Read Biblija - Pe Baltitko Romani čib (Romanes) 2019 Baltic Romani Bible Titoske 3 Bible Online

Titoske 3 - Biblija - Pe Baltitko Romani čib (Romanes) 2019 Baltic Romani Bible bible

Titoske 3

¹Phen iščo (inké) manušénge pal dová, sob (kaj) jone te kandén ran i barydyrén, i te javén skedyné te kerén kažno lačhó réndo (diélo);

²te na kaliakiren nikonés, a te javén ramanjonesa (mirnonesa), te javén štyl (tiha), kovlé-ilýtka ke saré manušá.

³Pal-dová so i ame sámas vari-kiéli bigodiakire, na kandyjam i amen; ame sámas pishárja péskire-masengire tyrdypnaske, ame dživdiam dro xolý i zevlynypén, drieván bidykhciam jekh jekhés.

⁴A kiéli amaró Devél, Zrakhibnari, sykadiá Péskiri lačhé-ilýtkima i láska,

⁵na pal čačuné réndy, savé ame kerasas, a pal Péskiro tangipén, tedy Jov zrakhciá amen pir panieskiro boldeipen ke nevó džiibén i neviakirdia amarí godý Sventoné Duhósa,

⁶Savó Jov pherdés dyjá aménge pir Isusóste Xristosóste, amaré Zrakhibnariste,

⁷sob (kaj) Devél te priĥaljol amen čačunenca pir Péskiro bahtalypén te jačas Léskire čhavénca dro viéčno džiibén, vaš savó aménde isyn nadiéia.

⁸Davá lav isyn patiaibnýtko, i me kamám, sob (kaj) tu te rakirés pal davá saré zorjása dro dúho (fáno) vaš dová, sob (kaj) odolé, savé upatiándyne dre Devléste, pričhuvén zor te kerén lačhé réndy. Davá saró isyn lačhipén i trej manušénge.

⁹Džá krig (durjov) duredýr dylyné phučibnendyr i rosphenybnendyr pal vari-konéskiro ródo, ci sprečkendyr ci maribnendyr pal lavá Zakonóstyr; pal-dová so davá na trej ni konéske i dasavo rakiribén isyn krotkone godiatyr.

¹⁰Risjov krig manušéstyr, savó pričhuvela zor te rozčhuvel patiaibnaskiren pe grupy paló (poslie) davá, syr tu sykliakiresa les jekh ci duj móly,

¹¹tu džinésa so adasavó manúš isyn rozmekno i keréla gréhi, kadalesa jov sendiakiréla kokoró pes.

¹²Kiéli me bičhaváva ke tu Artjomos ci Tihikos, prilé zor syr sygedýr te javes ke me dro Nikapoljo, pal-dová so me skedyjompe te javav odój saró ivant (zima).

¹³Zinas, savó isyn sykliakirdo pir Zakóno, i Apolos, bičháv dro drom syr trej, sob (kaj) lénge saró te uhtylel;

¹⁴i mek amaré manušá adiáke-pac' te sykljon te kerén lačhé réndy, sob (kaj) te sykljon te den ráda pe davá, so trej aménge, sob (kaj) léngiro džiibén te na javél čhučó.

¹⁵Piridena “paklono” túke saré, kon isyn mánca. Piride “paklono” sarénge, konéske sam dróga ame dro patiaibén. Te javél bahtalypén sarénca tuménca. Amín'.