Read Biblija - Pe Baltitko Romani čib (Romanes) 2019 Baltic Romani Bible 1 Ximaske 5 Bible Online

1 Ximaske 5 - Biblija - Pe Baltitko Romani čib (Romanes) 2019 Baltic Romani Bible bible

1 Ximaske 5

¹Na sykáv bang phuré manušéske, ne otlydžape ke jov, syr ke péskiro dad, a ke terné otlydžape, syr ke péskire pšála,

²otlydžape ke phuri džuvlý, syr ke daj, ke terné džuvliá otlydžape, syr ke pheniá saré žužymasa.

³Kutiakir (uvažyn) pivlién (udoven), savé jačnépe bi romengiro čačunés;

⁴kóli vari-savjate pivliate isyn čhavé ci ŭnuki[1], to mek jone angledýr te sykljon te sykavén devlytkima ke péskiri sém'ia (irí) i ke dadá, davá isyn lačhó Devléske.

⁵A čačuný pivly i saví isyn jekhdžiny, užakiréla lačhipén Devléstyr i mangelape Devléske i mangéla Devlés dyvés i rat.

⁶Ne, odoia, saví dživéla vaš péskiro kamiben, isyn sýrby muly, na dykhí, so joj isyn džidy.

⁷I davá phen zorjása manušénge, sob (kaj) jone te javén bidošengire.

⁸A kóli vari-kon pal péskire manušénde i butýr saréstyr pal kheritkonende na dykhéla, odová manúš otphendiape patiaibnastyr i jov isyn fujedýr odoléstyr, savó na patiála.

⁹Mek ni jekh pivly te na začhinelpe dre khangirjákiri lylvarí te pomoginen láke, paka láke nane šovdešá berš, sob (kaj) láte te javél jekh rom,

¹⁰savjá džinéna pir lákire lačhé réndy, kóli joj vybarjakirdia lačhenca péskire čhavén, kóli joj prilelas čužoné manušén, savénde na sys, kaj te dživén, mordia ĥerá sventonenge, i pomoginelas odolénge, konéste sys bída, i kóli joj kakaná keréla duredýr lačhé réndy.

¹¹Na prilé terné pivlien dre khangirjákiri lylvarí te pomoginen lénge dre khangirí, pal-dová so, kiéli léngire-maséngiro kamiben jačéla zoraledýr tyrdypnastyr ke Xristóso, jone nevéstyr kaména te džán paloróm.

¹²Jone kokoré jačénape bangé, so jone mekné anglatunó patiaibén i dynó lav.

¹³I jone adiáke-pac' na keréna nisó, a psiréna pir kherá, zlydžana pljotki, resena na dre péskire réndy te rakirén dová, so nalačhés te rakirén.

¹⁴I paldavá me kamám, sob (kaj) terné pivlia, te džán paloróm te bijanen čhavorén, i te lydžán kherítko xulaiben, te na den nisavó saštypen tumaré vergoske, sob (kaj) te rakirél fuipén.

¹⁵Pal-dová so vari-savé léndyr zmardepe patiaibnaskire droméstyr i giné pal nalačheste.

¹⁶Kóli vari-savé patiaibnaskire džuvliáte isyn pivlia (udovy) kheré, mek joj te del vast lénge, i mek joj te na čhuvél pharipén pe khangirí, sob (kaj) joj del vast čačuné pivlienge.

¹⁷Mek godephuré (phuredýr pšála), savé šukár dynarinena vaš Devléske, te javén dre bari patýv, butýr saréstyr odolé, savé rosphenena Xristosóskiro lav i sykliakirén;

¹⁸pal-dová so dre svénto čhinybén isyn phendló: “Na zaker muj butiarné guruveske pe giv, i butiarno isyn mol te lel pleskiriben pal péskiri butý.”

¹⁹Na prilé bangiakiriben pe godephureste (phuredyre pšaléste) ni dro so, syr angíl dujende ci trinende jakhitkonende/ jakhalende (svidietieliende).

²⁰Manušén, savé kerdé grého, bangiakir mamúj angíl sarénde, sob (kaj) javír te darén.

²¹Me zasovlahava tut angíl Devléste i Raste — Devléste, Isusóste Xristosóste i Jangolende, savén vykedyné, te zrakhes dalé uphenybená i adiáke nisó te na paruves vaš vari-konéske, sob (kaj) ničý te na kerés pir péskiro iló.

²²Na sygnjov (na jav sýgno) te čhuvés upré vastá ni pe konéste, sob (kaj) tumé te na javes khetané manušénca, savé keréna grého i na čhuv upré vastá pe manušéste, savó naĥara lyjá te patial, rakh pes nabangesa (žužesa)

²³Duredýr na pi jekh paní, ne vypi nábut mol (vino) vaš tyró kužum i tyró často nasvalypen.

²⁴Vari-savé manušéngire gréhi isyn adiáke biciale, so jone janéna pe péste séndo angledýr odolé časostyr, savó javéla, ne javír manušéngire gréhi paka isyn nabiciale, jone džána lésa, karik i jov džála.

²⁵Adiáke-pac' i lačhé réndy isyn biciale; kóli jone nane dasavé, na moginen te javén ĥaradé.