Read Biblija - Pe Baltitko Romani čib (Romanes) 2019 Baltic Romani Bible 2 Fiesalonikiicenge 2 Bible Online

2 Fiesalonikiicenge 2 - Biblija - Pe Baltitko Romani čib (Romanes) 2019 Baltic Romani Bible bible

2 Fiesalonikiicenge 2

¹Ame drieván mangasa tumen, pšalále, te na kuninenpe dro dová, so amaró Raj-Devél, Isúso Xristóso javéla, sob (kaj) te skedel amen ke Pe.

²I sob (kaj) tumé te na sygnjon te zdžan godiatyr ci i te na piridživen pal duhoskiro sykaibén, ni lavéstyr, ni lylestyr, sýrby davá ame bičhadiam, savé vyphenena, so Ráskire-Devléskiro dyvés kakaná javdiá.

³Dykhén, sob (kaj) nijékh te na xohavél tumen: pal-dová so kadavá dyvés na javéla ke / žýko dová časo, paka javéla otgiiben Devléstyr i javéla sykado grehengiro manúš, savéske trej te xasjol;

⁴jov javéla te džal proti saró svénto, so kharéna Devlésa ci sventymasa, adiáke, so jov bešéla dre Devléskiri Khangirí sýrby Devél i javéla te vydel pes pal Devléste.

⁵Naúšto tumé na ripirena, so me, kiéli sómas ke tumé, rakirdjom tuménge pal davá?

⁶I kakaná tumé džinéna, so na domekela les te sykavél pes dro léskiro časo.

⁷Pal-dová so čorahany bizladoskiri zor kakaná keréla butý, i jekh paka obrikirela saró davá, i jov javéla te kerél davá ke/žýko dová časo, paka léna les krig.

⁸I tedy bi zakonoskiro grehengiro manúš sykavéla pes, savés Raj Devél Isúso zamarela (muliakiréla) Péskire ušténca, kiéli javéla.

⁹Bizakonoskiro manúš javéla nalačheskire zorjása, jov javéla te sykavél bari zor, i xohané znamiénii (ĥiertyká) i dívy,

¹⁰jov javéla saré xohaibnasa vaš manušénge, savé xasjona pal dová, so jone na prilyné čačuný patýv vaš péskiro zrakhibén.

¹¹I pal davá Devél bičhavéla zor lénge, sob (kaj) jone te perén tel došvale sykliakiribén i te patián xohaibnaske.

¹²Mek te javén sendindle saré, kon na zakamdiá te patial čačipnaske, ne vykedyjá načačipén.

¹³Ne aménge trej, pšalále, saró časo te parikiras Devléske pal tuménde, savén Raj Devél vykedyjá, pal-dová so Jov angledýr vykedyjá tumen vaš zrakhibén pir Duhoskiri zor i patiaibén dro čačipén;

¹⁴ke savó Jov i khardiá tumen pir amaró rosphenyben pal bahtalý zan (zvies'), sob (kaj) tuménde te javén paš dre sláva amaré Ráskire-Devléskiri, Isusóskire Xristososkiri.

¹⁵I paldavá, pšalále, javén zoralé pir dúho (fáno) i rikirenpe uphenybnaske, savéske tumé sánas vysykliakirde, ci pir lav, ci pir amaró lyl.

¹⁶Mek Kokoró amaró Raj Devél, Isúso Xristóso, i Devél amaró Dad, Savéske jaciám dróga ame i dyjá pir bahtalypén viéčno podrikiribén i lačhí nadiéia,

¹⁷te podrikirél tumaré ile i te kerél zoraledýr tumen dro kažno lav i lačhó réndo.