Read Biblija - Pe Baltitko Romani čib (Romanes) 2019 Baltic Romani Bible 2 Fiesalonikiicenge 1 Bible Online

2 Fiesalonikiicenge 1 - Biblija - Pe Baltitko Romani čib (Romanes) 2019 Baltic Romani Bible bible

2 Fiesalonikiicenge 1

¹Pavlístyr, Siluanostyr i Ximastyr (Timofiejostyr) Fiesalonikiicengire-khangirjákire patiaibnaskirenge, savé isyn Devléskire, amaré Dadéskire i Ráskire-Devléskire, Isusóskire Xristosóskire manušá.

²Mek bahtalypén i ramánjo Devléstyr amaré Dadéstyr i Rástyr-Devléstyr, Isusóstyr Xristosostyr te javél tuménca.

³Pšalále, aménge trej saró časo te parikiras Devléske pal tuménde pir čačipén, pal-dová so tumarí patýv ke javír manušá barjola i tumarí patýv jekh ke jekh jačéla butedýr;

⁴adiáke, so ame kokoré šarasape tuménca pir Devléskire khangirja tumaré vyrikiribnasa i patiaibnása dre saré tradypena i bidy, savé tumé piridživde;

⁵davá isyn dophenybén doléske, so javéla čačunó Devléskiro séndo, sob (kaj) tumé te javén mol te zadžán dro Devléskiro Kralipén, vaš savó tumé i menčynenape;

⁶Devél isyn čačunó, i Jov čhuvéla bída pe odolé manušénde, savé kerdé bída tuménge;

⁷i tuménge, savé piridživde bída pal patiaibén, Devél déla ramánjo (miro) khetané aménca, kiéli javéla Raj Devél, Isúso Bolybnáskire Rajostyr, Léskire zorjakire Jangolenca,

⁸iagása, saví javéla te xačol, Jov otdéla pale sendosa odolé manušénge, savé na prilyné Devlés i na kandyné amaré Ráskire-Devléskiri, Isusóskire Xristososkiri bahtalý zan (zvies');

⁹pe lénde javéla kára Devléstyr viečnone xasibnasa i ugiibnasa Rástyr-Devléstyr i Léskire slavakire zorjátyr:

¹⁰dro dová dyvés, kiéli Jov javéla, sob (kaj) Jov te javél slavindlo maškír Péskire sventonende i maškír sarénde, kon upatiandyja, pal-dová so tumé upatiándyne amaré dophenybnaske.

¹¹Vaš davá ame saró časo i mangasape Devléske pal tuménde, sob (kaj) amaró Devél te kerél tumen te javén mol dalé džiibnaske, vaš savó Jov prikhardia tumen i te kerél Péskire zorjása pir Péskiri láska kažno lačhó réndo pir patiaibén dre Léste,

¹²sob (kaj) te javél slavindlo amaré Ráskire-Devléskiro Isusóskiro lav dre tuménde, adiáke-pac' i tumé dre Léste pir bahtalypén amaré Devléskiro i Ráskire-Devléskiro, Isusóskire Xristosóskiro.