Read Biblija - Pe Baltitko Romani čib (Romanes) 2019 Baltic Romani Bible Kolosianenge 2 Bible Online

Kolosianenge 2 - Biblija - Pe Baltitko Romani čib (Romanes) 2019 Baltic Romani Bible bible

Kolosianenge 2

¹Me kamám, sob (kaj) tumé te džinén, syr me maravpe pal tuménde i pal odolénde, savé dživéna ke Laodikija i pal sarénde, savé na dykhné man, savó me som,

²sob (kaj) léngire ile te javén podrikirde, sob (kaj) jone te javén khetané dre patýv ke javír manušá vaš kažno barvalypén, te udžinén pherdés Devléskiro garadó čačipén pal Xristosóste,

³dre Savéste isyn garadó saró kučipén pir god'varipen i pir džinybén.

⁴I me phenáva davá vaš dová, sob (kaj) nikón te na xohavél tumen péskire xohané lavénca.

⁵Mek me na som tuménca kakaná, ne me som tuménca miré duhósa.

⁶Paldavá, syr tumé udžindlé Isusós Xristosós syr Ras-Devlés, adiáke tumé i dživén dro jekhipén Lésa,

⁷Javén bi kunipnaskire (tvarda) dre Léste i barjon pir patiaibén dre Léste, syr tumen sykliakirdé, jačénpe dre patiaibén parikiribnasa.

⁸Dykhén kučes, sob (kaj) nijékh te na zlydžal tumen patiaibnastyr filosofijasa i xohaibnasa, savé pridumindle manušá, i savé sčhude pe svetóskire dúmy, a na pe Xristosóskiro sykliakiribén.

⁹Pal-dová so dre Léste dživéla Devlýtko pherdypen dre manušýtka masá pir dúho (fáno),

¹⁰i tuménde isyn pherdó džiibén dro jekhipén Lésa, Savó isyn Šeraló pe saré baré rande i svetoskiro zoralypén,

¹¹dro jekhipén Lésa tumé sánas občhindlé na manušytkoné vasténca, kiéli lenape krig grehoskire ločakire masá občhinybnasa, a Xristosóskire-duhóskire občhinybnasa;

¹²kiéli tumé boldepe, to tumé sýrby myné khetané Lésa, dre Léste tumé i otdžidyne pir patiaibén dre Devléskiri zor, Savó otdžidiakirdiá Xristosós muléndyr.

¹³I tumen, savé sys mulé dre tumaré gréhi i dre tumaré-ločakiro občhinyben, Devél otdžidiakirdiá khetané Lésa i otmekciá amaré saré gréhi;

¹⁴Jov otparudia sykliaibnasa saré priphenybená Zakonóstyr, so sys čhindlé vastésa, savé sys proti aménde, i Jov ukedyja davá saró, i primardia les ke trušúl;

¹⁵Hristóso otkedyja zor baré randyr i svetóskire zoralypnastyr i otdyjá len pe manušýtko ladž, i trušuleskire zorjása lyjá zor pe lénde.

¹⁶Mek nikón te na sendinel tumen pal xabén ci pal pibén, ci pal vari-savó svénko, ci sávato (subóta),

¹⁷Saró davá isyn sýrby zer (tienjo) doléstyr, so javéla angíl, ne čačipén isyn dre Xristosóskire Masá.

¹⁸Mek nijékh te na zlydžal tumen péskire xohané kandypnasa i mangipnasa Jangolenge, i savó patiála dro dová, so jov na dykhciá, — dasavé manušá phutjona ivjá (darmes) péskire manušytkoné god'varipnasa,

¹⁹i jone na rikirenape pal Xristosóste, Savó isyn Šeró sarénge, Savó rikirlape i čaliakirelape Péskire džidé sphandypnasa i pašenca, i, Savó barjola adiáke, syr trej Devléske.

²⁰Kóli tumé myné khetané Xristosósa vaš dalé svetóskire-džiibnytka prisykliaibena, tedy sóske tumé usajékh adiáke-pac' sphandena pes manušytkoné priphenybnenca?

²¹“Na ker, na xa, na le”,

²²saró davá kokoró péstyr xasiakiréla zor: pal-dová so saró davá isyn pir manušýtko priphenybén i sykliakiribén,

²³Davá lénde isyn jekh dyc'lo god'varipen dro manušéngiro vydumindlo dynaribén, dro xohanó kandypen i péskire-masengire mén'ki, ne jone isyn ničý na mol te obrikiren léngire-ločakiro vykedyiben.