Read Biblija - Pe Baltitko Romani čib (Romanes) 2019 Baltic Romani Bible 2 Ximaske 3 Bible Online

2 Ximaske 3 - Biblija - Pe Baltitko Romani čib (Romanes) 2019 Baltic Romani Bible bible

2 Ximaske 3

¹Džin, so javéla pharó časo dre palatuné (posliednia) dyvesá.

²Manušá na javéna te sykavén patýv jekh jekhéske, javéna te tradenpe pal barvalypén, javéna šaribnytka, phut'kirdé, javéna te kaliakiren jekh jekhés, i na javéna te kandén péskire khangirjákire phurydyren, léndyr na šunesa parikiriben, jone javéna magirdé bidevlytkarja;

³lénde na javéla patýv ke javír manušá, jone javéna zahalé, javéna te bangiakiren javire manušén xohanés, javéna te na zrikiren pes, xolynakire, na javéla pir iló lénge lačhipén;

⁴jone javéna bikibnarja, nahrata, javéna te ĥazdén nakh baripnasa, jone javéna te ríkiren syr drógima pes butýr Devléstyr;

⁵jone javéna te sykavén angíl manušénde, so daréna Devléstyr, ne jone denape pale Léskire zorjátyr. Džá adasavé manušéndyr krig.

⁶Pal-dová so ke adasavé manušá otlydžanape kodolé, savé zadžána dro kher xohaibnasa i zlydžana džuvlién, savé isyn saré dro grého, i savén tyrdena grehítka kamibena,

⁷Kadalé džuvliá saró časo sykljona i jone nijékhvar na moginéna te udžinén čačipén.

⁸Syr Janijo (Iannijo) i Jamvrijo (Iamvrijo) sys proti Mojzaste, adiáke-pac' i jone isyn proti čačipén, nabaré-godiakire jone isyn manušá, savé risiné dumésa pe patiaibén dre Xristosóste.

⁹Ne lénge jaciápe nábut časo adiáke te dživén, pal-dová so léngiro dylnypén javéla bicialó sarénge, syr davá sys odolé manušénca, savé sys proti Mojzaste: Janijosa i Jamvrijosa

¹⁰Tu gíian pir miro drom dro sykliakiribén, dro džiibén, dro čačipén, dro patiaibén, dro dlengo vyrikiriben, dre patýv ke javír manušá, dre zor pir dúho (fáno),

¹¹dro tradypen, mén'ki, sys savé mánge dre Antióhiia, dre Ikonija, dre Listra, savé tradypena me vyrikirdjom, i saréstyr Devél zrakhciá man.

¹²I saré, kon kaméla te dživél darása angíl Devléste pir patiaibén dro jekhipén Isusósa Xristosósa, kadasaven javéna te tradén.

¹³A fuj manušá i xohané sykliakiribnarja javéna butýr te xohaven i te zalydžan dro xohaibén javire manušén i te xohaven kokoré pes.

¹⁴Ne tu jav duredýr dro dová, dro so tut sykliakirdé i dro dová, so isyn dopatiandlo túke, pal-dová so tu džinésa, kon tut sykliakirdiá.

¹⁵Tu tyknoral (dietstvostyr) džinésa Svénto Čhinybén, savó déla túke godý i lydžála tut ke zrakhibén pir patiaibén dre Isusóste Xristosóste.

¹⁶Saró Svénto Čhinybén isyn pir Devléskiro Dúho (Fáno) i déla lačhipén vaš sykliaiben, vaš vyrikiriben — kon délape dukhá, sykliakiréla te udžinel čačipén.

¹⁷Mek Devléskiro manúš te javél skedynó, i te džinél ke kerél kažno lačhó réndo.