Read Biblija - Pe Baltitko Romani čib (Romanes) 2019 Baltic Romani Bible Isúso 11 Bible Online

Isúso 11 - Biblija - Pe Baltitko Romani čib (Romanes) 2019 Baltic Romani Bible bible

Isúso 11

¹Syr šundiá davá Iavino (Javino), Asoroskiro králi, to bičhadiá ke Iovavo, Madoroskiro králi, i ke Šimronoskiro králi, i ke Ahsafoskiro králi,

²i ke králja, savé dživdé pe paš-ratítko rig pe bérga i pe loščýna paš-dyvesytkoné Xinarofoskire rigátyr, i pe telatuné štéty, i dre Nafof-Dora ke zapado,

³ke Xananiei, savé dživdé ke vastóko i ke mórjo (derjáv), ke Amoriei i Xitiei, ke Fierieziei i ke Jevusiei, savé dživdé pe bérga, i ke Jeviei, savé dživdé nádur Jermonostyr pe phuv Masífa.

⁴I vyginé jone i saré léngire otriády (opolčenii) lénca, but manušá, savén sys adiáke but, kicý isyn práho pe morjoskiro (derjavéskiro) brégo; i gren i maribnýtka vurdyná sys drieván but.

⁵I skedynépe saré dalé králja, i javné i terdiné stanósa khetané pašýl Mieromoskire paniá, sob (kaj) te marénpe Izrailjosa.

⁶Ne Raj Devél phendiá Isusóske: “Na dar léndyr, pal-dová so atasiá, pašýl davá časo, Me otdáva len sarén pe maribén čhavénge Izrailjoskirenge; grenge lengirenge piričhin žyly i vurdyná léngire shačkir jagása”.

⁷Isúso i lésa saré manušá, savé sys lačhé pe maribén, sýges vyginé pe lénde ke Mieromoskire paniá i pyné pe lénde.

⁸I otdyjá len Raj Devél Izrail'tianenge dre vastá, i domardé jone len, i tradyne len ke baró Sidono, i ke Misriefof-Maima, i ke dólo Micfa ke vastóko, i pirimarde len adiáke, so nikonés léndyr na jaciápe, kon by te javél džidó.

⁹I kerdiá Isúso lénca adiáke, syr phendiá léske Raj Devél: léngire grenge jov piričhindia žyly i léngire maribnýtka vurdyná shačkirdiá jagása.

¹⁰Dre dová-pac' časo, Isúso risijá, lyjá Asoros i léskire kralís zamardiá kurtalása (Asoro angledýr sys saré dalé-kralipnaskire šeralesa);

¹¹i pirimarde jone saró džidó, so sys dre léste, kurtalása, otdyi sovlahake (prokošybnaske); na jaciápe nijékh džidó di; a Asoro shačkirdiá jov jagása.

¹²I saré dalengire-kral'jengire fórja i sarén kral'jén lengiren lyjá Isúso, i domardiá kurtalása, otdyi len sovlahake, syr rakirdiá Mójza, Ráskiro-Devléskiro pishári;

¹³ne saré fórja, savé sys pe vučipén, na xačkirdé Izrail'tiáni, apríč jekhe Asoro, savó shačkirdiá Isúso.

¹⁴A saró doresybén (dobyča) dalé for'jengiro i kheritkoné murdalén (skoto) rosčorde Izrailjoskire čhavé péske; manušén sarén pirimarde kurtalása adiáke, so protradyne sarén len: na jačkirdé nijékh di.

¹⁵Syr priphendiá Raj Devél Mojzáske, Péskire pisharíske, adiáke Mójza priphendiá Isusóske, a Isúso adiáke i kerdiá: na otgijá ni jekhe lavéstyr dro saró, so priphendiá Raj Devél Mojzáske.

¹⁶Adiáke Isúso lyjá sarí daja phuv pe bérgicy, sarí phuv paš-dyvesýtko (poludjono), sarí phuv Gošen i telatuné štéty, i loščýna i bérga Izrailjoskiri, i telatuné štéty,

¹⁷bergátyr Xalako, saví zalela štéto ke Sieiro, ke Vaal-Gado pe Livanoskiro dólo, pašýl Jermonoskiri bérga, i sarén léngire kral'jén lyjá, i domardiá len, i muliakirdiá len.

¹⁸Dlugo časo Isúso lydžijá maribén saré adalé kral'jenca.

¹⁹Na sys fóro, savó kerdiá by ramánjo (miro) Izrailjoskire čhavénca, apríč Jeviejende, savé dživdé ke Gavaóno: saré lyné jone maribnása;

²⁰pal-dová so Rástyr-Devléstyr sys dová, so jone xoliakirde iló péskiro i maribnása strenindle Izrailjo, vaš dová, sob (kaj) te javén otdyné sovlahake i sob (kaj) te na javél lénge otmekiben, ne, sob (kaj) te javén protradyne adiáke, syr priphendiá Raj Devél Mojzáske.

²¹Dro dová-pac' časo javdiá Isúso i domardiá Jenakimen pe bérga, dro Xievróno, dro Daviro, dre Anava, pe sarí Judaskiri bérga i pe sarí Izrailjoskiri bérga; léngire for'jenca otdyjá len Isúso sovlahake;

²²na jaciápe nijekhes Jenakimostyr manušés pe Izrailjoskire-čhavengiri phuv; jaciápe jekh dro Gazo, dro Giefo i dro Azoto.

²³I adiáke lyjá Isúso sarí phuv, syr rakirdiá Raj Devél Mojzáske, i otdyjá la Isusóske dre mištypnáskiri miéra Izrail'tianenge, pir dová, syr phuv roskerdiape maškirál léngire ródycy. I štylyja phuv maribnastyr.