Read Biblija - Pe Baltitko Romani čib (Romanes) 2019 Baltic Romani Bible Kolosianenge 1 Bible Online

Kolosianenge 1 - Biblija - Pe Baltitko Romani čib (Romanes) 2019 Baltic Romani Bible bible

Kolosianenge 1

¹Pavlístyr, Isusóskire Xristosóskire Apostolostyr, savés vykedyjá Devél, i pšalestyr Ximastyr (Timofiejostyr),

²sventoné i patiaibnytkone pšalénge pir jekhipén dre Isusóste Xristosóste, savé isyn ke Kolosy. Mek te javél bahtalypén i ramánjo (miro) tuménge amaré Devléstyr-Dadéstyr; Rástyr-Devléstyr, Isusóstyr Xristosostyr.

³Ame parikirasa Devléske, amaré Ráskire-Devléskire, Isusóskire Xristosóskire Dadés, kažno mólo, kiéli ame mangasape Devléske pal tuménde,

⁴ame šundiám pal tumaró patiaibén dre Isusóste Xristosóste i pal patýv ke javír manušá, saví tuménde isyn ke saré svénta manušá,

⁵vaš nadiéia, so užakiréla tumen dro Bolybnáskiro Rajo, pal so tumé angledýr šundlé dre čačuné lavá bahtalé zaniatyr (zviesiatyr),

⁶saví javdiá i ke tumé i saví rozdžalape pir saró svéto i janéla bahtiakiribén i barjola, syr i maškír tuménde, dolé-pac' dyveséstyr, kiéli tumé šundlé i udžindlé Devléskiro bahtalypén, savó isyn dro čačipén;

⁷syr tumé vysyklyne Jepafrasostyr, amaré drogoné malestyr-pisharistyr pir butý, savó isyn čačunó Xristosóskiro dynári (služytieljo) vaš tuménge,

⁸savó i rosphendiá aménge pal patýv ke javír manušá, saví Dúho (Fáno) dyjá tuménge.

⁹Paldavá i ame dolé dyveséstyr, syr šundiám pal davá, saró časo mangasape Devléske pal tuménde, i ame mangasa, sob (kaj) Devél te del tuménge te udžinel Léskire vólia, godý i ĥalyibén, so déla Svénto Dúho (Fáno).

¹⁰Sob (kaj) tumé te dživén, syr isyn lačhó Devléske, i dro saró te kerén kučes Léske, i te kerén lačhipén dre saré réndy i te udžines butýr pal Devléste,

¹¹sob (kaj) Léskiri bari zor te del tuménge i te kerél tumen zoralenca, voliakirenca i bahtalenca,

¹²parikirí Dadéske, Savó khardiá tumen ke dud khetané saré sventoné manušénca,

¹³Savó zrakhciá amen kamlypnaskire (ciamlypnaskire) zorjátyr i jandiá dro Léskire-Drogoné Čhavéskiro Kralipén:

¹⁴Savó vykindia (vyrakhcia) amen Péskire Ratésa i otmekciá amaré gréhi;

¹⁵Hristóso isyn Devléskiri patrín (óbrazo). Jov sykavéla Péskire andratuné čačipnása nabiciale Devlés. Xristóso sys bijandlo angledýr saréstyr, so sys sozdynó;

¹⁶pir Léste Devél sozdyjá saró pe bolybén i pe phuv, saró, so isyn dyc'lo (bicialó) i dová, so nane dyc'lo, ci trony, kaj králja isyn bešté, ci khieningi, ci baré raja, ci svetoskiro zoralypén; saró pir Léste i vaš Léske isyn sozdynó.

¹⁷I Jov Kokoró sys angledýr saréstyr, syr saró, so sys sozdynó, isyn dro jekhipén Lésa i pir Léste saró rikirélape.

¹⁸Jov isyn Khangirjákire — Duhoskiro Šeró, Jov isyn Anglatunó, Jekh, Savó otdžidyjá, sob (kaj) Léske te rikirél upralypén dro saró:

¹⁹pal-dová so davá sys lačhó Dadéske, sob (kaj) dre Čhavéste te javél saró Devléskiro pherdypen,

²⁰i sob (kaj) pir Léste te kerél ramánjo (miro) Pésa dro saró, so isyn pe phuv, i dová, so isyn pe bolybén, Léskire-Čhavéskire ratésa, savó Jov pročhudia pe trušúl.

²¹I tumen, savé sánas vari-kiéli dur Devléstyr i vérgi Devléske, kiéli tyrdyja tumen te kerén bedytka réndy.

²²Ne kakaná Devél kerdiá ramánjo (miro) tuménca, kiéli Xristóso Péskire masengire ločasa progijá pir meribén, sob (kaj) te čhuvén tumen angíl Léste sventonenca, i bibangiakirenca i bidošakirenca,

²³kóli tumé san zoralé dro dúho (fáno) te dživén pir patiaibén i na otdžana dre nadiéia bahtalé zaniatyr (zviesiatyr), saví tumé šundlé, i saví rosphenelape pir saró džidó, so sys sozdynó tel bolybén, saví Me, Pávli, lyjom te rosphenav.

²⁴Kakaná me radynavape dre miré mén'ki pal tuménde, kóli Xristosóskire mén'ki na uhtyldé mánge, tedy len me dočhuvava miré ločasa vaš Léskire mén'ki Léskire Masenge, Save isyn Khangirí.

²⁵Me jacjom Devléskire-khangirjákiro dynarisa pir Devléskiro zadyiben, savó Jov dyjá mánge vaš tuménge, sob (kaj) me te keráv saró pir Léskiro lav;

²⁶davá isyn garadó čačipén, savó sys nadžindlo manušénge saré rodendyr i viekendyr, ne kakaná Devél sykadiá Péskire manušénge;

²⁷savénge kamdiá Devél te piridel džinybén, savó isyn slavakiro barvalypén maškír Najudénde dro kadavá garadó čačipén, savó isyn Xristóso dre tuménde, Jov isyn tumarí nadiéia dre sláva:

²⁸Saveskiro lav ame rosphenasa, ame dasa godý kažnoné manušéske i sykliakirasa kažnoné džinybnaske, sob (kaj) ame te čhuvas kažnoné stalone patiaibnaskires dro jekhipén Xristosósa.

²⁹Vaš davá i me adiáke-pac' keráva butý i keráva Léskire zorjása, saví isyn mánde Léstyr, i saví keréla butý dre mánde.