Read Biblija - Pe Baltitko Romani čib (Romanes) 2019 Baltic Romani Bible Isúso 19 Bible Online

Isúso 19 - Biblija - Pe Baltitko Romani čib (Romanes) 2019 Baltic Romani Bible bible

Isúso 19

¹Javír žriébijo vygijá Simieonoske, Simieonoskire-čhavéngire rodycóske, pir léngire kherítka ródy (pliémi); i sys léngiri mištypnáskiri miéra maškír Judáskire-čhavengiri mištypnáskiri miéra.

²Dre léngiri mištypnáskiri miéra sys: Virsávija ci Ševa, Molada,

³Hacar-Šualo, Balá i Acemo,

⁴Jeltolado, Viefulo i Xorma,

⁵Cyklago, Bief-Markavofo i Xacar-Susa,

⁶Bief-Lievaofo i Šaruhieno: trijánda fórja léngire gavenca.

⁷Aino, Rimono, Jefiero i Ašano: štar fórja léngire gavenca,

⁸i saré gavá, savé sys pašýl dalé fórja až ke Vaalaf-Biejera, ci ke paš-dyvesýtko (južno) Ráma. Ĥáda, sys Simieonoskire-čhavéngire rodycoskiri mištypnáskiri miéra, pir léngire kherítka ródy (pliémi).

⁹Judáskire-čhavéngire rozdyibnastyr (učastkostyr) dyný sys miéra Simieonoskire-čhavéngire rodycóske. Adiáke syr Judáskire-čhavéngiro rozdyiben (učastko) sys drieván baró vaš lénge, to Simieonoskire čhavé i doresné mištypnáskiri miéra maškír léngiri mištypnáskiri miéra.

¹⁰Tríto žriébijo vypyja Zavulonoskire čhavénge pir léngire kherítka ródy, i tyrdyjape léngire-mištypnaskire mierakiri rig ke Sarido;

¹¹I léngiri isyn miežakiri rig léngiri džála ke mórjo (derjáv) i ke Maralo i khetaniakirelape Dabiešefosa, i khetanakirelape sygnone rekicasa, saví isyn angíl Ioknieamomo.

¹²Saridatyr džála miéža pale ke vastočno rig, ke khameskiro ŭzgiiben, ke Kislof-Favoroskiri miéža; adathýr džála ke Davrafo i ĥazdélape ke Iafijo;

¹³adathýr prodžála ke vastóko dro Gief-Xiefiero, dre Ita-Kacyno, i džála ke Rimono, Mifoaro i Neja;

¹⁴i riskiréla miežakiri rig paš-ratiatyr (sievierostyr), ke Xanafono i lákiro jagóro pe dólo Iftah-Ela.

¹⁵Duredýr: Katafo, Nagalalo, Šymrono, Idiealo i Vifliejémo: dešudúj fórja léngire gavenca.

¹⁶Ĥáda, isyn Zavulonoskire-čhavéngiro meknó mištypén, pir léngire kherítka ródy (pliémi); ĥáda, isyn fórja i léngire gavá.

¹⁷Štárto žriébijo vygijá Isaharoske, čhavénge Isaharoskirenge, pir léngire kherítka ródy (pliémi);

¹⁸miežakire rigasa lengirjasa sys: Izriejeljo, Kiesulofo i Suniemo,

¹⁹Hafaraimo, Šyono i Anaharafo,

²⁰Ravifo, Kišyono i Avieco,

²¹Riemiefo, Jen-Ganimo, En-Xada i Bief-Pacieco;

²²i khetaniakirelape rig Favorosa i Šagacymosa i Viefsamisosa, i léngire rigakiro jagóro pašýl Iordáno: dešušov fórja léngire gavenca.

²³Ĥáda, isyn Isaharoskire čhavéngiro rodycoskiro meknó mištypén, pir léngire kherítka ródy; ĥáda, isyn fórja i léngire gavá.

²⁴Pándžto žriébijo vygijá Asiroskire čhavéngire rodycóske, pir léngire kherítka ródy;

²⁵miežasa lengirjasa sys: Xielkafo, Xali, Vietieno i Ahsafo,

²⁶Alamielieho, Amado i Mišalo. I khetaniakirelape miežakiri rig Karmilosa palatuné rigátyr i Šihoro-Livnafosa;

²⁷tén'či (potom) džála pale ke khameskiro ŭzgiiben dre Vief-Dagono, i khetaniakirelape Zavulonosa i dolosa Iftah-Elasa paš-dyveséstyr, dro Bief-Jemieko i Nieijelo, i džála pašýl Kavulo, zervone (lievone) rigátyr;

²⁸durydyr: Jevrono, Riehovo, Xamono i Kaná, ke Sidono baró;

²⁹tén'či (potom) miéža risjola ke Ráma ke Tíro fóro zoralé tynosa, i riskiréla miežakiri rig ke Xosa, i jagóro lákiro pašýl mórjo (derjáv) dro štéto Ahziva.

³⁰Duredýr: Uma, Afieko i Riehovo: biš te duj fórja léngire gavenca.

³¹Ĥáda, isyn Asiroskire-čhavéngiro rodycoskiro meknó mištypén, pir léngire kherítka ródy (pliémi); ĥáda, sys fórja i léngire gavá.

³²Šóvto žriébijo vygijá Niefalimoskire čhavénge, Niefalimoskire čhavénge pir léngire kherítka ródy;

³³miežakiri rig léngiri gijá Xieliefostyr i dubravendyr, so sys dre Cananima, ke Adami-Niekievo i ke Iavnieilo, ke Lakumo, i lákiro jagóro (krajo) sys pašýl Iordáno;

³⁴adathýr risjola miéža pe zapado ke Aznof-Favoro i džála odothýr ke Xukoko, i khetaniakirelape Zavulonosa paš-dyveséstyr (jugostyr), i Asirosa khetaniakirelape zapadostyr, i Judasa pašýl Iordáno, khameskire ŭzgiibnastyr.

³⁵Fórja zoralé tynénca isyn: Cydimo, Cero, Xamafo, Rakafo i Xinieriefo,

³⁶Adamo, Ráma i Asoro,

³⁷Kiedieso, Jedreja i En-Gacoro,

³⁸Irieono, Migdal-Jelo, Xoriemo, Bief-Anafo i Viefsamiso: dešujenia fórja léngire gavenca.

³⁹Ĥáda, sys Niefalimoskire-čhavéngire rodycoskiri miéra dro meknó mištypén pir léngire kherítka ródy (pliémi); ĥáda, sys fórja i gavá léngire.

⁴⁰Danóskire čhavéngire rodycóske, pir léngire kherítka ródy, vygijá eftáto žriébijo;

⁴¹léngire mištypnaskire mierakire rigasa sys: Cora, Ještaolo i Ir-Šemiešo,

⁴²Šaalavino, Aialono i Iola,

⁴³Jelono, Fimnafa i Jekrono,

⁴⁴Jeltiekie, Givviefono i Vaalafo,

⁴⁵Igudo, Bienie-Vierako i Gaf-Rimono,

⁴⁶Mie-Iarkono i Rakono miežasa nádur Iopijatyr. I vygijá Danóskire čhavengiri rig tykny vaš lénge.

⁴⁷I Danóskire čhavé giné maribnása pe Lasiemo, i lyné les, i domardé les kurtalása, i doresné les dro mištypén péske, i lyné te dživén dre léste, i khardé Lasiemo Danosa pir péskire dadéskiro lav Dano.

⁴⁸Ĥáda, isyn Danóskire čhavéngire rodycoskire mištypnáskiri miéra, pir léngire kherítka ródy; ĥáda, fórja i gavá léngire.

⁴⁹Kiéli mekné jone phuv te rozden, pir lákire miéžy, tedy Izrailjoskire čhavé dyné maškír péste mištypnáskiri miéra Isusóske, Navinoskire čhavéske:

⁵⁰pir Ráskiro-Devléskiro uphenybén dyné jone léske fóro Famnaf-Sarai, savó jov mangdiá, pe bérga Jefriemóskiri; i kerdiá jov fóro i dživdiá dre léste.

⁵¹Ĥáda, sys mištypnaskire miery, savé rašáj o Jelizáro, Isúso, Navinoskiro čhavó, i barydyrá pe stréčy rozdyne Izrailjoskire-čhavéngire rodycenge, pir žriébijo, dre Silómo, angíl Ráskire-Devléskiro muj, pašýl skedyibnaskire skinijakiro zagiibén. I mekné te rozden (te roskeren) phuv.