Read Biblija - Pe Baltitko Romani čib (Romanes) 2019 Baltic Romani Bible Efiesianenge 2 Bible Online

Efiesianenge 2 - Biblija - Pe Baltitko Romani čib (Romanes) 2019 Baltic Romani Bible bible

Efiesianenge 2

¹I tumen, savé sánas mulé pal tumaré nalačhé réndy i gréhi,

²dre savé tumé angledýr adiáke dživdé, pir davá svetoskiro viéko, pir khieningoskiro uphenybén, savó sys xuláj dro fáno (vozduho), pir dúho (fáno), savó xulainela sarénca, kon na kandéla Devlés:

³ame adiáke-pac' saré vari-kiéli i sámas kadasavé i dživdiam pir nálačho ločakiro (plotiakiro) tyrdypén i kerdiám dová, so aménge podphenela nálačho kamiben i so javéla pe godý, i ame sámas pir bijanypén sýrby čhavé, pe konéste peréla Devléskiri xolý, syr i javír manušá:

⁴ne Devél, Savó isyn barvaló tangipnasa, i Savó pir bari Péskiri láska, savjása Jov prityrdyja amen,

⁵amen, savé sys mulé pal amaré nalačhé réndy, Jov otdžidiakirdiá dro jekhipén Xristosósa, pir bahtiakiribén, savésa tumé san zrakhné,

⁶i Jov otdžidiakirdiá amen pir amaró jekhipén Xristosósa i dyjá aménge štéto dro Bolybnáskiro Rajo Isusósa Xristosósa,

⁷sob (kaj) te sykavél dre viéki, savé angíl javéna, naj baredýr barvalypén Péskire bahtiakiribnastyr pir tangipén ke ame dre Xristosóste Isusóste.

⁸Paldavá so tumé san zrakhné bahtalypnasa pir patiaibén, i davá isyn na doléstyr, so tumé pričhuvena zor, davá tuménge isyn dynó Devléstyr;

⁹zrakhibén déla Devél na pal réndy (diély), pal-dová, sob (kaj) nikón te na moginel te šarelpe.

¹⁰Pal-dová so ame sam kadasavé, savénca Devél sozdyjá amen dro amaró jekhipén Isusósa Xristosósa vaš dová, sob (kaj) ame te kerás lačhé réndy, savé Devél ĥaredyr vykedyjá vaš aménge.

¹¹Paldavá ripirén, so tumé pir bijanypén san Náiudy, savén khardé naobčhindlenca odolé, savé isyn občhindlé manušytkoné občhinybnasa, savó kerélape vasténca;

¹²tumé i sánas dro dová časo bi Xristosóskiro, tumé na sánas khetané Izrailjoskire manušénca, tuménde na sys paš dro Zavieto, tuménde na sys lačhó užakiribén, tumé sánas bi Devléskiro dro svéto:

¹³ne kakaná tumé san dro jekhipén Xristosósa Isusósa, tumé, savé ĥaredyr sánas dur, jačné pašýl, pir Xristosóskiro Rat, savó sys pročhudo pal tuménde.

¹⁴Pal-dová so Jov isyn amaró ramánjo (miro), Savó kerdiá dujendyr jekh i roskedyja vánta, saví sys terdy maškirál aménde.

¹⁵I Jov Péskire meribnasa pe trušúl parudia Zakonóskire uphenybená sykliakiribnasa vaš dová, sob (kaj) dujendyr te kerél dre Kokoré Péste jekhe nevoné manušés, i dalésa te janel manušénge ramánjo (miro),

¹⁶sob (kaj) dujén (Judén i Najuden) dro jekh masá te primirinel Devlésa pir trušúl, xasiakiri kažno vergima pe Léste,

¹⁷i kiéli Xristóso javdiá, Jov rosphendiá bahtalý zan (zvies') pal ramánjo (miro) sarénge tuménge, na dykhí pe dová, kon sys Léstyr dur ci pašýl,

¹⁸pal-dová so pir Léste ame Judy i Náiudy sam domekne dro jekh Dúho (Fáno) ke Dad.

¹⁹Paldavá tumé na san butýr čúža, i tumé na san manušá, savé na ĥará javné, ne tumé san pal jekh Sventoné manušénca, i tumé san jekh Devléskiri sém'ia(irí),

²⁰savén čhudé pe Apostolengiro i prorokengiro sykliakiribén, i savénde Kokoró Isúso Xristóso isyn venglytko bar vaš davá fundámiento,

²¹Savó sýrby rikirla saró kher khetané, barjola dre svénto khangirí Ráskire-Devléskiri,

²²dro jekhipén Lésa i tumé javéna khetané javirenca te dživén dro Devléskiro Kher pir Svénto Dúho (Fáno).