Read Biblija - Pe Baltitko Romani čib (Romanes) 2019 Baltic Romani Bible Isúso 21 Bible Online

Isúso 21 - Biblija - Pe Baltitko Romani čib (Romanes) 2019 Baltic Romani Bible bible

Isúso 21

¹Tén'ci Lieviténgire-strečakire barydyrá javné ke rašáj Jelizáro i ke Isúso, Navinoskiro čhavó, i ke Izrailjoskire-čhavéngire barydyrá pe stréčy,

²i rakirdé lénge dro Silómo, pe Xanaanóskiri phuv, i phendlé: “Raj Devél rakirdiá pir Mojzaste te den aménge fórja vaš džiibén i léngiri phuv vaš amaré kheritkoné murdalénge (skoto)”.

³I dyné Izrailjoskire čhavé Lieviténge péskire mištypnaskire mieratyr, pir Ráskire-Devléskiro uphenybén, dalé fórja léngire phuvjása.

⁴Vygijá žriébijo Kaafovoskire kheritkoné rodénge; i jaciápe pir žriébijo rašaskire Aaronóskire čhavénge, Lieviténge, Judáskire rodycóstyr, i Simieonoskire rodycóstyr, i Vieniaminóskire rodycóstyr, dešutrin fórja;

⁵a javirénge Kaafoskire čhavéndyr: Jefriemóskire kheritkoné rodendyr rodycóstyr, i Danóskire rodycóstyr, i Manasijáskire rodycoskire pašatyr (pašestyr), pir žriébijo, jaciápe deš fórja.

⁶A Girsonoskire čhavénge — Isaharoskire-kheritkoné rodóstyr, so isyn dre léngiro ródyco i Asiroskire rodycóstyr, i Niefalimoskire rodycóstyr, i Manasijáskire-rodoskire pašatyr dre Vasáno, pir žriébijo, jačné dešutrin fórja;

⁷Mierarinoskire čhavénge, pir léngire kherítka ródy, Ruvimóskire rodycóstyr, Gadóskire rodycóstyr i Zavulonoskire rodycóstyr dešudúj fórja.

⁸I otdyné Izrailjoskire čhavé Lieviténge dalé fórja léngire phuvjása, syr rakirdiá Raj Devél pirdál Mojzaste, pir žriébijo.

⁹Judáskire-čhavéngire rodycóstyr i Simieonoskire-čhavéngire rodycóstyr dyné fórja, savé adáj khardé pir lav:

¹⁰Aaronóskire čhavénge, Kaafonoskire kheritkoné rodóstyr, Lievijoskire čhavéndyr, adiáke syr žriébijo léngiro sys pérvo,

¹¹dyné fóro Kiríaf-Arba, Jenakoskiro dad, javirés kharlape Xievróno, pe Judaskiri bérga, paš-foritko phuv sys pašýl láte;

¹²a félda dalé foróskiri i léskire gavá otdyné dre majonko Xalievoske, Jefonijaskire čhavéske.

¹³I adiáke rašaskire Aaronóskire čhavénge dyné znašybnaskire fórja vaš umaribnar'jenge — Xievróno i léskiri phuv, — Livna i lákiri phuv,

¹⁴Iatiro i léskiri khetaný phuv, — Ještemo i léskiri khetaný phuv,

¹⁵Xolono i léskiri khetaný phuv, — Daviro i léskiri khetaný phuv,

¹⁶Aino i léskiri khetaný phuv, — Juta i lákiri khetaný phuv, — Bief-Šemiešo i léskiri khetaný phuv: jeniá fórja duje dalé rodycendyr;

¹⁷a Vieniaminóskire rodycóstyr: — Gavaóno i léskiri khetaný phuv, — Gieva i lákiri khetaný phuv,

¹⁸Anafofo i léskiri khetaný phuv, — Almono i léskiri khetaný phuv: štar fórja.

¹⁹Saré fórja Aaronóskire čhavénge, rašange, jačnépe dešutrin fórja léngire khetanune phuv'jenca.

²⁰I Kaafoskire čhavéngire kheritkoné rodycenge, Lieviténge, javire Kaafonoskire čhavéndyr, pir léngiro žriébijo, jačnépe fórja Jefriemóskire rodycóstyr;

²¹i dyné lénge znašybnaskiro fóro vaš umaribnariske — Sihiemo i léskiri khetaný phuv, pe Jefriemóskiri bérga, — Gieziero i léskiri khetaný phuv,

²²i Kivcaimo i léskiri khetaný phuv, Bief-Orono i léskiri khetaný phuv: štar fórja;

²³Danóskire rodycóstyr: Jelfiekie i léskiri khetaný phuv, — Giviefono i léskiri khetaný phuv,

²⁴Aialono i léskiri khetaný phuv, — Gaf-Rimono i léskiri khetaný phuv: štar fórja;

²⁵pašatyr (pašestyr) Manasijáskire rodycóstyr: — Faanaho i léskiri khetaný phuv, — Gaf-Rimono i léskiri khetaný phuv: duj fórja.

²⁶Saré fórja léngire phuv'jenca sys deš, so jačnépe javire rodénge Kaafoskire čhavéndyr.

²⁷A Girsonoskire čhavénge, Lievitoskire rodóstyr, dyné: pašatyr Manasijáskire rodycóstyr znašybnaskiro fóro vaš umaribnariske — Golano dre Vasáno i léskiri khetaný phuv, i Bieještiera i lákiri khetaný phuv: duj fórja;

²⁸Isaharoskire rodycóstyr: — Kišyono i léskiri khetaný phuv, — Davrafo i léskiri khetaný phuv,

²⁹Jarmufo i léskiri khetaný phuv, — Jen-Ganimo i léskiri khetaný phuv: štar fórja;

³⁰Asiroskire rodycóstyr: — Mišalo i léskiri khetaný phuv, Avdono i léskiri phuv,

³¹Hielkafo i léskiri khetaný phuv, — Riehovo i léskiri khetaný phuv: štar fórja;

³²Niefalimoskire rodycóstyr znašybnaskiro fóro vaš umaribnariske — Kiedieso dre Galiliéia i léskiri khetaný phuv, — Xamof-Doro i léskiri khetaný phuv, — Karfano i léskiri khetaný phuv: trin fórja.

³³Girsonoskire čhavénge pir léngire kherítka ródy (pliémi), doresné dešutrin fórja léngire phuvjása saré for'jéndyr.

³⁴Mierariskire-čhavéngire kheritkoné rodóske, palatuné (posliednjone) Lieviténge, dyné: Zavulonoskire rodycóstyr Ioknieamo i léskiri khetaný phuv, Karfo i léskiri khetaný phuv,

³⁵Dimna i lákiri khetaný phuv, Nagalalo i léskiri khetaný phuv: štar fórja;

³⁶Ruvimóskire rodycóstyr Biecero i léskiri khetaný phuv, Jaca i léskiri khetaný phuv,

³⁷Kiediemofo i léskiri khetaný phuv, — Miefaafo i léskiri khetaný phuv: štar fórja;

³⁸Gadóskire rodycóstyr: znašybnaskire fórja vaš umaribnariske — Ramófo dre Galaádo i léskiri khetaný phuv, — Mahanaimo i léskiri khetaný phuv,

³⁹Jesievóno i léskiri khetaný phuv, — Iaziero i léskiri khetaný phuv: saré sys štar fórja.

⁴⁰Saré fórja Mierariskire čhavénge pir léngire kherítka ródy, palatuné (posliednjone) Lievitentire rodycenge, pir žriébijo, jačnépe dešudúj fórja.

⁴¹Saré Lieviténgire fórja maškír Izrailjoskire-čhavéngiro majenko (vladienijo) sys štardešá ohtó fórja léngire phuvjása khetanune.

⁴²Paše dalé fórja sys: pašýl kažno fóro, pašýl léste sys khetaný phuv — adiáke sys pašýl dalé saré fórja.

⁴³Adiáke otdyjá Raj Devél Izrailjoske sarí phuv, pal saví sovlahadiá Jov te del léngire dadénge, i jone doresné (dolyne) la dro meknó mištypén (nasliedijo) i lyné te dživén pe láte.

⁴⁴I dyjá lénge Raj Devél ramánjo (pokojo) saré rigéndyr, syr sovlahadiá léngire dadénge; i nikón léngire saré vergéndyr na vyrikirdia proti lénde; sarén léngire vergén Raj Devél otdyjá dre léngire vastá.

⁴⁵Na jaciápe nijékh lav, savó na kerdiápe čačipnása saré lačhé lavéndyr, savé Raj Devél rakirdiá Izrailjoskire kheréske; saró kerdiápe ke kónco (ke jagóro) (spolnindiape).