Read Biblija - Pe Baltitko Romani čib (Romanes) 2019 Baltic Romani Bible Efiesianenge 6 Bible Online

Efiesianenge 6 - Biblija - Pe Baltitko Romani čib (Romanes) 2019 Baltic Romani Bible bible

Efiesianenge 6

¹Čhavorále, kandén peskiren daden, savé isyn Rástyr-Devléstyr, pal-dová so dro davá isyn čačipén.

²“Kutiákir (de patýv) péskires dadés i da”, davá isyn anglatunó zaphenyben dyné lavésa,

³sob (kaj) tu javes bahtaló i te dživés ĥará pe phuv.

⁴I tumé, dadá, na xan péskire čhavorén, ne barjakirén len pir Ráskire-Devléskiro sykliakiribén i prirakhiben.

⁵Pisharjále(raby), kandén péskire xulan pe phuv pir loč, kutiakiribnása (vagása) i darása saré tumaré iléstyr, syr Xristosós;

⁶na kerén davá vaš sykaibén, vaš manušéngiro šaribén, ne syr Xristosóskire pishárja, savé saré péskire iléstyr keréna pir Devléskiri vólia,

⁷dynarinén ilésa saré iléstyr, syr Ráske-Devléske, a na, syr manušénge;

⁸džinén tumé, so kažno manúš, kóli savó keréla lačhipén, to jov davá-pac' i doreséla pale Rástyr-Devléstyr, mek jov te javél pishári ci vól'no.

⁹I tumé, xulajale, adiáke-pac' otlydžanpe šukár ke péskire pishárja i na strahakiren len, džinén, so dro Bolybnáskiro Rajo isyn Xuláj vaš lénge i vaš tuménge i Jov kutiakirela šerá (rávnes) saré manušén.

¹⁰I dro kónco (dro jagóro) miré pšála, me kamám te phenáv tuménge, javén zoraledýr dro jekhipén Rása-Devlésa i Léskire baré zorjátyr.

¹¹Ur'jen pe péste saré Devléskire mardýtko, sob (kaj) tumé mogindlé te terdjon proti nalačheskire frenta rendore (dielycy):

¹²pal-dová so ame sam na proti manušénde, a proti barydyrende i svetóskire thagar'jénde (kniaz'jende), savé xulainena pe davá ciamló (tjómno) svéto, proti benglané dúhi, savé isyn dro Bolybnáskiro svéto.

¹³Paldavá ur'jen saré Devléskire mardytka, sob (kaj), kiéli javéla nálačho dyvés, tumé mogindlé te terdjon proti, i saró te pirizorjakiren i te vyrikiren.

¹⁴I paldavá terdjon saré zorjátyr, podphandenpe simirísa čačipnastyr i ophandén pes patiaibnása syr sastruné ščytosa,

¹⁵i ur'jen péskire ĥerá, sob (kaj) te javén skedyné te džán i te rosphenén bahtalý zan pal ramánjo (miro):

¹⁶Ne fedýr saréstyr, len pésa ščýto patiaibnastyr, savésa tumé moginéna te murdiakiren saré nalačheskire xačkirdé maribnýtka bustiá (striély).

¹⁷I len adiáke-pac' zrakhibnaskiro šliemo, i Duhoskiri kurtála, so isyn Devléskiro lav,

¹⁸i dro kažno časo mangénpe dro Dúho (Fáno) kažnoné patierjasa (molitvasa), adiáke-pac' saró časo mangénpe Devléske pal saré devlytkonene;

¹⁹adiáke-pac' mangénpe Devléske i pal mánde, sob (kaj) mánge te javén dyné lavá, savé trej te rakiráv murškanés garadó čačipén pal bahtalý zan,

²⁰vaš davá me i som bičhadó dre sastyrá, sob (kaj) me te rakiráv murškanés, syr i trej mánge te rakiráv.

²¹Ne sob (kaj) i tumé adiáke-pac' te džinén pal davá, so otlydžalape ke me i pal miré réndy, dová rosphenéla tuménge pal saró Tihiko, amaró drógo pšal i čačunó Ráskire-Devléskiro dynári;

²²savés me i bičhadjom ke tumé vaš dová-pac', sob (kaj) tumé te udžinén pal aménde, i, sob (kaj) jov te podrikirél tumaré ile.

²³Mek te javél ramánjo (miro) pšalénge i patýv ke javír manušá patiaibnása Devléstyr Dadéstyr i Rástyr-Devléstyr, Isusóstyr Xristosóstyr.

²⁴Mek te javél bahtalypén sarénge, kon saré iléstyr rikiréla syr Drógima amaré Ras-Devlés, Isusós Xristosós dro péskiro iló. Amín'.