Read Biblija - Pe Baltitko Romani čib (Romanes) 2019 Baltic Romani Bible Efiesianenge 5 Bible Online

Efiesianenge 5 - Biblija - Pe Baltitko Romani čib (Romanes) 2019 Baltic Romani Bible bible

Efiesianenge 5

¹I paldavá pričhuvén zor te kerén, syr Devél keréla, syr čhavé, savé isyn Léske drieván dróga,

²dživén dre patýv ke javír manušá, syr i Xristóso sykadiá patýv aménge i otdyjá Pes pal aménde, syr gudló khandypen i svénto dyibén, savó isyn lačhó Devléske.

³Ne biladžaipén, ci javír vari-savó magiripén, ci bokhalypen, mek kadaleske te na javél štéto maškír tuménde, syr isyn maškír sventonénde;

⁴i adiáke-pac' bedýtka lavá i čhučó rakiribén i dylynó saben na džála vaš tuménge, fedýr otdén péskiro časo te parikirén Devléske.

⁵Džinén dová, so ni jekh biladžaipnári, ci magirdó, ci bokhaló ke javír fuj réndy (diély), savó isyn sýrby idolóskiro dynári (sluga), léste na javéla paš dro Xristosóskiro Devléskiro kralipén.

⁶Mek nikón te na xohavél tumen čhučé (pustone) lavénca, pal davá javéla Devléskiri xolý pe čhavénde, savé na kandéna.

⁷Na javén khetané adasavé manušénca;

⁸Vari-kiéli tumé sánas dro kalypén (tjomnyma), a kakaná tumé san dud dre Raste-Devléste: dživén syr dudéskire (svetóskire) čhavé,

⁹pal-dová so Duhoskiro barjakirdó (plódo) isyn dro kažno lačhipén, čačipén i patiaibén,

¹⁰udžinén, so trej Devléske;

¹¹sob (kaj) te na javél tuménde nisó khetané dre čhučé kalé (tjomna) réndy, ne fedýr sykavén bang,

¹²pal-dová so, so adasavé manušá keréna čorahanés, ladžavo-isyn te rakiras.

¹³Ne saró davá javéla dyc'lo angíl dud (svéto), pal-dová so dud sykavéla saró, so isyn dyc'lo.

¹⁴Paldavá isyn phendló: “Uštý, kon isyn sutó, i otdžidjov, i javéla te svencynel túke Xristóso.”

¹⁵I paldavá rakhén lačhés, dživén na syr bigodiakire, ne syr god'varé manušá.

¹⁶Rakhén časo (cýro), pal-davá so dalé dyvesá isyn xohané.

¹⁷I na javén dylyné, a fedýr pričhuvén zor te ĥaljon, so Devél užakiréla améndyr.

¹⁸I na p'jen ke matyben mol, savjátyr džála nálačho džiibén, ne fedýr pherdiakiren pes Duhósa,

¹⁹sykliakirén jekh jekhés psalmenca, bahtalé lavénca i Devlytkoné gilienca, bagán i slavinén Ras-Devlés saré iléstyr,

²⁰usady (sak) parikirén pal saró Devléske i Dadéske, vaš amaré Ráskire-Devléskire, Isusóskiro Xristosóskiro lav,

²¹kandén jekh jekhés pir dar angíl Devléste.

²²Džuvliale, kandén peskiren romen syr Ras-Devlés,

²³pal-dová so rom isyn xuláj romniake, syr i Xristóso isyn Khangirjákiro xulái. Jov isyn Zrakhibnari vaš Khangirí pir masá dro dúho (fáno).

²⁴Ne, syr Khangirí kandéla Xristosós, adiáke-pac' i romnienge trej te kandén dro saró péskire romen.

²⁵Muršále, sykavén patýv péskire romniénge adiáke, syr Xristóso sykadiá patýv Khangirjake i otdyjá Pes pe meribén pal láte,

²⁶sob (kaj) te kerél Khangirí sventonasa, te vyžužakirel la paniésa i Devléskire lavésa,

²⁷sob (kaj) Léske te čhuvél angíl Péste Khangirí dro slavno gožyma, dre saví nane ni savó makhipen, ni saví doš, a sob (kaj) joj te javél svénto i bidošengiri.

²⁸Adiáke-pac' i romá isyn bangé te sykavén patýv peskiren romniénge syr péskire masénge: konéske isyn drógo péskiri romný, kodolé manušéske isyn drógo kokoró jov.

²⁹Pal-dová so nijekheske nijékhvar na sys džungaló (brytko) vaš péskiri loč (plot'), ne jov čaravela i tat'kirela les syr i Xristóso Khangirí:

³⁰pal-dová so ame sam pašá Léskire maséndyr; ame sam Léskire ločátyr i Léskire kokalendyr.

³¹“Paldavá mekéla manúš péskire dadés i da, i javéla te dživél péskire romniása, i jone duj javéna sýrby jekh loč.”

³²Kadavá garadó čačipén Sventoné Čhinybnástyr isyn baró; me rakiráva, so davá adiáke-pac' otlydžalape ke Xristóso, syr i ke Khangirí.

³³Ne i adiáke-pac' mek kažno améndyr te sykavél patýv péskire romniáke, syr kokoró péske; i mek džuvlý te darel péskire romestyr.