Read Biblija - Pe Baltitko Romani čib (Romanes) 2019 Baltic Romani Bible Isúso 8 Bible Online

Isúso 8 - Biblija - Pe Baltitko Romani čib (Romanes) 2019 Baltic Romani Bible bible

Isúso 8

¹Raj Devél phendiá Isusóske: “Na dar i na strahadjov; le pésa saré manušén, savé isyn lačhé ke maribén, i uštyi, džá ke Gajo; ĥáda, Me otdáva dre tyré vastá Gajoskire kralís i léskire manušén, léskiro fóro i léskiri phuv.

²Ker Gajosa i léskire kralísa dová-pac', so tu kerdián Jerihonosa i léskire kralísa, jekh léskiro doresybén i léskire kherítka murdalá (skoto) roskeren péske. Ker zasada pal fóro”.

³Isúso i saré manušá, savé sys lačhé ke maribén, uštyné, sob (kaj) te džas pe Gajo; i vykedyjá Isúso trijánda tysjoncy manušén murškanen, i bičhadiá len ratý.

⁴I dyjá lénge uphenybén, i phendiá: “Dykhén, tumé javéna te čhuvén zasada pašýl fóro paló fóro; na džán dur foróstyr, i javén saré skedyné.

⁵A me i saré manušá, savé isyn mánca, poddžasa ke fóro. I, kiéli Gajoskire manušá vydžána proti aménde, syr i angledýr, tedy ame našasa léndyr.

⁶Jone džána pal aménde, adiáke so ame otlydžasa len foróstyr; pal-dová so jone phenéna: “Našéna améndyr, syr i garedyr, kiéli ame našasas léndyr,

⁷to tedy tumé uštena zasadatyr i zalena fóro; i Raj Devél, Devél tumaró, otdéla les dre tumaré vastá.

⁸Kiéli léna fóro, zahačkiren fóro jagása, pir lav Devléskiro kerén. Dykhén, me rakiráva tuménge”.

⁹Adiáke bičhadiá len Isúso, i jone giné dre zasada, i garadyne maškír Vieflijemo i maškír Gajo, palatuné Gajoskire rigátyr; a Isúso dre doiá rat rat'kirdia maškír manušénde.

¹⁰Uštyi tasiárles (ránes) pe ránko, Isúso obdykhcia manušén, i gijá jov i Izrailjoskire phurydyrá angíl manušénde ke Gajo;

¹¹I saré manušá, godna ke maribén, savé sys lésa, giné, podginé pašedyr i giné ke fóro.

¹²I čhudiá stáno paš-ratitkoné (sieviernone) Gajoskire rigátyr, a maškír léste i Gajoste sys dólo. Korigedýr (pozže) jov lyjá pašýl pandž tysjoncy manušén i čhudiá len dre zasada maškír Vieflijemo i Gajo, palatuné foróskire rigátyr.

¹³I manušá čhudé saró stáno, savó sys paš-dyvesytkoné foróskire rigátyr adiáke, so palatuny (o) pašýl sys foróskire palatuné rigátyr. I gijá Isúso dre doiá rat maškirál loščýna.

¹⁴Kiéli dykhciá davá králi Gajoskiro, savó sys dová-pac' momiento foróskire manušénca, jov uštyi tasiárles (ránes), vygijá pe Izrailjo pe maribén, jov i saré léskire manušá, pe uphendló štéto angíl loščýna. Ne jov na džindiá, so vaš léske isyn zasada (zabešyben) pal fóro.

¹⁵Isúso i saró Izrailjo, xaj (sýrby) domardé lénca, našné pe čhučí phuv.

¹⁶A jone khardé ke pe saré manušén, savé sys dro fóro, sob (kaj) te tradén len; i, tradyi Isusós, otginé dur foróstyr.

¹⁷Dro Gajo i Viefíljo na jaciápe ni jekhe manušés, savó na tradyjape pal Izrailjo. I fóro péskiro jačkirdé otčhakirdesa, tradyi Izrailjo.

¹⁸Tedy Raj Devél phendiá Isusóske: “Protyrde čhurdybnytko bust (kop'jo), saví isyn dre tyró vast, ke Gajo, pal-dová so Me otdáva les dre tyré vastá”. Isúso protyrdyjá čhurdybnytko bust, saví sys dre léskiro vast, ke fóro.

¹⁹Manušá, savé bešté sys dre zasada, sýges uštyné péskire štetóstyr i prastándyne, syr syg jov protyrdyjá péskiro vast, zaginé dro fóro, i lyné les, i sýges zahačkirde fóro jagása.

²⁰Manušá Gajoskire dykhné pale, i dykhné, so thuv foróstyr ĥazdélape ke bolybén. I na sys vaš lénge štéto, karik by te našén, ni odorík, ni adarík; pal-dová so manušá, savé našné pe čhučí phuv, risiné pe adalé manušénde, savé tradynepe pal lénde.

²¹Isúso i saró Izrailjo, dykhné, so manušá, savé sys bešté dre zasada, lyné fóro, i thuv foróstyr ĥazdelaspe ke bolybén, risiné i lyné te marén Gajoskire manušén.

²²A dalé foróstyr vyginé gil lénge, adiáke so jone sys maškirál Izrail'tianende, savé jekh sys dolé rigátyr, a javír javirjatyr. Adiáke mardé len, so na jačkirdé ni jekhés léndyr, džides ci znašibnaris.

²³A kralís Gajoskires lyné džides, i jandlé les ke Isúso.

²⁴Kiéli Izrail'tiáni domardé sarén manušén Gajoskiren pe félda, pe čhučí phuv, karik jone tradyne len, i kiéli saré jone ke palatunó manúš pyné kurtalátyr, to tedy saré Izrail'tiáni risiné ke Gajo, i domardé les kurtalása.

²⁵Mulen dro dová dyvés muršén i džuvlién, sarén Gajoskire manušén, sys dešudúj tysjoncy.

²⁶Isúso na obmekcia péskiro vast, savó protyrdyjá čhurdybnytko bust, paka na otdyjá sovlahake (prokošybnaske) saré Gajoskire manušén.

²⁷Jekh kherítka murdalá (skoto) i doresybén (dobyča) dalé kheritkoné murdalén foróskiro, Izrailjoskire čhavé roskerde maškír péste, pir Raskir-Devléskiro lav, savó Raj Devél phendiá Isusóske.

²⁸I shačkirdiá Isúso Gajo, i kerdiá les dre viekoskire rosčhurdypena (ruíny), pe čhučí phuv, ke davá dyvés.

²⁹A kralís Gajoskires ubladia pe veš, ke bel'vél': kiéli zagijá kham, to priphendiá Isúso, i zlyne les mules vešéstyr, i čhurdyné les pašýl foróskire vudará, i čhurdyné pe léste bari kuča bará, saví isyn ke davá dyvés.

³⁰Tedy Isúso kerdiá altárjo (žertvieniko) Ráske-Devléske, Izrailjoskire Devléske, pe bérga Gievalo.

³¹Syr rakirdiá Mójza, pishári Ráskire-Devléskiro, Izrailjoskire čhavénge, pal so isyn začhindló dre Mojzáskire-zakonoskiri lylvarí, — altárjo (žertvieniko) barendyr celonendyr, pe savé na ĥazdyné sastyrá; i jandlé pe léste célo shačkiribén Ráske-Devléske, i kerdiá svénta mirna janybená.

³²I čhindiá Isúso odój pe bará sčhinybnytko (spisko) Mojzáskire Zakonóstyr, savó jov začhindiá angíl Izrailjoskire čhavénde.

³³Saró Izrailjo, phurydyrá léskire, i dykhibnarja léskire i sendárja, terdiné dolé i javire rigátyr kovčegoskire proti rašande i Lievitende, savé lydžánas Ráskire-Devléskiro zavietóskiro kovčego, syr manušá javire rigátyr, adiáke i dalé-phuvjákire manušá, jekh léngiri paš mamúj bérga Garizimo, a javír paš pašýl bérga Gievalo, syr angledýr rakirdiá Mójza, pishári Ráskiro-Devléskiro, te bahtiakires Izrailjoskire manušén.

³⁴I korigedýr (pozže) Isúso gindia dre zan saré Zakonóskire lavá, bahtiakiribén i prokošybén, syr sys začhindló dre lylvarí Zakonoskiri.

³⁵Saréstyr, so Mójza rakirdiá Isusóske, na sys nijékh lav, savó Isúso na progindia angíl saró Izrailjoskiro skedyibén i džuvliende, i čhavénde, i manušénde, savé javné javire rigátyr, i dživéna maškír lénde.