Read Biblija - Pe Baltitko Romani čib (Romanes) 2019 Baltic Romani Bible Isúso 13 Bible Online

Isúso 13 - Biblija - Pe Baltitko Romani čib (Romanes) 2019 Baltic Romani Bible bible

Isúso 13

¹Kiéli Isúso phurija, i zagijá dre phuré beršá, tedy Raj Devél phendiá léske: “Tu phurijan, zagijan dre phuré beršá, a phuv te les dre meknó mištypén jačélape iščo (inké) drieván but.

²Ĥáda, saví jačélape phuv: sarí provincyja pašýl Filistimo i sarí Giesuroskiri phuv.

³Sihorostyr, so isyn angíl Jegípto ke miéža Jekronoskiri ke paš-ratítko (sievierno rig), dalé phuvjá ginenape Xanaanskonenca, pe savé isyn pandž xulaja Filistimoskire: Gazsko, Azotsko, Askalonsko, Giefsko, Jekronsko i Avieisko;

⁴ke paš-dyvés (jugo) sarí Xanaanóskiri phuv Miearatyr Sidonskonatyr ke Afieko, ke Amoriejéngire rigá,

⁵adiáke-pac' phuv Gievaloskiri i saró Liváno ke khameskiro ŭzgiiben Vaal-Gado, so isyn pašýl Jermonoskiri bérga, ke zagiibén dre Jemafo.

⁶Sarén bergitkonen manušén Livanostyr ke Misriefof-Maimo, sarén Sidonianen Me vytradava Izrailjoskire-čhavéngire móstyr; rozde la dre mištypnáskiri miéra Izrailjoske, syr Me rakirdjom túke;

⁷rozde daja phuv dre mištypnáskiri miéra jeniá rodycenge i pašake Manasijáskire rodycóske.

⁸A ródyco (čang) Ruvimoskiro i Gadoskiro javire pašésa Manasijáskire rodycosa doresné péskiri mištypnáskiri miéra Mojzastyr pal Iordáno ke vastóko, syr dyjá lénge Mójza, Ráskiro-Devléskiro pishári,

⁹Aroierostyr, savó isyn pe brégo Arnonoskire rekicakiro (lenorjakiro), i fóro, savó isyn maškír sýgno rékica (lenorí) pe dólo, i sarí loščýna Miedieva ke Divono;

¹⁰adiáke-pac' saré Sigonoskire fórja, Amoriejéngire kralískire, savó sys kralísa ke Jesievóno, ke miéžy Amonitianengire,

¹¹adiáke-pac' Galaádo i miéža Giesursko i Maahakire, i sarí bérga Jermono i saró Vasáno ke Salha,

¹²saró Vasanoskire-Ogoskiro kralipén, savó sys kralísa dre Astarofa i dre Jedreja. Jov jaciápe jekh Riefaimendyr, savén Mójza domardiá i protradyja.

¹³Ne čhavé Izrailjoskire na vytradyné manušén Giesuroskiren i Maahijoskiren, i dživéla Giesuro i Maaha maškír Izrailjo ke davá dyvés.

¹⁴Jekhe rodycóske Lievijoskireske na dyjá mištypnáskiri miéra: svénto janybén Ráskiro-Devléskire, Devléskiro Izrailjoskiro, ake, isyn léskiri mištypnáskiri miéra, syr phendiá léske Raj Devél.

¹⁵Rodycoske Ruvimóskire čhavénge pir léngire kherá dyjá mištypnáskiri miéra Mójza:

¹⁶rigasa lengirjasa sys Aroiero, savó isyn pe Arnonoskire-rekicakiro (lenorjakiro) brégo, i fóro, savó isyn maškír rékica (lenorí), i sarí loščýna pašýl Miedieva,

¹⁷Jesievóno i saré léskire fórja, savé isyn pe loščýna, i Divono, Vamofo-Vaalo i Bief-Vaal-Mieono,

¹⁸Iaaca (Jaca), Kiediemofo i Miefaafo,

¹⁹Kiriafaimo, Sivma i Cerief-Šaharo pe bérga Jemieko,

²⁰Bief-Fiegoro i štéty pašýl sklono Fasgakiro i Bief-Ješymofo,

²¹i saré fórja pe loščýna, i saró Sigonoskiro kralipén, Amorieiskone-kralískiro, savó sys kralísa dre Jesievóno, savés zamardiá Mójza, adiáke-pac' i Madiamskone šeralen: Jevijas, i Riekiemos, i Curas, i Xuras, i Rievos, Sigonoskire thagar'jen, savé dživdé pe doiá phuv;

²²adiáke-pac' Valaamos, Vieoroskire čhavés, zumakiribnaskires, zamardé Izrailjoskire čhavé kurtalása khetané dre ginybén, kicý jone zamardé.

²³Rigasa pir miéža Ruvimóskire čhavéngire sys Iordáno. Ĥáda, isyn mištypnáskiri miéra Ruvimóskire čhavengiri, pir léngire kheritkarody, fórja i gavá léngire.

²⁴Mójza adiáke-pac' dyjá mištypnáskiri miéra Gadóskire rodycóske, čhavénge Gadoskirenge, pir kherítka ródy léngire:

²⁵rigasa lengirjasa sys Jaziero (Iaziero) i saré Galaadóskire fórja, i paš Amonoskire čhavéngiro pe phuv ke Aroiero, so isyn angíl Rava,

²⁶i phuvjá Jesievonoskire ke Ramaf-Micfa i Vietonimo, i Mahanaimostyr ke Daviroskire-miežakire rigá,

²⁷i pe dólo Bief-Garamo i Bief-Nimra i Sokhofo i Cafono, so jaciápe Sigonoskire kralipnastyr, Jesievonoskire kralískiro; léskire rigasa sys Iordáno ke Xinieriefoskiro paní pal Iordáno ke vastóko.

²⁸Ĥáda, isyn Gadóskire-čhavengiri mištypnáskiri miéra, pir kherítka ródy léngire, fórja i gavá léngire.

²⁹O Mójza dyjá mištypnáskiri miéra i pašake Manasijáskire rodycóske, savó sys pal paš Manasijáskire-čhavéngire rodycóstyr, pir kherítka ródy léngire;

³⁰Léngiri rig pir miéža sys: Mahanaimostyr saró Vasáno, saró Ogaskiro kralipén, Vasanoskire-kralískiro, i saré gavá Jairoskire, so isyn dre Vasáno, šovdešá fórja;

³¹a paš Galaadaskiri i Astarofoskiri i Jedrejakiri, Vasanoskire-Ogoskire-kralipnaskire fórja, dyné Mahiraskire čhavénge, Manasijáskire-čhavéskire i pašake Mahiroskire čhavénge, pir kherítka ródy léngire.

³²Ĥáda, so, Mójza dyjá dre mištypnáskiri miéra pe Moavitoskire loščyny pal Iordáno proti Jerihóno ke vastóko.

³³Ne Lievijoskire rodycóske Mójza na dyjá mištypnáskiri miéra: Raj Devél, Devél Izrailjoskiro, Kokoró sys léngiri mištypnáskiri miéra, syr Jov rakirdiá lénge.