Read Biblija - Pe Baltitko Romani čib (Romanes) 2019 Baltic Romani Bible Isúso 9 Bible Online

Isúso 9 - Biblija - Pe Baltitko Romani čib (Romanes) 2019 Baltic Romani Bible bible

Isúso 9

¹Šundlé davá saré králja, savé sys pal Iordáno, pe bérga i pe loščýna i pir saró baré morjoskiro (derjavéskiro) brégo, nádur Livanostyr, Xietiei, Amoriei, Xananiei, Fierieziei, Jeviei i Jevusiei,

²i skedynépe khetané, sob (kaj) pal jekh te marénpe Isusósa i Izrailjosa.

³Ne kiéli Gavaonoskire manušá šundlé, so Isúso kerdiá Jerihonosa i Gajosa,

⁴to kerdé mendres: giné, skedyné maró pe drom i čhudé phurané goné pe péskire oslende i phurané, pokušne i lapikenca goné vaš mol (vino);

⁵i ĥeritka pe léngire ĥerá sys phurané lapikenca, i ídia pe lénde sys phurany; i saró léngiro dromitko maró sys šuko i pliesnivo.

⁶Jone javné ke Isúso dre Izrailjoskiro stáno dre Galgálo i phendlé léske i saré Izrail'tianenge: “Drieván duratuné phuvjátyr javdiám ame; i adiáke kerén aménca dorakiribén”.

⁷Izrail'tiáni phendlé Jeviejenge: “Moginel (saštý) te javél, so tumé dživéna pašýl aménde? Syr aménge te kerás tuménca dorakiribén?”

⁸Jone phendlé Isusóske: “Ame sam tyré dynárja. Isúso phendiá lénge: “Kon tumé san, i katýr tumé javné?”

⁹Jone phendlé léske: “Drieván duratuné phuvjátyr javné tyré dynárja dro lav Ráskire-Devléskire, tyré Devléskiro tyreskire; pal-dová so ame šundiám sláva Léskiri i saró, so kerdiá Jov dre Jegípto,

¹⁰i saró, so Jov kerdiá duje Amoriejéngire kral'jenge, savé sys pir doiá Iordanoskiri rig, Sigonoske, Jesievonoskire kralíske, i Ogoske, Vasanoskire kralíske, savó dživdiá ke Astarofo.

¹¹Ušuny davá, phurydyrá amaré i saré amaré-phuvjákire manušá, phendlé aménge: “Len dro péskire vastá maró pe drom, i džán gil lénge, i phenén lénge: ame sam dynárja tumaré; i adiáke kerén lénca dorakiribén.

¹²Davá maró amaró kherendyr amarendyr ame lyjam tato dre dová dyvés, kiéli gijam ke tumé; a akaná, ĥáda, jov kerdiápe šuko i zapliesnindia.

¹³I dalé goné moliasa (vinosa), savé sys neve ame čhudiam pherdés, ĥáda, roskušnepe; i daja ídia amarí, i ĥeritka amaré phuranyne drieván (zbit) duratuné droméstyr”.

¹⁴Izrail'tiáni lyné léngiro maró, a Rástyr-Devléstyr na phučné.

¹⁵I kerdiá Isúso lénca ramánjo (miro), i kerdiá lénca dorakiribén dre dová, so jov zrakhéla lénge džiibén; i sovlahade lénge skedyibnaskire barydyrá.

¹⁶A pirdál trin dyvesá, syr jone kerdé lénca dorakiribén, to šundlé, so jone léngire pašatuné/susiédy (kotárja) dživéna nádur léndyr.

¹⁷Pal-dová so Izrailjoskire čhavé, gii dre drom, javné dre léngiro fóro pe tríto dyvés; fórja léngire sys: Gavaóno, Kiefira, Biejerofo i Kiríaf-Iarimo.

¹⁸Izrailjoskire čhavé na mardé len, pal-dová so skedyibnaskire barydyrá sovlahade lénge Rása-Devlésa, Devlésa Izrailjoskiresa. Paldavá saró Izrailjoskiro skedyibén zadyja gódla pe barydyrende.

¹⁹Saré barydyrá phendlé saré skedyibnaske: “Ame sovlahadiam lénge Rása-Devlésa, Izrailjoskire Devlésa, i pal-dová aménge naštý (na moginasa) te čilavas len;

²⁰a ĥáda, so kerása lénca: jačkirasa len džidenca, sob (kaj) te na lathtel amen xolý pal sovláh, savjása ame sovlahadiam lénge”.

²¹I phendlé lénge barydyrá: “Mek jone te dživén, ne javéna te čingiren kaštá i pheren paní vaš saró skedyibén”. I kerdiá saró skedyibén adiáke, syr phendlé lénge barydyrá.

²²Isúso khardiá len ke pe i phendiá: “Vaš so tumé xohade amen, pheny: ‘Me drieván dur tuméndyr’, tedy syr ža tumé dživéna nádur améndyr?

²³Paldavá prokošne san tumé! Saró džiibén tumé javéna dynar'jénca; javéna te čingiren kaštá i te pheren paní vaš kher miré Ráskiro-Devléskiro!”

²⁴Jone dro otphenybén Isusóske phendlé: “Dogijá ke džinybén tyré dynar'jengiro, so Raj Devél, Devél tyró, phendiá Mojzáske, Péskire pisharíske, te del tuménge sarí phuv i te muliakirél sarén dalé phuvjákire manušén angíl tumaró muj: pal-dová ame drieván dardiampe, sob (kaj) tumé te na otlen amaró džiibén, i ame kerdiám davá réndo.

²⁵Kakaná ĥáda, ame sam dro tyró vast. Syr fedýr i čačunés túke bicialó te kerés aménca, adiáke i ker”.

²⁶I jov, Isúso (Johošuá), kerdiá lénca adiáke: zrakhciá len Izrailjoskire-čhavéngire vastéstyr, i jone na muliakirdé len.

²⁷I phendiá dro dová dyvés Isúso, sob (kaj) jone te čingiren kaštá, i te čhuvén paní vaš skedyibén i vaš Ráskiro-Devléskiro altárjo, — adiáke-pac' ke davá dyvés, pe štéto, savó by te na vykedel Raj Devél.