Read Biblija - Pe Baltitko Romani čib (Romanes) 2019 Baltic Romani Bible Filimon 1 Bible Online

Filimon 1 - Biblija - Pe Baltitko Romani čib (Romanes) 2019 Baltic Romani Bible bible

Filimon 1

¹Pavlístyr, savó isyn dro štaribén pal patiaibén dre Isusóste Xristosóste i pšalestyr Ximastyr, Filimonóske, amaré maléske pir butý,

²i pheniáke pir patiaibén Amfijáke, i Arhimóske, savó isyn amaró mal — xaladó pir butý, i khangirjáke, saví skedelape dro tyró kher.

³Mek te javél bahtalypén i ramánjo (miro) tuménge amaré Devléstyr Dadéstyr i Rástyr-Devléstyr, Isusóstyr Xristosostyr.

⁴Me parikirava Devléske Miréske každo mólo, kiéli me ripirava tut, syr me mangavape Devléske,

⁵pal-dová so me šundjom, syr tu zoralés sykavesa patýv saré devlytkoné manušénge i patiása dre Raste-Devléste Xristosóste.

⁶Me mangavape Devléske, sob (kaj) tyró patiaibén, savó khetaniakirela amen, te del saró lačhipén, kiéli ame dživasa dre jekhipén Isusósa Xristosósa.

⁷Pal-dová so tyrí patýv ke javír manušá, míro pšál, drieván obradyndia i podrikirdia man; tu zorjakirdian devlytkonengire ilé.

⁸Paldavá, mek mánde isyn bari vólia dre Xristosóste te priphenav túke, so trej te kerés,

⁹ne me fedýr mangáva tut ilésa, me, Pávli, som phuró, i kakaná som dro štaribén pal patiaibén dre Isusóste Xristosóste.

¹⁰Me drieván mangáva tut saré iléstyr pal Anisimoste, miré čhavéste pir patiaibén, savéske me jacjom sýrby dad, adái, dre sastyrá,

¹¹savó ĥaredyr na sys trej túke, a kakaná jov trej túke i mánge:

¹²me i bičhaváva les pale ke tu: jov isyn drógo vaš mánge, syr miro iló:

¹³savés me drieván kamdjom (mangdjom) te jačkirav les paš péste, sob (kaj) jov zamiést túte te pomoginel mánge, paka me som dre sastyrá, pal-dová, so me rosphenavas bahtalý zan (zvies');

¹⁴ne me na kamdjom te keráv davá bi tyré-laveskiro, sob (kaj) te javél tyró lačhipén na pir dová, so tut začhuvena, a pir iló;

¹⁵paldavá moginéla te javél, so jov vaš davá na sys túsa vari-savó časo, sob (kaj) tu te priles les nevéstyr pe saró džiibén;

¹⁶ne na butýr syr jekhé dynarís (slugas), a baredýr dynarístyr, syr péskire drogoné pšalés, jov isyn drieván drógo mánge, ne butýr túke, syr manúš i syr pšal pir patiaibén dre Raste-Devléste.

¹⁷I paldavá, kóli tu ginesa man pal péskire maléste (drugoste), tedy prilé les adiáke, syr tu prilesas man:

¹⁸i, kóli jov vari-sósa dukhadia tut ci jaciápe vužlo lové, čhuv saró pe mánde.

¹⁹Me, kokoró Pávli, čhindjom davá miré vastésa, me pleskirava túke saró: mánge trej te phenáv túke pal dová, so tu i kokoró san bangó mánge pal tyró nevó džiibén, kiéli tu upatiandyjan dre Xristosóste.

²⁰Paldavá, pšála, mánge trej tyrí rádyma vaš Raste-Devléste; zorjakir miro iló, syr pšal pir patiaibén dre Xristosóste.

²¹Me zoralés patiáva, so tu kandesa man, i čhináva túke, so me džinóm, so tu kerésa butýr, syr me mangáva tut.

²²A pal jekh lath štúba (kamóra) mánge, pal-dová so me drieván patiáva, so pir tumaró mangipén Devél otmekéla man štaribnastyr ke tumé.

²³Jepafraso piridéla “paklono” túke, savó isyn beštó khetané mánca pal patiaibén dre Isusóste Xristosóste:

²⁴adiáke-pac' Marko, Aristarho, Dimaso, Luka — miré malá pir butý.

²⁵Mek te javél bahtalypén amaré Ráskire-Devléskiro, Isusóskire Xristosóskiro tumaré duhósa. Amín'.