Read Biblija - Pe Baltitko Romani čib (Romanes) 2019 Baltic Romani Bible 1 Ximaske 3 Bible Online

1 Ximaske 3 - Biblija - Pe Baltitko Romani čib (Romanes) 2019 Baltic Romani Bible bible

1 Ximaske 3

¹Čačunó isyn lav, kóli kon zoralés kaméla te javél khangirjákiro barydyró (jepiskopo), adavá manúš mangéla te kerél lačhí butý.

²Ne khangirjákire barydyréske trej te javél bidošakireske, jekhe — romniakiro rom, savó džinél pes te rikirél dre vastá, god'varó, te javél léste patýv ke pe, savó priléla manušén ilésa, i te javél lačhó sykliakiribnáskiro (učitieljo);

³te na javél matymari, te na javél zahalo, ne te javél kovlé-ilytko, te javél ramanjono (mírno), te na javél ĥálko ke lové,

⁴savó isyn xuláj pe péskiro kher, konés čhavé kandéna, lydžána pes pir čačipén;

⁵pal-dová so, kóli vari-kon nane xuláj dro péskiro kher, syr adavá manúš javéla te dykhél pal Devléskiri Khangirí?

⁶Te na javél khangirjákiro barydyró odolé manušéndyr, savé naĥara upatiándyne dre Devléste, kadavá savó manúš moginéla te zaphutjol, i te perél tel séndo syr nálačho.

⁷Léste trej te javél lačhó dophenybén maškír manušénde, savé nane khangirjátyr, sob (kaj) léske te na poperel tel xoliamó saben i dre nalačheskiri felý.

⁸Khangirjákire butiarnenge (diakonenge) adiáke-pac' trej te javén čačuné, te na javén jone dujemuitka, te na p'jen but mol, i te na javén ĥalka (žadna) ke lové,

⁹vaš dová, sob (kaj) jone te rakhén sykado patiaibnaskiro garadó čačipén žužé patyvása, savó sys sykado.

¹⁰I adasavé manušén adiáke-pac' angledýr trej te propatiakires, i kóli lénde nane nisaví doš, tedy jone moginéna te dynarinén (te služynen).

¹¹Adiáke-pac' i léngire džuvlienge trej te lydžán pes pir čačipén, te na bangiakiren nikonés xohanés, te na p'jen, i te javén patiaibnytka dro saró.

¹²Khangirjákire butiarneske trej, sob (kaj) jov te javél jekhe-romniakiro rom, savó isyn lačhó xuláj péskire čhavénge i kheréske:

¹³pal-dová so odolé manušá, savé šukár dynarinena, ke jone isyn baró kutiakiriben i jone murškanés rakiréna pal patiaibén dre Isusóste Xristosóste.

¹⁴Kadavá lyl me čhináva túke, i duminava, so me syg javáva ke tu;

¹⁵ne kóli me zarikiravpe, sob (kaj) tu te džinés, syr trej te lydžas pes dre Devléskiro Kher, savó isyn džidé — Devléskiri Khangirí, saví isyn šeraló bar i fundámiento vaš čačipén.

¹⁶I saré priĥalyne, so baró garadó čačipén isyn dro amaró devlytkimakiro patiaibén: Devél javdiá dre manušýtko loč (plot'), Dúho (Fáno) priĥalyja Les čačunesa, sykadiá Pes Jangolenge, pal Léste rosphendlé maškír saré manušénde, dre Léste upatiandyja svéto i Jov sys lynó upré dre sláva pe bolybén.