Read Biblija - Pe Baltitko Romani čib (Romanes) 2019 Baltic Romani Bible 2 Ximaske 4 Bible Online

2 Ximaske 4 - Biblija - Pe Baltitko Romani čib (Romanes) 2019 Baltic Romani Bible bible

2 Ximaske 4

¹I paldavá me zoralés mangáva tut angíl Devléste i Isusóste Xristosóste, Savó javéla te sendiakirél džiden i mulen, kiéli Jov javéla te xulainél syr Králi,

²rosphen Devléskiro lav manušénge, dro kažno časo i kiéli nane časo, vyrakir došá, sykáv bang, prirakh saré dlenge vyrikiribnasa i sykliakiribnasa.

³Paldavá so javéla časo, kiéli manušá na javéna te pirilydžan čačunó sykliakiribén, jone kokoré javéna te vykeden péske sykliakiribnaskiren pir péskiri godý, savé javene te rakirén lénge kodová, so jone kokoré kaména te šunén.

⁴Jone otriskirena péskire kaná te šunén čačipén, a jone riskirena kaná te šunén manušéngire paramysi.

⁵Ne tu jav rakhunó dro saró, pirilydža saró čoripén, rosphen bahtalý zan (zvies'), ker pherdés péskiro dynaribén.

⁶Pal-dová so kakaná miro rat pročhuvela, syr mol vaš svénto dyibén Ráske-Devléske i javdiá miro časo te udžav kadalé svetóstyr.

⁷Me mardjompe lačhés pal čačipén vaš Ráske-Devléske, me končindjom džiibnytko drom, i me zrakhcjom patiaibén.

⁸A kakaná man užakiréla viánka čačipnytko, saví Raj Devél déla mánge, čačunó Sendári dro Dyvés, savó Jov vykedyjá, ne na jekhe mánge, ne i odolé manušénge, kon užakiréla otkerde ilésa, kiéli Jov javéla.

⁹Ker saró šukár, pričhúv zor, sob (kaj) te javes ke me sýges;

¹⁰pal-dová so Dimaso mekciá man, léske jaciá drógo kadalé — viekoskiro džiibén, i jov gijá dre Fiesalonika, Kriskiento gijá dre Galatija, a Tito dre Dalmatija.

¹¹Jekh Luka jaciápe mánca. Le Markos i jan pésa, pal-dová so jov mánge trej vaš dynaribén Devléske.

¹²A Tihikos me bičhadjom ke Jefieso.

¹³Kiéli tu javésa te džas ke me, jan miro bušlato, savó me jačkirdjom ke Troada Kaproste, i lylvaria, butýr saréstyr kodolé, savé isyn pe cýpa.

¹⁴Lieksandro, fairnari pir xarkóma (miedniko), kerdiá but čoripén, mek Devél te otdél léske pal léskire réndy (diély).

¹⁵Rakhpe i tu léstyr, pal-dová so jov sys drieván proti amaré phenybnaskire lavá.

¹⁶Kiéli me pérvo mólo zaterdjovavas pal péste, nijékh na sys pašýl mánde, a saré mekné man. Mek davá te na javél lénge zagindlo dre bang.

¹⁷Ne Raj Devél sys pašýl mánde, Jov dyjá mánge zor, sob (kaj) pir mánde te jačél phenybén pal Devléste zoraledýr i sob (kaj) man te šunén saré manušá, savé isyn Náiudy, i sob (kaj) mánge te zrakhavpe ščeréskire (lievóskire) dandendyr.

¹⁸I Raj Devél zrakhéla man kažnoné fuipnastyr i janéla man bidošakires dro Léskiro Kralipén dro Bolybnáskiro Rajo. Te javél Léske sláva pe saré viéki. Amín'.

¹⁹Piride “ramánjo” Priskilake i Akiloske i Anisiforoskire semiake.

²⁰Jerasto jaciápe dro Korinfo, a Trofimos me jačkirdjom nasvales dre Milita.

²¹Pričhúv zor te javes sygedýr adarík angíl ivant (zima). Jevulo piridela túke “ramánjo”, i Pudo, i Lino, i Klavdijo, i saré javír pšála.

²²Mek te javél Raj Devél Isúso Xristóso tyré duhósa. Mek te javél Devléskiro bahtalypén sarénca tuménca. Amín'.