Read Biblija - Pe Baltitko Romani čib (Romanes) 2019 Baltic Romani Bible Isúso 14 Bible Online

Isúso 14 - Biblija - Pe Baltitko Romani čib (Romanes) 2019 Baltic Romani Bible bible

Isúso 14

¹Ĥáda, so, doresné (dolyne) dre mištypnáskiri miéra Izrailjoskire čhavé pe Xanaanóskiri phuv, so rozdyne lénge dre mištypnáskiri miéra rašáj Jelizáro i Isúso, Navinoskiro čhavó, i rodengire barydyrá pe Izrailjoskire-čhavéngire ródycy.

²Pir žriébijo rozdyne jone, syr priphendiá Raj Devél pir Mojzaste, jeniá rodycenge i pašake Manasijáskire rodycóske.

³Paldavá so duje rodycenge i pašake Manasijáskire rodycóske Mójza dyjá dre mištypnáskiri miéra pal Iordáno, Lieviténge na dyjá mištypnáskiri miéra maškirál lénde;

⁴pal-dová so Iosifóskire čhavéndyr vyginé duj ródycy: Manasijáskiro i Jefriemoskiro; pir davá jone i na dyné Lieviténge pašá pe phuv, a jekh fórja vaš džiibén léngire phuvjása vaš kheritkoné murdalénge (skoto) léngire i vaš javír léngire l'goty (vygody).

⁵Syr priphendiá Raj Devél Mojzáske, adiáke i kerdé Izrailjoskire čhavé, kiéli rozdenas phuv dre mištypnáskiri miéra.

⁶Judáskire čhavé javné dro Galgálo ke Isúso (Johošuá), i phendiá léske o Xalievo, Jefonijoskiro čhavó, Kieniezejanino: “Tu džinésa, so rakirdiá Raj Devél Mojzáske, Devléskire manušéske, pal mánde i pal túte dre Kadies-Varna.

⁷Mánge sys štardešá berš, kiéli Mójza, pishári Ráskire-Devléskiro, bičhadiá man Kadies-Varnatyr te obdykhav phuv, i me jandjom léske dre otphenybén, so sys mánde pe iló:

⁸pšála miré, savé psirdé mánca, jandlé dar dro iló manušéngiro, a me kerdjom saró dro čačipén miréske Ráske-Devléske, Devléske;

⁹i sovlahadiá Mójza dre dová dyvés i phendiá: ‘Phuv, pir saví psirdiá tyrí ĥerój, javéla mištypnaskire mierasa túke i tyré čhavénge pe viéko, pal-dová so tu dre čačipén saró kerdián Ráske-Devléske, Devléske miréske.’

¹⁰I adiáke, ĥáda, Raj Devél jačkirdiá man džides, syr Jov rakirdiá; akaná štardešá pandž berš progijá dolé časostyr, kiéli Raj Devél phendiá Mojzáske davá lav, i Izrailjo psirdiá pir čhučí phuv; akaná, ĥáda, mánge ohtodešá pandž berš;

¹¹ne i akaná me adiáke-pac' som zoraló, syr i tedy, kiéli bičhadiá man Mójza: ci but tedy sys mánde zor, adákicy i kakaná isyn vaš dová, sob (kaj) te maravpe, i te vydžav i te zadžav;

¹²i adiáke, de mánge daja bérga, pal saví rakirdiá Raj Devél dre dová dyvés; pal-dová so šundián dro dová dyvés, so odój dživéna Jenakoskire čhavé, i fórja lénde isyn baré i zoralé tynénca, moginéla te javél, so Raj Devél javéla mánca, i me vytradava len, syr rakirdiá Raj Devél”.

¹³Isúso bahtiakirdiá les, i dyjá dre mištypnáskiri miéra Xalievoske, Iiefonijoskire čhavéske Xievróno.

¹⁴Adiáke Xievróno jaciápe mištypnaskire mierasa Xalievoske, Iiefonijoskire-čhaveskiri, Kieniezejaninoskiri, ke davá dyvés, pal-dová, so jov dro čačipén kerdiá saró, syr phendiá Raj Devél, Devél Izrailjoskiro.

¹⁵Lav Xievronoske angledýr sys Kiríaf-Arba, syr khardiape maškirál Jenakoskire čhavénde jekh baró manúš. I phuv jaciá štyl maribnastyr.