Read Biblija - Pe Baltitko Romani čib (Romanes) 2019 Baltic Romani Bible Isúso 24 Bible Online

Isúso 24 - Biblija - Pe Baltitko Romani čib (Romanes) 2019 Baltic Romani Bible bible

Isúso 24

¹I skedyjá Isúso saré Izrailjoskiro ródycy dro Sihiemo, i khardiá Izrailjoskire phurydyren, i léskire barydyrén, i léskire sendar'jen, i léskire dykhibnaskiren, i terdiné jone angíl Raste-Devléste, Devléste.

²I phendiá Isúso saré manušénge: “Adiáke rakiréla Raj Devél, Devél Izrailjoskiro: ‘Pal reka (len') ĥará dživdé tumaré dadá, Fara, Avraamóskiro dad i Nahoroskiro dad, i dynarindlé javire devlorénge.

³Ne Me lyjom tumaré dadés Avraamos pirdál reka (len'), i lydžijom les pir sarí Xanaanóskiri phuv, i sozdyjom baró léskiro ródo, i dyjom léske Isaakos.

⁴Isaakóske dyjom Jakovós i Isavos. Isavoske dyjom Me bérga Sieiro dre meknó mištypén (nasliedijo); Jakovo i léskire čhavé piriginé dro Jegípto.

⁵I bičhadjom Me Mojzás i Aaronós i Me domardjom Jegípto jazvenca (fransenca), savé kerdjom Me maškír léste, i korigedýr (pozžie) vylydžijom tumen.

⁶Me vylydžijom tumaré daden Jegiptóstyr, i tumé javné ke Loló mórjo (derjáv). Tedy Jegiptiáni tradynepe pal tumaré dadende pe maribnýtka vurdená vurdenenca i manušénca, savé sys bešté uklisté pe grénde ke Loló mórjo (derjáv);

⁷Ne jone lyné te den gódla ke Raj Devél, i Jov čhudiá kalypén maškír tuménde i Jegiptianende, i Jov jandiá pe lénde mórjo (derjáv), savó len i začhakirdia. Tumaré jakhá dykhné, so Me kerdjom dro Jegípto. Korigedýr (pozžie) but dyvesá tumé sánas pe čhučí phuv.

⁸I jandjom Me tumen pe Amoriejengiri phuv, savé dživdé pal Iordáno; jone mardépe tuménca, ne Me otdyjom len dre tumaré vastá, i tumé doresné (dolyne) dro meknó mištypén (nasliedijo) léngiri phuv, i Me tradyjom krig len angíl tuménde.

⁹Gazdyjape o Valáko, Siepforoskiro čhavó Moavoskiro králi, i gijá maribnása pe Izrailjo, i bičhadiá i khardiá Valaamos, Vieorovoskire čhavés, sob (kaj) jov te prokošel tumen;

¹⁰ne Me na kamdjom te kandav Valaamos, i jov bahtiakirdiá tumen, i Me zrakhcjom tumen léskire vasténdyr.

¹¹Tumé piriginé Iordáno i javné ke Jerihóno. I lyné te marénpe tuménca Jerihonoskire manušá, Amoriei, i Fierieziei, i Xananiei, i Xietiei, i Giergiesiei, ne Me otdyjom len dre tumaré vastá.

¹²Me bičhadjom angíl tuménde šieršnien, savé tradyne krig len tuméndyr, dujén Amoriejéngire kral'jén; na tyré kurtalása i na tyré lukosa davá sys kerdó.

¹³I dyjom Me tuménge phuv, pe saví tu na kerdián butý, i fórja, savé tumé na kerdé, i tumé dživéna dre lénde; vinagradytkone i inžyritkone untendyr (sadendyr), savé tumé na čhudé dre phuv, tumé xána barjakirdé (plódy).

¹⁴I adiáke, darén Rástyr-Devléstyr, i dynarinén Léske dre žužyma i dro čačipén: otčhurden devloré, savénge dynarindlé tumaré dadá pal reka (len') dro Jegípto, a dynarinén Ráske-Devléske.

¹⁵Kóli tuménge nane pir iló te dynarinén Ráske-Devléske, to tedy vykeden péske akaná, konéske te dynarines, ci devlorénge, savénge dynarindlé tumaré dadá, savé sys pal reka (len'), ci Amoriejéngire devlorénge, pe phuv savengiri tumé dživéna; a me i miro kher javása te dynarinás Ráske-Devléske”.

¹⁶I otphendlé manušá i phendlé: “Nad, na javéla dová, sob ame te jačkiras Ras-Devlés i jaciám te dynarinás javire devlorénge!

¹⁷Paldavá so Raj Devél, Devél amaró, Jov vylydžijá amen i amaré daden Jegiptóskire phuvjátyr, dynaribnaskire kheréstyr, i kerdiá angíl amaré jakhá baré znamiénii (ĥiertyká), i rakhciá amen pe saró drom, pir savó ame gijam, i maškír saré manušénde, pirdál savénde ame progijam.

¹⁸O Raj Devél tradyjá krig améndyr saré manušén i Amoriejen, savé dživdé pe daja phuv, pal-dová i ame javása te dynarinás Ráske-Devléske, pal-dová so Jov isyn amaró Devél”.

¹⁹Isúso phendiá manušénge: “Tuménge naštý te dynarinén Ráske-Devléske, pal-dová so Jov, Devél, isyn svénto, isyn Devél zevlynypnytko (rievnitieljo), Jov na javéla te vyrikirel tumaró proštaviben (biezzakonijo) i tumaré gréhi.

²⁰Kóli tumé jačkirena Ras-Devlés i javéna te dynarinén javire devlorénge, tedy Jov janéla pe tuménde xas' i protradela tumen, paló davá, syr Jov kerdiá lačhipén tuménge”.

²¹I phendlé manušá Isusóske: “Nad, ame javása te dynarinás Ráske-Devléske”.

²²Isúso phendiá manušénge: “Tumé san jakhítka pal péste, so tumé vykedyné péske Ras-Devlés — te dynarinén Léske?” Jone otphende: “Jakhítka sam ame”.

²³“I adiáke, otčhurden na péskire devloré, savé isyn tuménde, i riskirén péskiro iló ke Raj Devél, Devél Izrailjoskiro”.

²⁴Manušá phendlé Isusóske: “Amaré Ráske-Devléske, Devléske, ame javása te dynarinás, i Léskiri zan (glos) javása te šunas”.

²⁵I kerdiá Isúso manušénca zavieto dro dová-pac' dyvés, i dyjá lénge uphenybén i Zakóno dro Sihiemo.

²⁶I dočhindia Isúso dalé lavá dre Devléskire-Zakonoskiri lylvarí, i lyjá baró bar, i čhudiá les odój tel dembo, savó sys pašýl Ráskire-Devléskiro svénto štéto.

²⁷I phendiá Isúso saré manušénge: “Ĥáda, davá bar javéla tuménge jakhitkonesa, pal-dová so jov šundiá saré Ráskire-Devléskire lavá, savé Jov rakirdiá aménca; mek jov te javél jakhitkonesa proti tuménde, sob (kaj) tumé te na xohaven angíl tumaré Devléste”.

²⁸I otmekhcia Isúso manušén, kažnones (svakones) dre péskiri mištypnáskiri miéra.

²⁹Paló davá myjá o Isúso (Johošuá), Navinoskiro čhavó, Ráskiro-Devléskiro pishári, sys šel jeniá berš léske.

³⁰I garadé les pe léskiri mištypnáskiri mierakiri rig dre Famnaf-Sarai, so isyn pe Jefriemóskiri bérga [Serah-ju.o.], pe paš-rat (sieviero) bergátyr Gaašatyr.

³¹I dynarindiá Izrailjo Ráske-Devléske dre saré dyvesá Isusóskire i dre phurydyrengire dyvesá, dživdé pal Isusóste i, savé dykhné saré Devléskire réndy, savé Jov kerdiá Izrailjoske.

³²I kokalý Iosifóskire (Jozáskire), savé vylydžiné Izrailjoskire čhavé Jegiptóstyr, garadé dro Sihiemo, dre félda, saví kindia Jakovo Jemoroskire čhavéndyr, Sihiemoskire dadéstyr, pal šel rupuvé ĥastalia, i savó jaciápe dre mištypnáskiri miéra Iosifóskire čhavénge.

³³Paló saró myjá i Jelieazaro, Aaronoskiro čhavó, i garadé les pe Finiejesoskiri bérga, léskire čhaveskiri, saví sys dyný léske pe Jefriemóskiri bérga.

³⁴[Dro dová dyvés čhavé Izrailjoskire, lyné Devléskiro kovčego i jone lydžiné les pésa, i o Finiejeso sys rašáj pe štéto Jelieazaroskiro, savó sys léskiro dad; syr jov myjá, to garadé les dro léskiro fóro Gavaofo.

³⁵I čhavé Izrailjoskire giné kažno (sváko) pe péskiro štéto i dro péskiro fóro.

³⁶I čhavé Izrailjoskire lyné te dynarinén (te služynen) Astartake i Astarofoske, i Devlorénge, savénge dénas patýv nacii, savé dživdé pašl lénde. I ogdyja Raj Devél len dre vastá Jeglonoskire, kon sys Moavitengiro králi, i jov rikirdia zor pe lénde dešuohto berš.-r.s.]