Read Biblija - Pe Baltitko Romani čib (Romanes) 2019 Baltic Romani Bible 1 Ximaske 6 Bible Online

1 Ximaske 6 - Biblija - Pe Baltitko Romani čib (Romanes) 2019 Baltic Romani Bible bible

1 Ximaske 6

¹Mek pishárja, savé isyn sýrby tel ĥámo, te kutiakiren pherdés péskire xulan, sob (kaj) Devléskiro lav i Léskiro sykliakiribén te na kaliakiren.

²I odolé, savénde isyn patiaibnaskire xulaja, mek jone te na dykhén vučipnástyr pe lénde, pal-dová so jone isyn léngire pšála, ne mek jone fededýr te dynarinén lénge syr pishárja, pal-dová so čačuné i dróga isyn odolé, savénge isyn léndyr lačhipén. Sykliákir i phen zorjása manušénge pal davá.

³Kóli vari-kon sykliakiréla javír i na patiála dre čačuné amaré Ráskire-Devléskire, Isusóskire Xristosóskire lavá, sob (kaj) dro sykliakiribén te darel Devléstyr,

⁴to odová manúš isyn phut'kirdo, jov nisó na džinéla, léste isyn nalačhi myslia but te rozduminel i te lydžál sýrby maribén pal lavá, savéndyr džála zevlynypén, košybén, kaliakiriben, nadopatiaiben,

⁵i čhučé rakiribena maškír manušénde, savénde nane bari godý, i, savé darnape čačipnastyr, jone duminéna, so dar angíl Devléste-davá isyn drom te barvaljon.

⁶Ne isyn bari l'góta, kóli manušéste isyn dar angíl Devléste i jov isyn drieván rado saréstyr, so isyn léste.

⁷Pal-dová so ame nisó na jandiam dro davá svéto: davá čačó, so ame nisó na moginasa te las léstyr.

⁸Ne kóli ame sam čale i uridé, aménge trej i pal davá te parikiras Devléske.

⁹A manušá, savé kaména te rozbarvaljon, poddenape pe propatiakiriben i peréna dre felý, i dre but dylyné i grehítka tyrdypena, savé lydžána len ke bedytko periben i ke xasibén.

¹⁰Pal-dová so zoraló tyrdypén ke lové-davá isyn pérvo drom, so janéla kažno fuipén, isyn but manušá, savé pir bari ĥalkima ke lové otrisine patiaibnastyr i otdyné pes pe bari bída.

¹¹Tu san Devlýtko manúš, naš dalé saréstyr, róde čačipén, róde te kerés lačhipén, jav dro patiaibén, jav dre patýv ke javír manušá, jav vyrikiribnytko i kovlé-ilytko.

¹²Marpe pal lačhó patiaibén i viéčno džiibén, ke savó tut Devél khardiá, i pal savó tu patyvales priĥalyjan angíl buté jakhitkonende (svidietieliende).

¹³Me uphenava túke angíl Devléste, Savó déla sareske džiibén, i angíl Isusóste Xristosóste, Savó lačhés priĥalyja Léskiro patiaibén angíl Pontijoste Pilatoste,

¹⁴te rakhés priphenybén bibangiakiro i bidošéngiro angíl dová, syr amaró Raj Devél, Isúso Xristóso javéla,

¹⁵davá javéla dro dová dyvés, savó uphendia Léske Devél Dad, Bahtiakirdó i Jekhdžinó, sarengire-kral'jengiro Králi i Raj Devél pe saré rande,

¹⁶Savó isyn Jekhdžinó, Kon na meréla nijékhvar, Savó dživéla dro dud (svéto), karik nijékh na javéla, Saves nikón manušéndyr na dykhciá i te dykhél na moginéla. Mek te javél Léske viéčno patýv i viéčno zor. Amín'.

¹⁷Uphen dalé svetóskire barvalenge, sob (kaj) jone te na ĥazdén pes i te na patián dro péskiro barvalypén, ne fedýr te patial dre džidé Devléste, Savó pherdés déla saró, so trej vaš amarí baht,

¹⁸sob (kaj) jone te kerén lačhipén, te barvaljon lačhé rendénca, te den vast iléstyr javirénge te dielinenpe péskire barvalypnasa javire manušénca,

¹⁹skedyi péske kučipén; davá isyn lačhó fundámiento i te skedén vaš časo, so javéla vaš dová, sob (kaj) lénde te javél viéčno džiibén.

²⁰Hime, zrákh, so sys dopatiandlo túke, durjov magirdé rakiribnendyr i čhučé rakiribnendyr, i zahale lavéndyr, savé vydžána džinybnastyr, savó ginéna pal čačunó,

²¹i savó vari-savé manušá priĥalyne les i paldavá jone otginé patiaibnastyr. Mek te javél Devléskiro bahtalypén túsa. Amín'.