Read Biblija - Pe Baltitko Romani čib (Romanes) 2019 Baltic Romani Bible Isúso 7 Bible Online

Isúso 7 - Biblija - Pe Baltitko Romani čib (Romanes) 2019 Baltic Romani Bible bible

Isúso 7

¹Ne Izrailjoskire čhavé kerdé čoripén i lyné sovlahadestyr (prokošnestyr): Ahano Xarmijaskiro čhavó, Zavdijaskire-čhavéskiro, Zarakire čhavéskiro, Judáskire rodycóstyr, lyjá sovlahadestyr, i xolý Ráskire-Devléskiri zahačíia pe Izrailjoskire čhavénde.

²Isúso (Johošuá) Jerihonostyr bičhadiá manušén dro Gajo, so isyn pašýl Bief-Avieno, vastočnone Viefiljoskire rigátyr, i phendiá lénge: “Džán, obdykhen phuv”. Jone giné i obdykhne Gajo.

³I risiné ke Isúso, i phendlé léske: “Na saré manušá mek te džán, a mek te džán pašýl duj tysjoncy ci pašýl trin tysjoncy manušén, i tumé domaren Gajo; saré manušén na lýdža odorík, pal-dová so len nábut odój”.

⁴I adiáke giné odorík pašýl trin tysjoncy manušén narodóstyr; ne jone meknepe dro našyben Gajoskire manušéndyr.

⁵Manušá Gajoskire zamardé léndyr ke trijánda šov manušén, i tradyne len vudarendyr ke / žýko Sievarimo, i domardé len pe zmekiben bergátyr; sóstyr iló manušéngiro rozbiladia i jaciá, syr paní.

⁶Isúso roskustia ídi péskire, i pyjá péskire mósa pe phuv angíl Ráskiro-Devléskiro kovčego, i pasijá ke bel'vél', jov i Izrailjoskire phurydyrá, i občhuvenas prahosa péskire šeré.

⁷I phendiá Isúso: “Ne, Rajo Dévla, Xulájo! Vaš so Tu pirilydžijan adalé manušén pir Iordáno, sob (kaj) te otdes amen dre Amoriejéngire vastá, i te xasiakires amen? Ne, kóli by ame te jačaspe i te dživás pal Iordáno!

⁸O, Rajo Dévla! So mánge te phenáv paló davá, syr Izrailjo risijá dumesa ke péskire vérgi?

⁹Hananiei i saré phuvjákire manušá ušunena, i obdžana saré rigéndyr amen, i xasiakirena lav amaró phuvjátyr. I so skeresa tedy lavéske Tyréske bareske?”

¹⁰Raj Devél phendiá Isusóske: “Uštý, vaš so tu pyjan pe muj tyró?

¹¹Izrailjo kerdiá grého, i piriginé jone Miro zavieto, savó Me dyjom lav lénge; i lyné sovlahadestyr, i čorde, i shačkirdé, i čhudé maškír péskire vieščy (viešča).

¹²Paldavá Izrailjoskire čhavé na mogindlé te vyterdjon angíl péskire vergénde, i sykade paluj (tylo) péskire vergénge, pal-dová so jone popyne tel sovél (prokošybén); Me na javáva butýr tuménca, kóli na xasiakirena péstyr zasovlahades.

¹³Uštý, obsvencyn manušén i phen: obsvencynenpe ke zlóko (ránko); pal-dová so adiáke rakiréla Raj Devél, Devél Izrailjoskiro: sovlahado isyn maškír túte, Izrailjo: paldavá tu na moginésa te zaterdjos angíl vergénde tyrende, paka protradesa péstyr zasovlahades.

¹⁴Atasiá poddžan saré pir tumaró ródyco, savó uphenela Raj Devél, mek te poddžál pir kherítko ródo (pliemjo); kherítko ródo, savó uphenela Raj Devél, mek te poddžál pir čékar' (siemieistvo), saví uphenela Raj Devél, mek te poddžál pir jekhe manušéste.

¹⁵I manušés ugaljona, kon čordia sovlahadestyr, mek les te shačkiren jagása, les i saró, so léste, pal-dová so jov pirigija Ráskire-Devléskiro zavieto i kerdiá proti zakóno maškír Izrailjo.

¹⁶Isúso, uštyjá tasiárles (ránes) rankosa, i phendiá te poddžál Izrailjoske pir léskiro ródyco; i sys uphendló ródyco Judáskiro.

¹⁷Korigedýr (pozže) phendiá te poddžál Judáskire kheritkoné rodóske; i uphendló kherítko ródo Zarakiro. Phendia te poddžál Zarinoskiro rodóske pir čékar', i sys uphendly sys čékar' (siemieistvo) Zavdijoskiri.

¹⁸Phendia te poddžál léskire čekarjake pir jekhe manušéste, i sys uphendló Ahano, Xarmijoskiro čhavó, Zavdijoskiro čhavó, Zarakiro čhavó, Judáskire rodycóstyr.

¹⁹Tedy Isúso phendiá Ahanoske: “Miro čhava! Vozde Ráske-Devléske, Izrailjoskire Devléske sláva, i priĥaljovpe angíl Léste, i de te džináv mánge, so tu kerdián; na sčhakir mándyr”.

²⁰Dre otphenybén Isusóske Ahano phendiá: “Čačunés, me kerdjom grého angíl Raste-Devléste, Devléste Izrailjoskireste i kerdjom dová i dová.

²¹Maškirál doresybén (dobyča) jekh šukár Sienaaroskiri ídia, i duj šelá šékieli rup, i kotér (kusko) suvnakáj vagasa dre pandždešá šékieli; davá mánge pokamdiape, i me lyjom davá; i gada, jov isyn garadó dre phuv maškirál mirí šátra, i rup tel láte”.

²²Isúso bičhadiá manušén, i jone prastándyne dre šátra; i ĥáda, saró davá sys garadó dre léskiri šátra, i rup tel láte.

²³Jone lyné davá šatratyr, i jandlé ke Isúso i ke saré Izrailjoskire čhavé, i čhudé angíl Raste-Devléste.

²⁴Isúso i saré Izrail'tiáni lésa lyné Ahanos, Zarijoskire čhavés, i rup, i ídia, i kotér suvnakái, i léskire čhavén, i léskire čhajén, i léskire guruvén, i léskire oslen, i léskire bakrén, i léskiri šátra, i saró, so léste sys, i vylydžiné len pe dólo Ahoroskiro.

²⁵I phendiá Isúso: “Pal dová, so tu jandian pe aménde bída, Raj Devél pe túte janéla bída dre davá dyvés”. I mardé les saré Izrail'tiáni barénca, i shačkirdé len jagása, i čhurdyné pe lénde bará.

²⁶I čhurdyné pe léste bari kuča bará, saví isyn i ke davá dyvés. Paló davá štylyja Raskiri-Devléskiri xolý. Paldavá dová štéto sys khardo dolosa Ahor adiáke-pac' ke davá dyvés.