Read Biblija - Pe Baltitko Romani čib (Romanes) 2019 Baltic Romani Bible Isúso 2 Bible Online

Isúso 2 - Biblija - Pe Baltitko Romani čib (Romanes) 2019 Baltic Romani Bible bible

Isúso 2

¹I bičhadiá Isúso, čhavó Navinoskiro, Sitimatyr dujén poddykhibnaskiren čorahanés, i phendiá: “Džán, obdykhen phuv i Jerihóno”. Duj terné manušá giné i javné dre biladžakuniakiro kher, savjakiro lav sys Raav, i jačnépe te rat'kiren odój.

²I phendló sys Jerihonoskire kralíske: “Ĥáda, vari-savé manušá Izrailjoskire čhavéndyr javné darik dre daja rat, sob (kaj) te vydykhen phuv”.

³Jerihonoskiro králi bičhadiá te phenén Raavake: “Vyde manušén, savé javné ke tu, savé zaginé dro tyró kher; pal-dová so jone javné te vydykhen sarí phuv”.

⁴Ne džuvlý lyjá odolén dujén manušén, i garadia len, i phendiá: “Čačes, sys zaginé ke me manušá, ne me na džindjom, katýr jone sys.

⁵Kiéli dro ciamlypén treindiá te zaučhakires vudará, tedy jone giné. Tradenpe sygnedyr pal lénde; tumé dotradena len”.

⁶A kokori otlydžija len pe stréha (čhakín) i garadia len dre ljonoskire ĥarby (snopy), savé sys rosčhude láte pe stréha (čhakín).

⁷Manušá, savé sys bičhadé, tradynepe pal lénde pir drom ke Iordáno ke sámo pajasli (paromo); vudará dová-pac' časo začhakirdepe, paló (poslie) dová, syr vyginé manušá, savé tradynepe pal lénde.

⁸Angledýr, syr jone pasine te soven, joj gijá upré ke jone pe stréha (čhakín).

⁹I phendiá lénge: “Me džinóm, so Raj Devél otdyjá daja phuv tuménge; paldavá tumé jandlé pe aménde traš, i saré manušá dalé phuvjákire jačné tuméndyr dre dar.

¹⁰Pal-dová so ame šundiám, syr Raj Devél vyšut'kirdia angíl tuménde Lolé-morjoskiro (derjavéskiro) paní, kiéli tumé giné Jegiptóstyr, i syr tumé kerdé duje Amoriejéngire kral'jenca pal Iordáno, Sigonosa i Ogomosa, savén tumé tradyne.

¹¹Kiéli ame šundiám pal davá, jaciá bizorjákiro amaró iló, i ni konéste améndyr na jaciá dúho proti tuménde; pal-dová so Raj Devél, Devél tumaró, isyn Devél uprál pe bolybén i pe phuv telál.

¹²I adiáke sovlahan mánge Rása Devlésa, so, syr me kerdjom tuménge tangipén, adiáke i tumé keréna tangipén miré-dadéskire kheréske: i den mánge čačuný špéra (znako),

¹³so tumé jačkirena džiden dadés mires i da mirja, i pšalén miren, i phenien miren, i sarén, kon isyn lénde, i zrakhena dijá amaré meribnástyr”.

¹⁴Adalé manušá phendlé láke: “Di amaró zamiést tuménde mek te javél otdynó meribnáske, kóli tumé na otčhakirena davá réndo amaró; kiéli Raj Devél otdéla aménge phuv, ame kerása túke tangipén i čačipén”.

¹⁵I zmekhcia joj len pir šelo pir fenštra, pal-dová so kher lákiro sys dre foróskiri vánta, i joj dživdiá dre vánta;

¹⁶I phendiá lénge: “Džán pe bérga, sob (kaj) te na streninen tumen manušá, savé rodéna tumen, i garadjon odój trin dyvesá, paka risjona manušá, savé tradynepe pal tuménde; a paló (poslie) davá džán dre drom tumaró”.

¹⁷I phendlé láke odolé manušá: “Ame javása vol'na tyré sovlahatyr, savjása tu amen sovlahadian, kóli na kerésa adiáke:

¹⁸ĥáda, kiéli ame javása pe daja phuv, tu priphande čiervljono šelo ke fenštra, pir saví tu amen zmekcian, a dadés tyrés i da tyrja i pšalén tyrén, saró tyré-dadéskiro ródo, skéde ke pe dro péskiro kher.”

¹⁹I kóli vari-kon vydžála tyré-kheréskire vudarendyr javrí, odoleskiro rat javéla pe šeró léskiro, a ame javása vol'na saré tyré sovlahatyr; a kon javéla túsa dro tyró kher, odoleskiro rat javéla pe šeró amaró, kóli konéskiro vast čilavéla les.

²⁰Kóli tu otčhakiresa davá amaró réndo, tedy ame adiáke-pac' vol'na javása tyré sovlahatyr, savjása tu amen sovlahadian”.

²¹Joj phendiá: “Mek te javél pir tumaré lavá!” I otmekhcia len, i jone giné, a joj priphandia ke fenštra čiervlieno šelo.

²²Jone giné i javné pe bérga, i sys odój trin dyvés, paka risiné manušá (šale), savé tradynepe pal lénde. Manušá (šale), savé tradynepe, rodyne len pir saró drom i na lathné.

²³Adiáke duj adalé manušá giné pale, giné telé bergátyr, piriginé Iordáno i javné ke Isúso (Johošuá), Navinoskiro čhavó, i piriphendle léske saró, so lénca kerdiápe.

²⁴I phendlé Isusóske: “Raj Devél otdyjá sarí daja phuv dre amaré vastá, i saré phuvjákire manušá daréna améndyr”.