i Devél čhudiá saró telé tel Isusóskire ĥerá, i čhudiá Léske zor te javél Šeré Xulása pe saró, Šeralesa vaš Khangirí.

²³Saví isyn Léskire masá, Léskiro pherdypen, Savó pherdiakirela Pésa saró.