Read Biblija - Pe Baltitko Romani čib (Romanes) 2019 Baltic Romani Bible Isúso 10 Bible Online

Isúso 10 - Biblija - Pe Baltitko Romani čib (Romanes) 2019 Baltic Romani Bible bible

Isúso 10

¹I sys adiáke: kiéli Adonisiedeko, Jerusalimoskiro králi, šundiá, so Isúso lyjá Gajo i otdyjá les sovlahake (prokošybnaske), i so adiáke-pac' kerdiá Gajosa i léskire kralísa, syr kerdiá Jerihonosa i léskire kralísa, i so Gavaonoskire manušá kerdé ramánjo (miro) Izrailjosa i jačnépe te dživén maškír lénde,

²to tedy jov zoralés strahadyja, pal-dová so Gavaóno fóro sys baró, syr jekh kralískire for'jéndyr, i sys baredýr Gajostyr, i saré manušá léskire sys muršarja.

³Paldavá o Adonisiedeko, králi Jerusalimoskiro, bičhadiá ke Gogamo, Xievronoskiro králi, i ke Firamo, Iarmufoskiro králi, i ke Jafijo, Lahisoskiro králi, i ke Dieviro, Jeglonoskiro králi, sob (kaj) te phenén:

⁴“Javén ke me, i den vast mánge te xasiakiráv Gavaóno, pal-dová, so jov kerdiá ramánjo (miro) Isusósa i Izrailjoskire čhavénca”.

⁵Jone skedynépe, i giné pandž Amoriejéngire králja: Jerusalimóskire králi, Xievronoskiro králi, Iarmufoskiro králi, Lahisoskiro králi, Jeglonoskiro králi, jone i saré léngire manušá, i terdiné stanósa pašýl Gavaóno, sob (kaj) te džán maribnása proti léste.

⁶Manušá Gavaonoskire bičhadé ke Isúso dro stáno Izrailjoskiro, dro Galgálo, te phenén. “Na otle vast tyró tyré pishar'jendyr, jav ke ame sygnedyr, zrákh amen i pomogin aménge; pal-dová so skedynépe proti aménde saré Amoriejéngire králja, savé dživéna pe bérgi”.

⁷Isúso gijá Galgalostyr kokoró, i lésa saré manušá, savé sys lačhé ke maribén, i saré muršá murškané.

⁸I phendiá Raj Devél Isusóske: “Na dar léndyr, pal-dová so Me otdyjom len dre tyré vastá: nikón léndyr na vyterdjola angíl muj tyró”.

⁹I javdiá pe lénde Isúso naužakirdes, pal-dová so sarí rat gijá jov Galgalostyr.

¹⁰Raj Devél jandiá len dro dar angíl Izrail'tianende, i jone domardé zoralés len dre Gavaóno, i tradyne len pir drom ke Vieforonoskiro vučipén, i mardé len ke Azieko i ke Makiedo.

¹¹Kiéli jone našné Izrail'tianendyr pir Vieforonskone-bergákiro zmekiben, to Raj Devél čhurdyjá pe lénde bolybnástyr baré bará až ke Azieko, i jone pomyne; butýr sys odoléndyr, savé myné barengire čhuibnastyr, syr kodolendyr, savén muliakirdé Izrailjoskire čhavé kurtalása.

¹²Isúso rakirdiá ke Raj Devél dre dová-pac' dyvés, dro savó otdyjá Raj Devél Amoriejos dre vastá Izrailjoske, kiéli domardiá len dro Gavaóno, i jone domardé sys angíl Izrailjoskire-čhavéngiro jakhá, i phendiá angíl Izrail'tianende: “Terdjov, kham, pe Gavaóno, i čhon, pe dólo Aialonoskiro!”

¹³I terdijá kham, i čhon sys terdó, paka manušá othanas (otomstinenas) pale péskire vergénge. Ci na davá sys čhindló dre lylvarí “Čačipnaskireskiri”: ‘Terdó isyn kham maškirál bolybén i na sygniakirdiape ke zagiibén saró dyvés?’

¹⁴I na sys dasavo dyvés ni angledýr, ni paló davá, dre savó Raj Devél adiáke šundiá by manušéngiri zan. Pal-davá so Raj Devél mardiápe pal Izrailjo.

¹⁵Korigedýr risijá Isúso i saró Izrailjo lésa pozže dro stáno, dro Galgálo.

¹⁶A odolé pandž králja našné, i garadyne dre ĥiebár (pieščera) dro Makiedo.

¹⁷Kiéli jandlo sys Isusóske i phendló: “Lathnepe pandž králja, jone garadjona dre ĥiebár (pieščera) dro Makiedo”,

¹⁸to phendiá Isúso: “Pričhurden baré bará ke ĥebarakiro (pieščerakiro) zagiibén, i čhuvén ke joj manušén te rakhén len.

¹⁹A tumé na terdjon, a tradén tumaré vergén, i muliakirén palatuny paš léngire xaladendyr, i na den lénge te džán dre léngire fórja; pal-dová so Raj Devél, Devél tumaró, otdyjá len dre tumaré vastá”.

²⁰Paló davá, syr Isúso i čhavé Izrailjoskire sarésa domardé len drieván zoralés, i, savé jačnépe džidé léndyr, našné dre fórja zoralé tynénca,

²¹to saré manušá risiné dro stáno ke Isúso dro Makiedo ramanjosa (mirósa), i nikón Izrailjoskire čhavéndyr na riskirdiá péskire čibása.

²²Tedy Isúso phendiá: “Otčhakiren zagiibén ke ĥiebár, i vylydžan ke me látyr pandžen odolén kral'jén”.

²³Adiáke i kerdé: vylydžiné ke jov ĥiebaratyr (pieščeratyr) pandžen odolén kral'jén: Jerusalimóskire kralís, Xievronoskire kralís, Iarmufoskire kralís, Lahisoskire kralís i Jeglonoskire kralís.

²⁴Kiéli vylydžiné adalen kral'jén ke Isúso, to Isúso khardiá ke pe sarén Izrail'tianén i phendiá xaladéngire šeralenge, savé psirdé lésa: “Poddžan, terdjon tumaré gerenca pe menia dalé kral'jenge”. Jone podginé i terdiné péskire ĥerénca pe léngire menia.

²⁵Isúso phendiá lénge: “Na darén i na strahadjon, javén zoralé i bidaripnaskire; pal-dová so adiáke keréla Raj Devél saré tumaré vergenca, savénca javéna te marénpe”.

²⁶Korigedýr (pozžedýr) domardiá len Isúso, i muliakirdiá len, i ubladia len pe pandž vešyny; i sys ublade jone pe vešyny ke bel'vél'.

²⁷Syr zagijá kham, to priphendiá Isúso, i zlyne len vešynendyr, i čhurdyné len dre ĥiebár, dre saví jone garadyne, i pričhurdyne baré bará ke ĥebarakiro zagiibén, savé odój isyn jone až ke davá dyvés.

²⁸Dro dová-pac' dyvés lyjá Isúso Makiedo, i domardiá les kurtalása i léskire kralís, i otdyjá prokošybnaske len i saró džidó, so sys dre léste; nikonés na jačkirdiá, kon by jaciápe džidó; i kerdiá adiáke-pac' Makiedoskire kralísa, syr kerdiá Jerihonoskire kralísa.

²⁹I gijá Isúso i saré Izrail'tiáni lésa Makiedostyr ke Livna, i mardépe proti Livna;

³⁰i otdyjá Raj Devél i la dre Izrailjoskire vastá, i lákire kralís, i tradyjá krig la Isúso kurtalása i saró džidó, so sys dre láte: nikonés na jačkirdiá dre láte, kon by te jačélpe džidó. I kerdiá adiáke-pac' lákire kralísa, syr kerdiá Jerihonoskire kralísa.

³¹Livnatyr gijá Isúso i saré Izrail'tiáni lésa ke Lahiso; i terdiné nádur léstyr stanósa, i mardépe proti léste;

³²i otdyjá Raj Devél Lahiso dre Izrailjoskire vastá, i lyjá jov les pe javír dyvés, i domardiá les kurtalása i saró džidó, so sys dre léste adiáke, syr kerdiá Livnasa.

³³Tedy javdiá te pomoginel (te podrikirél) Lahisoske o Goramo, Gazieroskiro králi; ne Isúso domardiá les i léskire manušén kurtalása adiáke, so nikonés léste na jačkirdiá, kon by te jačélpe džidó.

³⁴I gijá Isúso i saré Izrail'tiáni lésa Lahisostyr ke Jeglono, i terdiné nádur léstyr stanósa, i mardépe proti léste.

³⁵I lyné les dro dová-pac' dyvés i domardé les kurtalása, i saró džidó, so sys dre léste dre dová-pac' dyvés, i otdyjá jov sovlahake, syr kerdiá Lahisosa.

³⁶I gijá Isúso i saré Izrail'tiáni lésa Jeglonostyr ke Xievróno, i mardépe proti léste.

³⁷I lyné les, i domardé les kurtalása, i kralís leskires, i saré fórja léskire, i saró džidó, so sys dre léste; nikonés na jačkirdiá, kon by te jačélpe džidó, syr kerdiá jov i Jeglonosa: otdyjá sovlahake les i saró džidó, so sys dre léste.

³⁸Korigedýr (pozže) gijá Isúso i saró Izrailjo lésa ke Daviro i mardiápe proti léste.

³⁹I lyjá les, kralís leskires, i saré léskire fórja, i domardé len kurtalása, i otdyné sovlahake saró džidó, so sys dre léste; nikonés na jaciápe, kon by jaciápe džidó. Syr kerdiá Xievronosa i léskire kralísa, adiáke kerdiá Davirosa i kralísa leskiresa, i syr kerdiá Livnasa i léskire kralísa.

⁴⁰I domardiá Isúso sarí bergitko i paš-dyvesýtko (poludjono) phuv, i telatuné štéty, i phuv, saví isyn pašýl bérgi, i sarén lakiren kral'jén; nikonés na jačkirdiá, kon te jačélpe džidó, i saró džidó otdyjá sovlahake, syr rakirdiá Raj Devél, Devél Izrailjoskiro.

⁴¹I domardiá len Isúso Kadies-Varnatyr ke Gaza, i sarí phuv Gošen až ke Gavaóno;

⁴²sarén kral'jén dalen i léngiri phuv Isúso lyjá jekhe molostyr, pal-dová so Raj Devél, Devél Izrailjoskiro, mardiápe pal Izrailjo.

⁴³Korigedýr (pozže) Isúso i saré Izrail'tiáni lésa risiné dro stáno, dro Galgálo.