Read Biblija - Pe Baltitko Romani čib (Romanes) 2019 Baltic Romani Bible Efiesianenge 4 Bible Online

Efiesianenge 4 - Biblija - Pe Baltitko Romani čib (Romanes) 2019 Baltic Romani Bible bible

Efiesianenge 4

¹Me, savó som phandlo manúš pal Raste — Devléste, mangáva tumen te dživén čačuné (mol'noné) džiibnasa, savésa Devél khardiá tumen,

²te javén tumé štyl (tiha) i kandypnýtka i kovlé-ilýtka, te otlydžanpe jekh ke jekh dlugone vyrikiribnasa i patyvása,

³te pričhuvén zor te zrakhen jekhipén, savó Dúho (Fáno) déla pir ramánjo (miro), so khetaniakirela tumen.

⁴Isyn jekh masá i jekh Dúho (Fáno), syr isyn i jekh nadiéia, ke saví Devél khardiá tumen;

⁵isyn jekh Raj Devél, jekh patiaibén, jekh boldyipen.

⁶Isyn jekh Devél i Dad sarénge, Savó isyn vučedýr saréndyr i pir sarénde i dre aménde sarénde.

⁷Sarénge aménge sys dynó bahtiakiribén adákicy, ci but Xristóso Kokoró vykedyjá te del kažnonéske améndyr,

⁸paldavá Svénto Čhinybén rakiréla: “Jov ĥazdyjápe pe vučypen, otmekciá plienonen i dyjá bahtiakiribén manušénge”,

⁹ne dová, so Jov “ĥazdyjápe”, naúšto značynéla na dová, so Jov angledýr gijá telé dre liunoskire (adoskire)-phuvjákire pašá.

¹⁰Paldavá Jov, Savó gijá telé, isyn Odová-Pac', Kon i ĥazdyjápe vučedýr saré Bolybnáskire Rajostyr, sob (kaj) te pherdiakirel saró;

¹¹i Jov čhudiá vari-konés Apostolenca, vari-konés prorokenca, vari-konés te rosphenén manušénge bahtalý zan, vari-konés Devlytkoné-manušéngire rakhibnar'jénca i vari-konés sykliakiribnaskirénca,

¹²sob (kaj) te fedyrjakiren Devlytkoné manušén te rosphenén Devléskiro lav te zoraliakiren Khangirí, Saví isyn Xristosóskire-duhóskire masá;

¹³paka ame saré javása dro jekhipén ke jekh patiaibén i ame udžinasa Devléskire Čhavés, i ame jačasa baré (stala) murša i dodžasa ke naj staledyr (sama stala) Xristosóskire beršá;

¹⁴vaš dová, sob (kaj) ame te na javas butýr syr bijatoré (tyknoré), savé kuninenape i moginéna te zmarenpe čačuné droméstyr manušytkoné mendripnasa i xohaibnasa;

¹⁵a sob (kaj) aménge te rikiras čačipén dre patýv jekh ke jekh, pir saró te barjovas te zdžas (te poddžas) pe Xristosóste, Savó isyn Xuláj pe saró:

¹⁶Léstyr saré Duhóskire masá (Khangirí) isyn sphandlé i khetaniakirdé maškír péste džidé sphandypnasa i pir dová, so saré pašá podrikirena jekh jekhés i kažno paš keréla péskiri butý, i saré masá barjona i jačénape zoraledýr pir patýv ke javír manušá.

¹⁷Paldavá me rakiráva, i mangáva angíl Raste — Devléste, sob (kaj) butýr tumé te na kerén, syr keréna nácyi pir péskiri krótko godý,

¹⁸léngiri godý kalyja, jone xasiakirdé Devléskiro džiibén pir péskiro biladžaipén i xolynakiro iló,

¹⁹léngiri godý kaštalyja, jone lyné te zalenpe našukaroné rendénca adiáke, so keréna kažno magiripén bokhalypnasa.

²⁰Ne tumé na adiáke vysyklyne Xristosostyr,

²¹a tumé šundlé pal Léste i giné pal Léste, pal-dová so čačipén isyn dre Isusóste Xristosóste.

²²Mekén péskiro phuranó džiibén i na poddenpe grehóske, ke savó zlydžala grehítko tyrdypén;

²³ne len te duminen nevoné-manušéskire-godiása dro Dúho (Fáno);

²⁴i piriparudjon dre nevoné manušéste, savés Devél sozdyjá pir Péskiro dro patiaibén i svénto čačipén.

²⁵Paldavá mekén xohaibén, kažno tuméndyr te rakirél čačipén péskire pašatunéske, pal-dová so ame sam jekhé maséngire pašá jekh jekhéske.

²⁶Kóli tumé xoliasona, na kerén grého: na javén xolynakire saró dyvés,

²⁷i na den štéto bengéske dro tumaró džiibén.

²⁸Kon čordia, mek butýr te na čorel, ne mek fedýr te kerél butý, keri péskire vasténca lačhipén, sob (kaj) te javél sóstyr te del odolé manušénge, savé isyn čororé.

²⁹Na rakirén nisave kirne lavá, a jekh lačhé lavá, vaš podrikiribén dro patiaibén, sob (kaj) davá te janel bahtiakiribén odolénge, kon šunéla.

³⁰I na kerén fuipén Devléskire Sventoné Duhóske, Savó čhudiá čergenorí pe tuménde dro vykinybnaskiro dyvés.

³¹Mek kažno kirkipen, xolý, čingárd, i gódla i nalačhé lavá te otdžan tuméndyr khetané saré tumaré fuipnasa.

³²Javén lačhé jekh ke jekh, tangipnýtka (žalosna), primangen jekh jekhéske, syr i Devél pir Xristosóste primangdia tuménge.