Read Biblija - Pe Baltitko Romani čib (Romanes) 2019 Baltic Romani Bible Isúso 18 Bible Online

Isúso 18 - Biblija - Pe Baltitko Romani čib (Romanes) 2019 Baltic Romani Bible bible

Isúso 18

¹Saró Izrailjoskire čhavéngiro skedyibén skedyjape dro Silómo, i čhudé odój skedyibnáskiri šátra (skínija), pal-dová so phuv sys zalyny lénca.

²Izrailjoskire čhavéndyr jaciápe eftá ródycy (čangá), savé na doresné (na dolyne) péskiri mištypnáskiri miéra.

³I phendiá Isúso Izrailjoskire čhavénge: “Ci ĥará (dlúges) tumé javéna te kuninenpe (te na radinen) pal dová, sob (kaj) te džas i te les dre meknó mištypén (nasliedijo) phuv, saví dyjá tuménge Raj Devél, Devél, tumaré-dadéngiro?

⁴Den péstyr pir trin manušá rodycóstyr, me bičhaváva len, i jone, uštyi, prodžána pir phuv i občhinena la, syr trej te rozdes lénge pe mištypnáskiri miéra, i javéna ke me;

⁵mek te rozden la pe eftá mištypnaskire miery (pašá); Juda mek te jačélpe pe péskiri rig pe paš-dyvés (jugo), a Iosifoskiro kher mek te jačélpe pe péskiri rig pe paš-rat (sievierno);

⁶a tumé rosčhinen phuv pe eftá mištypnaskire miery (pašá) i janén mánge adarík: me čhurdava tuménge žriébijo adáj angíl Ráskire-Devléskiro, tumaré Devléskiro muj;

⁷a Lieviténge nane paš maškír tuménde, pal-dová so sventyma Ráskire-Devléskiri isyn léngiri mištypnáskiri miéra; Gado, Ruvimo i paš Manasijáskire rodycóstyr doresné (dolyne) péskiri mištypnáskiri miéra pal Iordáno ke vastóko, saví dyjá lénge Mójza, Ráskiro-Devléskiro pishári.

⁸Adalé manušá uštyné i giné. Isúso dyjá manušénge, savé giné te rosčhinen phuv dasavo uphenybén: “Džán, obdžan phuv, občhinen la i risjon ke me; a me adáj čhurdava tuménge žriébijo angíl Ráskire-Devléskiro muj, dro Silómo”.

⁹Jone giné, proginé pir phuv i občhindlé la, pir lákire fórja, pe eftá-mištypnaskire miery (pašá), dre lylvarí, i javné ke Isúso dro stáno, dro Silómo.

¹⁰Isúso čhurdyjá lénge žriébijo dro Silómo angíl Raste-Devléste, i rozdyja odój Isúso phuv Izrailjoskire čhavénge pir léngire učastki (rozdyibena).

¹¹Pérvo žriébijo vygijá Vieniaminóskire-čhavéngire rodycóske, pir léngire kherítka ródy (pliémi). Rig miežakiri léngiri pir žriébijo gijá maškír Judáskire čhavénde i maškír Iosifóskire čhavénde;

¹²miéža léngiri pe paš-ratítko rig lélape pašýl Iordáno, i prodžála daja miéža pašýl Jerihóno paš-dyveséstyr (sievierostyr), i džála upré pe bérga ke zapado, i lákiro jagóro isyn pe čhučí phuv Biefyvieno.

¹³Odothýr miežakiri rig džála ke Luza, ke paš-dyvesýtko (južno) Luzakiri rig, javirés Viefíljo, i na džála telé rig ke Atarof-Adaro, ke bérga, saví isyn pe paš-dyvesýtko (jugoskiri) rig Bief-Oronoskiri telatuny;

¹⁴tén'či (potom) miéža riskiréla i zmekelape ke morjoskiri rig pe paš-dyvés (jugo) bergátyr, saví isyn pe paš-dyvés angíl Bief-Orono, i lákiro jagóro isyn pašýl Kiríaf-Vaalo, javirés kharlape Kiríaf-Iarimo, Judáskire čhavéngire fórja. Daja isyn západno rig.

¹⁵Paš-dyvesytkoné rigasa Kiríaf-Iarimostyr džála miéža ke mórjo (derjáv) i dodžála ke štéto, katýr džála paní Nieftoahostyr;

¹⁶tén'či (potom) miéža džála telé ke bergákiro jagóro, savó isyn angíl Jenomoskire čhavéskiro dólo, pe Riefaimoskiro dólo, ke paš-rat (sieviero), i džála telé Jenomaskire dolosa ke paš-dyvesýtko Jevusoskiri rig, i džála ke En-Rogielo;

¹⁷Tén'ci (potom) riskiréla paš-ratiatyr i džála ke En-Šiemiešo, i džála ke Gielilofo, savó isyn proti Adumimoskiro vučipén, i džála telé ke Boganoskiro bar, Ruvimóskire čhavéskiro;

¹⁸tén'či (potom) džála nádur loščynatyr (Aravijatyr) ke paš-dyvés i džála telé pe loščýna (Aravija);

¹⁹adathýr džála miežakiri rig pašýl Bief-Xogla pe paš-rat, i rigakiro jagóro paš dre paš-ratítko (sievierno) Londe morjoskiro (derjavéskiro), pašýl paš-dyvesýtko (južno) jagóro Iordanoskiro. Ĥáda, isyn paš-dyvesýtko miéža. Rigátyr vastočnonatyr miežasa sys Iordáno.

²⁰Ĥáda, sys Vieniaminóskire čhavengiri-mištypnáskiri miéra, léskire miežienca saré rigéndyr, pir léngire kherítka ródy (pliémi).

²¹Fórja, so sys Vieniaminóskire čhavénde léngire rodycóske, pir léngire kherítka ródy (pliémi): Jerihóno, Bief-Xogla i Jemiek-Kiecico,

²²Bief-Arava, Cemaraimo i Viefíljo,

²³Avimo, Fara i Ofra,

²⁴Kiefar-Amonajo, Afni i Gieva: dešudúj fórja léngire gavenca.

²⁵Gavaóno, Ráma i Bierofo,

²⁶Micfe, Kiefira i Moca,

²⁷Riekiemo, Irfieiljo i Farala,

²⁸Céla, Eliefo i Jevuso, javirés kharlape Jerusalimo, Givieafo i Kiriafo: dešuštar fórja léngire gavenca. Ĥáda, sys Vieniaminóskire-čhavengiri mištypnáskiri miéra, pir léngire kherítka ródy (pliémi).