Read Biblija - Pe Baltitko Romani čib (Romanes) 2019 Baltic Romani Bible 1 Fiesalonikiicenge 4 Bible Online

1 Fiesalonikiicenge 4 - Biblija - Pe Baltitko Romani čib (Romanes) 2019 Baltic Romani Bible bible

1 Fiesalonikiicenge 4

¹Pšalále, kakaná ame mangasa i primangasa tumen vaš Isusóske Xristosóske, so dová, so kakaná tumé vysyklyne améndyr, syr trej te dživén i te kerén pir čačipén Devléske, sob (kaj) adiáke i duredýr te dživén.

²Tumé džinéna, savé priphenybená ame dyjam tuménge amaré Rástyr-Devléstyr Isusóstyr.

³Devél vykedéla, sob (kaj) tumé te javén svénta i te rakhénpe džiibnastyr bi sovlakiro;

⁴sob (kaj) kažno manúš tuméndyr te džinél, syr te zrikirel péskiro khoró nalačhé tyrdypnastyr dre svyntyma i žužypen (čystota),

⁵i te na poddenpe grehitkoné tyrdypnaske, syr davá keréna Náiudy, savé na džinéna Devlés,

⁶sob (kaj) nijékh tuméndyr te na kerél čoripén péskire pšaléske i te na barvaljol pal léskiro dopatiaiben, pal dalé gréhi Devél čhuvéla kára, syr angledýr ame rakirdiam tuménge i dophenasas.

⁷Devél khardiá amen na ke nažužo džiibén, ne ke čačunó.

⁸I kóli vari-kon na priléla davá sykliakiribén, jov priléla na, so manušés, a Devlés, Savó i dyjá tuménge Péskiro Svénto Dúho (Fáno).

⁹Me ginava, so pal pšalengiri patýv na trej tuménge butýr te čhinav, pal-dová so Devél sykliakirdiá tumen kokoren te sykavén patýv jekh jekhéske.

¹⁰Tumé adiáke-pac' i keréna sarénge péskire pšalénge pir sarí Makiedonija; ne ame primangasa tumen, pšalále, te kerén adiáke butedýr;

¹¹i te pričhuvén zor te dživén štylés, te dykhén kažno péskiro réndo, i te kerén butý péskire vasténca, syr ame rakirdiam tuménge angledýr;

¹²te dživén patyvales adiáke, sob (kaj) manušá, savé isyn nadevlytka, te kutiakiren tumen, i sob (kaj) tumé te na javén vužle ni dro so javire manušénge.

¹³Pšalále, me kamám, sob (kaj) tumé te džinén saró čačipén, pal manušénde, savé myné, sob (kaj) tumé na tuginen, syr javír manušá, savénde nane nadiéia pal viéčno džiibén.

¹⁴Ne kóli ame patiása, so Isúso myjá i otdžidyjá muléndyr, tedy i manušén, savé myné patiaibnása dre Isusóste, Devél janéla pale khetané Lésa.

¹⁵Ame rakirasa davá tuménge Ráskire-Devléskire lavésa, so ame, savé javása džidé ke / žýko Xristosóskiro javiben, usajékh na javása angledýr odoléndyr, kon myjá;

¹⁶pal-dová so Raj Devél Kokoró javéla Bolybnáskire Rajostyr i Léskiro javiben sykavéla sarénge te šunén Arhangieloskiri zan, zoralý syr Devléskiro rógo (truba), i kon pérvo myjá patiaibnása dre Xristosóste, otdžidjola muléndyr;

¹⁷tén'či ame, seve javéna džidé dro dová časo, javása ĥazdyné phuvjátyr, khetané lénca pe óbloki te streninas (te pirilas) Ras-Devlés i ame saró časo javása khetané Lésa.

¹⁸Podrikiren jekh jekhés dalé lavénca.