Read Biblija - Pe Baltitko Romani čib (Romanes) 2019 Baltic Romani Bible 1 Ximaske 4 Bible Online

1 Ximaske 4 - Biblija - Pe Baltitko Romani čib (Romanes) 2019 Baltic Romani Bible bible

1 Ximaske 4

¹Dúho (Fáno) mamúj rakiréla, so dro palatunó (posliednjo) časo but manušá mekéna te patián, léna te kandén xohané dúhi i te šunén benglane-duhengiro sykliakiribén;

²kadavá sykliakiribén rosphenena dujemuitka xohaibnarja, savé xasiakirdé sarí ladž, sýrby vari-kon shačkirdiá la,

³i adalé manušá zaphenena te lenpe, i te na xan saró, so sozdyjá Devél vaš dová, sob (kaj) patiaibnaskirenge, i kon udžindiá čačipén, te xan saró parikiribnasa.

⁴Pal-dová so saró, so sozdyjá Devél, isyn lačhó i saštý saró te xas, kóli ame parikirasa pal xabén,

⁵pal-dová so saró xabén jačéla žužó pir Devléskiro lav i mangipén.

⁶Kóli tu javésa te sykliakires kadavá uphenybén pšalénge, tu javésa lačhó khangirjákiro dynári Isusóske Xristosóske, i tu javésa čarado patiaibnaskire lavénca i sykliakiribnasa, savó tu pherdés kerdián ke kónco/iagóro (spolnindian).

⁷Rakhpe magirdé rakiribnendyr, i phuré-džuvliengire paramysiendyr, ne sykljov te dživés darása angíl Devléste.

⁸Pal-dová so, kon zalelape péskire muskulenca i masenca, davá léske zorjakirela léskire masá-davá isyn nabaró lačhipén, ne kon dživéla darása angíl Devléste, odová janéla lačhipén pir saró i déla nadiéia dro davá svéto i dre dová, so javéla angíl.

⁹Kadavá lav isyn patiaibnýtko, jov isyn mol te prilel les,

¹⁰vaš davá ame i kerása daja butý i sýrby marasape, so ame čhuvasa nadiéia pe džidé Devléste, Savó isyn sarengire-manušéngiro Zrakhibnari, ne butýr kodolénge, kon patiála dre Léste.

¹¹Phen zoralés davá manušénge i sykliákir len.

¹²Mek nijékh te na dykhél vučipnástyr pe túte pal tyró ternypen; ne sykáv pes devlytkonesa patiaibnaskirenge dro lav, dro džiibén, dre patýv ke javír manušá, dro dúho (fáno), dro patiaibén, dre žužyma.

¹³Gin Svénto Čhinybén, podrikir manušén, i sykliákir len ke davá časo, paka me javáva.

¹⁴Prilé ilésa taláno, so isyn dre túte, savó sys dynó túke prorokendyr, pir savó kerdé rašaja, kiéli jone čhudé upré vastá pe túte.

¹⁵Dykh pal davá, otdé pes pherdés daleske, sob (kaj) te javél bicialy tyrí butý vaš sarénge.

¹⁶Dykh ciamkes pal péskiro džiibén i sykliakiribén, ker davá saró časo, kóli tu adiáke javésa te kerés, zrakhésa pes i kodolé manušén, savé šunéna tut.