Read Biblija - Pe Baltitko Romani čib (Romanes) 2019 Baltic Romani Bible Efiesianenge 3 Bible Online

Efiesianenge 3 - Biblija - Pe Baltitko Romani čib (Romanes) 2019 Baltic Romani Bible bible

Efiesianenge 3

¹Vaš davá me, Pávli, som Isusóskiro Xristosóskiro manúš dro štaribén vaš tuménge, Najudénge.

²Kóli tumé šundlé pal Devléskire-bahtiakiribnaskiri butý, saví sys dyný mánge vaš tuménge, syr kheritkoné barydyréske,

³pal-dová so mánge otčhakirdiape čorahanyben, pal so me angledýr čhindjom nábut tuménge,

⁴tedy, kiéli tumé javéna te ginen davá, tumé moginénas te ĥaljon, so me džináv Xristosóskire čorahanybena,

⁵savé na sys angledýr džindlé ni jekhé manušytkoné rodóske adiáke, syr jone kakaná isyn otčhakirde Léskire Sventoné Apostolenge i prorokenge pir Svénto Dúho (Fáno),

⁶sob (kaj) i Najudénge te javén khetané Judenca dro Devléskiro bahtiakiribén i, sob (kaj) jone te jačen pašénca jekhe maséndyr, adiáke-pac' i dynó lav otlydžalape lénge, savó sys dynó dro Isusóste Xristosóste pir bahtalý zan.

⁷I me jacjom dynári (služýtieljo) vaš daja bahtalý zan pir Devléskiro bahtiakiribén, savó sys dynó mánge Léskire zorjása.

⁸Mánge, kon isyn naj tyknedýr saré devlytkonendyr, sys dynó davá bahtiakiribén te rosphenav Najudénge pal Xristosóskiro barvalypén, savó nijékhvar na xasjola.

⁹I te rosphenav sarénge, pal davá čorahano keriben, savó sys čhakirdo viekendyr dre Devléste, Savó saró kerdiá pir Isusóste Xristosóste.

¹⁰Sob (kaj) kakaná te javél džindly pir Khangirí barydyrénge i xulánge dro Bolybnáskiro Rajo bari Devléskiri godý,

¹¹adiáke, syr Devél zadumindia angledýr svetóskire sozdyibnastyr, savó Jov sozdyjá dre Isusóste Xristosóste, amaré Raste-Devléste,

¹²dro jekhipén Savésa aménde isyn muršypen i nadiéia te javas pašyledýr ke Devél pir patiaibén dre Léste.

¹³Paldavá me mangáva tumen, te na perén ilésa pal miré pharipena pal tuménde, savé isyn vaš tumarí sláva.

¹⁴Vaš davá me i som terdó pe čangá angíl amaré Ráskire-Devléskire, Isusóskire Xristosóskire Dadéste,

¹⁵Savéstyr kažno ródo dro Bolybnáskiro Rajo i pe phuv doreséla péskiro lav,

¹⁶mek te del Devél tuménge pir Léskire-slavakiro barvalypén, te jačen zoraledýr Léskire Duhóskire zorjása dre andratuné manušéste,

¹⁷sob (kaj) te dživél Xristóso pir patiaibén dre tumaré ile, i sob (kaj) tumé te javén zoralé dre patýv jekh ke jekh,

¹⁸i sob (kaj) tumé mogindlé te udžinén saré sventonénca, so dasavo isyn buĥlypén i dlengipén, i xoripén, i vučipén,

¹⁹i te ĥaljon, so isyn baredýr saréstyr pe svéto Xristososkiri láska vaš dová, sob (kaj) Devél te javél saré péskire pherdypnasa dro tumaró džiibén.

²⁰Ne Odoléske, Konéskiri zor isyn dre aménde, i saví moginéla te kerél butedýr doléstyr, pal so ame mangasa, ci ame duminasa,

²¹te javél Léske sláva dre Khangirí i dre Isusóste Xristosóste saré rodénge dre saré viéki. Amín'.