Read Biblija - Pe Baltitko Romani čib (Romanes) 2019 Baltic Romani Bible Titoske 2 Bible Online

Titoske 2 - Biblija - Pe Baltitko Romani čib (Romanes) 2019 Baltic Romani Bible bible

Titoske 2

¹A tu rákir dová, so trej vaš čačunó sykliakiribén;

²sob (kaj) phuré muršá te javén rakhune, sob (kaj) jone te džinén, syr trej pes te lydžán, te javén god'varé i zoralé dro patiaibén, dre patýv ke javír manušá, dro vyrikiriben;

³sob (kaj) phuré džuvliá adiáke-pac' te ladžan pes patyvales, syr trej sventonenge, te na zlydžan pljotki, i te na p'jen but mol, a te sykliakirén lačhipnaske javire manušén;

⁴sob (kaj) jone moginénas te sykliakirén terné džuvlién te sykavén patýv péskire romenge, i te sykavén patýv péskire čhavénge;

⁵sob (kaj) jone te javén svénta, žužé, te rikirén lačhés kherítko xulaiben; te javén lačhé, te kandén péskire romen, sob (kaj) te na javél košno Devléskiro lav.

⁶Terné manušén sykliákir adiáke-pac', sob (kaj) jone te obrikiren pes:

⁷sykáv pes kokoró pir saré lačhé réndy, sob (kaj) javír manušá te dykhén i adiáke-pac' te kerén lačhipén, sykliákir žužypnaske dro iló, patyvalypnaske;

⁸rákir čačuné lavá, sob (kaj) adalé manušénge, savé isyn vérgi tumaré, te javél lénge ladžavo, i jone te na moginen te phenén nisavó čoripén pal aménde:

⁹sob (kaj) pishárja te kandén péskire xulan dro saró, te kerén pir iló i te na obrakiren len palál;

¹⁰te na čoren nisó péskire xulandyr, a te sykavén lačhó patiaibén i te javén patiaibnytka dro saró, mek jone te kerén adiáke, sob (kaj) saré te kutiakiren amaré Zrakhibnariskire-Devléskiro sykliakiribén.

¹¹Pal-dová so javdiá Devléskiro bahtalypén, savó zrakhéla saré manušén;

¹²savó sykliakiréla amen, sob (kaj) ame te na kerás magiripén i te durjovas svetóskire tyrdypnastyr, te dživás dre davá viéko pir čačipén i darása angíl Devléste,

¹³i te užakiras lačhí nadiéia, kiéli javéla baró Devél slavása i amaró Zrakhibnari, Isúso Xristóso,

¹⁴Savó otdyjá Pes pal aménde, sob (kaj) Jov te zrakhél amen saré načačune rendéndyr, te kerél amen žužé manušénca, sob (kaj) ame te javas jekh Léskire manušénca, savé drieván tyrdenape te kerén lačhipén.

¹⁵Sykliákir davá i sykáv manušénge léngiri bang saré pravosa, sob (kaj) nikón te na dykhél vučipnástyr pe túte.