Read Biblija - Pe Baltitko Romani čib (Romanes) 2019 Baltic Romani Bible Isúso 3 Bible Online

Isúso 3 - Biblija - Pe Baltitko Romani čib (Romanes) 2019 Baltic Romani Bible bible

Isúso 3

¹I uštyjá Isúso tasiárles (ránes) pe zlóko, i giné jone Sitimatyr, i javné ke Iordáno, jov i saré Izrailjoskire čhavé, i rat'kirde odój, iščo (inké) na pirigii les.

²Pirdál trin dyvesá, giné poddykhibnaskire pir stáno,

³I dyné manušénge uphenybén, rakirí: “Kiéli dykhéna Ráskire-Devléskiro, tumaré Devléskiro zavietóskiro kovčego, i rašán i Lievitén, savé lydžána les, tedy i tumé džán péskire štetóstyr i džán pal léste.

⁴Usajékh javéla štéto maškír tuménde i lénde musinel te javél ke duj tysjoncy kuniá (lokti) mierasa: na poddžan ke jov pašýl, sob (kaj) te džinés tuménge drom, pir savó te džas; pal-dová so tumé na psirdé dalé dromésa ni tasiá, ni pe tríto dyvés”.

⁵I phendiá Isúso manušénge: “Vysvencynenpe, pal-dová so atasiá keréla Raj Devél maškír tuménde dívy”.

⁶Rašange phendiá Isúso: “Len zavietóskiro kovčego i džán angíl manušénde”. Rašaja lyné zavietóskiro kovčego, i giné angíl manušénde.

⁷I Raj Devél phendiá Isusóske: “Dro davá dyvés Me láva te slavinav tut angíl saré Izrailjoskire-čhavéngire jakhá, sob (kaj) jone te džinén so, syr Me i sómas Mojzasa, adiáke Me javáva i túsa.

⁸A tu de uphenybén rašange, savé lydžána zavietóskiro kovčego, i phen: “Syr zadžána dro Iordanoskiro paní, terdjon dro Iordáno”.

⁹Isúso phendiá Izrailjoskire čhavénge: “Javén adarík i šunén Ráskire-Devléskire, tumaré Devléskire lavá”.

¹⁰I phendiá Isúso: “Daléstyr tumé udžinena, so maškír tuménde isyn džidó Raj Devél, Savó tradéla tuméndyr Xananiejen, i Xietiejen, i Jeviejen, i Fierieziejen, i Giergiesiejen, i Amoriejen, i Jevusiejen:

¹¹ĥáda, saré phuvjákiro Ráskire-Devléskiro zavietóskiro kovčego džála angíl tuménde pir Iordáno.

¹²I len péske dešudujen manušén Izrailjoskire rodycendyr, pir jekhéste manušéste rodycóstyr.

¹³I syr féni (tóka) rašángire ĥerá, savé lydžána Ráskire-Devléskiro kovčego, saré phuvjákire Xulaskire, terdjona dre Iordanoskiro paní, Iordanoskiro paní xasjola, a paní, savó thadyja uprál paní, dová terdjola vantasa”.

¹⁴I adiáke, kiéli manušá giné péskire šatrendyr, sob (kaj) te piridžan Iordáno, i rašaja lydžiné zavietóskiro kovčego angíl manušénde:

¹⁵to tedy jekh manušá, savé lydžána kovčego zaginé dro Iordáno, i gera rašángire, lydžii kovčego obmeknepe dro Iordanoskiro paní (Iordáno vydžála saré péskire bregendyr dre saré dyvesá, kiéli pšienicakiro ukedyiben),

¹⁶to paní, savó thadéla uprál, terdijá i terdijá vantasa pe drieván baró štéto ke Adamoskiro fóro, savó pašýl Cartano; i savó thadéla dre morjoskiri loščýna, dro Londo mórjo (derjáv), gijá i xasijá.

¹⁷I manušá piridžanas proti Jerihóno; rašaja, savé lydžiné Ráskire-Devléskiro zavietóskiro kovčego, sys terdé pe šukí phuv maškír Iordáno tvardone ĥerjasa. Saré Izrailjoskire čhavé piriginé pir šukí phuv, paka saré manušá piriginé pirdál Iordáno.