Read Biblija - Pe Baltitko Romani čib (Romanes) 2019 Baltic Romani Bible 1 Ximaske 1 Bible Online

1 Ximaske 1 - Biblija - Pe Baltitko Romani čib (Romanes) 2019 Baltic Romani Bible bible

1 Ximaske 1

¹Pavlístyr, Isusóskire-Xristosóskire Apostolostyr, savés vykedyjá Devél, amaró Zrakhibnari (Spasitieljo) i Raj Devél, Isúso Xristóso, pe savéste me nadieinasape,

²Himaske, čačuné čhavéske dro patiaibén: mek te del bahtalypén, tangipén i ramánjo túke, amaró Devél Dad i amaró Raj Devél, Isúso Xristóso.

³Kiéli me skedavaspe te tradav ke Makiedonija, me zoralés mangdjom tut te jačespe dre Jefiesija i te priphenes odolé manušénge te na sykliakirén javír sykliakiribén,

⁴i te na šunén léngire paramysítka i rosphenybena pal vari-konéskiro ródo bi koncoskiro (bi jagoroskiro), savé keréna butýr čingárd, syr sykliakiréna pal Devléskiro patiaibén.

⁵Davá priphenybnaskiro čačipén isyn dro patýv ke javír manušá žužé iléstyr i lačhé patyvatyr i čačuné patiaibnastyr,

⁶vari-savé manušá durine dalé droméstyr, i lyné te zalenpe čhučé (pustone) rakiribnasa,

⁷jone zakamle te javén Zakonóskire sykliakirdé, ne jone kokoré na džinéna ni dová, pal so jone rakiréna, ni dová, so jone dophenena.

⁸Ne ame džinása, so Zakóno isyn lačhó, kóli vari-kon keréla pir Zakóno,

⁹ame džinása, so Zakóny isyn sčhude na vaš patiaibnytkone manušéske, a vaš odolénge, savé keréna na pir Zakóno, i savé na kandéna, i savé na patiána Devléske, i savé keréna gréhi, i savé isyn bidevlytkarja, i savé isyn magirdé, i savé ĥazdéna vast pe péskire dadéste ci date, i savé muliakirena manušén,

¹⁰savé dživéna džuvliénca bi sevlakiro, savé dživéna muršenca syr džuvliénca, savé čorena manušén, savé isyn xohaibnarja, savé sovlahana xohanés syr jakhítka.

¹¹Adiáke uphenela pe lénde slavútno bahtalý zan amaré bahtiakirde Devléskiri, saví sys dopatiandly mánge te rosphenav.

¹²I me parikirava miré Ráske-Devléske, Isusóske Xristosóske, Savó dyjá mánge zor, so Jov priĥalyja man patiaibnytkonesa i dyjá mánge te dynarinav Léske,

¹³mánge, savó angledýr teliakirdia Devlés, i tradyjá devlytkoné manušén, i kerdjom čoripén lénge: ne Devél primangdia mánge, pal-dová so adiáke kerdjom pir nadžinyben i pir napatiaiben.

¹⁴Ne bahtalypén amaré Ráskiro-Devléskiro sys sykado ke me dro saró lákiro barvalypén, vykedyibnasa i ilésa dre Isusóste Xristosóste.

¹⁵Kadavá lav isyn patiaibnýtko, so Isúso Xristóso javdiá dro svéto te zrakhél griehitkonén, savéndyr me som naj fujedýr.

¹⁶Ne vaš davá mánge sys primangne gréhi, sob (kaj) Isúso Xristóso te sykavél dre mánde pervoneste saró dlugo vyrikiriben, sob (kaj) te dykhén odolé, savé javéna te patián dre Léste ke viéčno džiibén.

¹⁷Viečnone Kralíske, savó nijékhvar na meréla i dživéla dre saré viéki, Nabicialeske i Jekhdžineske Devléske, mek te javél patýv i sláva dre saré viéki.

¹⁸Me dáva túke davá uphenybén, čháva miro Xima, syr angíl sys phendló pal túte, sob (kaj) te rikirespe ke dalé lavá i te mogines te lydžas svénto maribén,

¹⁹i te rakhés patiaibén i lačhí patýv, saví vari-savé manušá xasiakirdé, i léngiro patiaibén rospyjape,

²⁰maškír lénde sys Imieniejo i Lieksandro (Alieksandro), savén me otdyjom nalačheske, sob (kaj) jone te na teliakiren Devlés.