Read Biblija - Pe Baltitko Romani čib (Romanes) 2019 Baltic Romani Bible 1 Fiesalonikiicenge 3 Bible Online

1 Fiesalonikiicenge 3 - Biblija - Pe Baltitko Romani čib (Romanes) 2019 Baltic Romani Bible bible

1 Fiesalonikiicenge 3

¹Pal-dová so ame na mogindiam butýr te vyrikiras, ame zakamdiam te jačaspe ke Afiny jekhdžine,

²i bičhadiam Ximas, amaré pšalés i males pir butý te rosphenel Xristososkiri bahtalý zan (zvies'), sob (kaj) jov te podrikirél zoraledýr tumen i te podrikirél tumaró dúho (fáno) dro patiaibén,

³sob (kaj) nijékh tuméndyr te na kuninelpe dre dalé bidy: pal-dová so tumé kokoré džinéna, so aménge adiáke treindiá te javél pir Devléskiri vólia;

⁴pal-dová so, kiéli ame sámas ke tumé, zaĥaredyr rakirdiam tuménge, so aménde javéla bari bída, syr i vygijá, i tumé kokoré džinéna pal davá.

⁵Pal-dová i me adiáke-pac' na mogindjom te vyrikirav butýr i bičhadjom Ximas te udžinel pal tumaró patiaibén, sob (kaj) te na zlydžal tumen nálačho i sarí amarí butý vaš Devléske te na javél ivjá (naprásnes).

⁶Ne kakaná, kiéli Xima javdiá tuméndyr ke ame, jov rosphendiá aménge lačhó nevipen pal tumaró patiaibén i patýv ke javír manušá, i so tumé saró časo ripirena pal aménde, i adiáke-pac' nevéstyr kaména te dykhén amen, syr i ame tumen,

⁷Tedy, pšalále, ame sámas drieván podrikirde pir tumaró patiaibén dre amarí bída i pharó džiibén,

⁸Paldavá ame kakaná sam čačunés džidé, kóli tumé san tvardes terdé dro tumaró patiaibén dre Raste-Devléste.

⁹Pal-dová so, syr kakaná ame moginasa te parikiras Devléske pal tuménde, pal sarí rádyma, savjása ame radynasape pal tuménde angíl amaré Devléste,

¹⁰rat i dyvés ame mangasape Devléske pal-dová, sob (kaj) nevéstyr te dykhaspe tuménca i butýr te das dová, so na uhtýlla tumaré patiaibnaske.

¹¹Ne mek amaró Devél i Dad Kokoró i amaró Raj Devél, Isúso Xristóso te čhuvél drom aménge ke tumé.

¹²Ne mek Raj Devél te pherdiakirel tumaró iló jekh ke jekh i ke saré manušá iščo (inké) baredýr laskasa, saví aménde isyn ke tumé,

¹³sob (kaj) te podrikirél tumaré ile te javén tumé bidošakire i svénta angíl amaré Devléste i Dadéste, kiéli javéla amaró Raj Devél, Isúso Xristóso saré Péskire sventonenca. Amín'.