Read Biblija - Pe Baltitko Romani čib (Romanes) 2019 Baltic Romani Bible Kolosianenge 3 Bible Online

Kolosianenge 3 - Biblija - Pe Baltitko Romani čib (Romanes) 2019 Baltic Romani Bible bible

Kolosianenge 3

¹I adiáke, kóli tumé otdžidyne muléndyr Xristosósa, tedy pričhuvén zor te dživén pir čačipén, savó isyn dro Bolybnáskiro Rajo, kaj Xristóso isyn beštó pir čačó (pravo) vast Devléstyr Dadéstyr.

²Duminen (den godý péske) pal dová, so isyn dro Bolybnáskiro Rajo, ne na pal dová, so isyn pe phuv.

³Pal-dová so tumé myné vaš davá svetoskiro džiibén i kakaná tumaró džiibén isyn garadó Xristosósa dre Devléste.

⁴Kiéli javéla Xristóso, dre Savéste isyn tumaró džiibén, tedy i tumé javéna khetané Lésa dre sláva.

⁵Muliakirén tumaré nalačhé phuvitka réndy: džiibén dro bléndo, magiripén, tyrdypén ke grého, nalačhé mysli i zevlynypén, saró davá isyn dynaribén idolénge.

⁶Paldavá i javéla Devléskiri xolý pe odolé manušénde, savé Les na kandéna.

⁷Vari-kiéli i tumé adiáke-pac' kerdé, kiéli tumé dživdé dre kadalé gréhi.

⁸Ne kakaná tumé mekén saró: xoliakiribén, mižehipen (jaros'), obrakiriben, ladžaipnytka lavá te na phenén tumaré uštá.

⁹Na xohaven jekh jekhéske, pal-dová so tumé otphendlepe phurané péskire džiibnastyr saré léskire rendénca.

¹⁰Tumé pirikerde péskiro phuranó džiibén pe nevó, savó jačélape nevó pir džinybén pal Kodoleste, Savó sozdyjá les pir Péskiri patrín (óbrazo);

¹¹paldavá nane butýr ni Jelinos (Balames), ni Judos, ni občhinyben, ni naobčhinyben, ni bedone-nacyjakire manušés, ni Skifos, ni dynarís, ni vol'none manušés, ne saró i dro saró isyn Xristóso.

¹²I paldavá pirikeren pes dre manušénde, savén Devél vykedyjá: javén svénta, dróga, javén tangipnýtka i lačhé-ilytka, bišaribnaskire, kovlé-ilýtka, dlugone vyrikiribnasa;

¹³iavén kovlé jekh ke jekh i primangen jekh jekhéske, kóli vari-kon pe vari-konéste rikiréla xolý; to syr Xristóso primangdia tuménge, adiáke-pac' i tumé kerén.

¹⁴Ke saró davá dočhuven patýv ke javír manušá, saví isyn fundámiento vaš čačunó sarengiro khetaniakiriben.

¹⁵I mek te javél dre tumaré ile Devléskiro ramánjo (miro), ke savó tumé sánas khardé syr pašá Jekhe Masendyr, parikirén pal davá.

¹⁶Mek te dživél dre tuménde saré barvalypnasa Xristosóskiro lav, kiéli tumé sykliakiréna i déna godý jekh jekhéske psalmenca, lačhé lavénca, devlytkoné gilienca, bagán Devléske parikiribnasa dre tumaré ile.

¹⁷I saró, sob (kaj) tumé te na kerén, lavésa ci rendosa, saró kerén vaš Ráskiro-Devléskiro, Isusóskire Xristosóskiro lav, parikirén Devléske Dadéske pir Léste.

¹⁸Džuvliale, kandén Peskiren romen, syr davá trej te javél dre Raste — Devléste.

¹⁹Muršále, javén lačhé ke Péskire romniá, i na javén pharé lénca.

²⁰Čhavé, kandén péskire daden dro saró, pal-dová so davá trej Ráske Devléske.

²¹Dadole, na ĥazdén xolý dre péskire čhavénde, sob (kaj) jone te na perén dro dúho (fáno).

²²Pisharjale, kandén dro saró péskire phuvjákire xulan dre loč, dynarinén (služynen) lénge, na vaš dová, sob (kaj) te šarén manušá, ne kerén davá saré iléstyr.

²³I saró, so tumé keréna, kerén saré iléstyr, syr vaš Ráske-Devléske, ne na, syr vaš manušénge,

²⁴i džinén, so Raj Devél otdéla lačhipnása tuménge, so Jov skedyjá vaš Péskire manušénge; pal-dová so tumé dynarinena Ráske-Devléske Xristosóske.

²⁵Paldová so, kon keréla fuipén, doreséla kára pal fuipén, so jov kerdiá, na dykhí pe davá, kon adavá manúš isyn.