Read Biblija - Pe Baltitko Romani čib (Romanes) 2019 Baltic Romani Bible Isúso 20 Bible Online

Isúso 20 - Biblija - Pe Baltitko Romani čib (Romanes) 2019 Baltic Romani Bible bible

Isúso 20

¹I phendiá Raj Devél Isusóske:

²“Phen Izrailjoskire čhavénge: kerén péste znašybnaskire fórja, pal savé Me rakirdjom tuménge pirdál Mojzaste,

³sob (kaj) mogindiá te našél odorík umaribnari, savó domardiá manušés, so dyjape dukhá, nakamišy; mek dalé fórja te javén tuménde zrakhibnasa manušéstyr, savó othala pale pal rat,

⁴I kon našela dre jekh dalé for'jéndyr, mek te terdjol pašýl foróskire vudará i te rosphenel dro saró šunybén dalé foróskire phurydyrenge péskiro réndo; i jone les priléna ke pe dro fóro, i déna léske štéto, sob (kaj) jov te dživél lénde;

⁵i kiéli tradelape pal léste manúš, savó othala pale pal rat, tedy lénge naštý te vyden dre léskire vastá umaribnaris, pal-dová so jov na kamišy zamardiá péskire pašatunes, léste na sys ke jov nakamiben ni tasiá, ni pe tríto dyvés;

⁶mek jov te dživél dre davá fóro, paka javéla angíl manušénde pe séndo, paka na meréla baró rašái, savó javéla dre dolé dyvesá. A korigedýr (pozžie) mek te risjol umaribnari i te džal dre péskiro fóro i dre péskiro kher, dre fóro, savéstyr jov nastiá.

⁷I vykedyné Kiedieso dre Galiliéia pe Niefalimoskiri bérga, Sihiemo pe Jefriemóskiri bérga, i Kiríaf-Arba, javirés Xievróno, pe Judaskiri bérga;

⁸pal Iordáno, proti Jerihóno ke vastóko vykedyné: Biecero pe čhučí phuv, pe loščýna, Ruvimóskire rodycóstyr, i Ramófo dro Galaádo Gadóskire rodycóstyr, i Golano dro Vasáno Manasijáskire rodycóstyr.

⁹Dalé fórja sys dyné vaš saré Izrailjoskire čhavénge i vaš manušénge, savé javné javire rigátyr, savé dživéna dre lénde, sob (kaj) te našél odorík kažno (sváko), kon zamardiá manušés pir doš, sob (kaj) te na merél jov manušéskire vastéstyr, savó othala pale pal rat, paka javéla angíl manušénde pe séndo.