Read Biblija - Pe Baltitko Romani čib (Romanes) 2019 Baltic Romani Bible Judénge 10 Bible Online

Judénge 10 - Biblija - Pe Baltitko Romani čib (Romanes) 2019 Baltic Romani Bible bible

Judénge 10

¹Judéngiro Zakóno isyn sýrby zer (tienjo) pal dová čačipén, savó javéla angíl, davá nane kokori patrín (óbrazo). Paldová so Zakóno kokoró na keréla manušén bidošakirenca, savé javéna te mangénpe Devléske, kiéli jone so berš janéna dasavé-pac' svénta dyibená pe altárjo.

²I manušá pirijačenas te janén svénta dyibená (žertvy), kóli jone, kiéli mangénape Devléske syr trej pir Zakóno, javénas vyžužakirde grehostyr jekh mólo i pe saró džiibén, i grého na jačelaspe dre léngiri godý.”

³Ne ame so berš ripirasa pal gréhi, kiéli janasa svénta dyibená pe altárjo.

⁴Pal-dová so naštý, sob (kaj) cieliantengiro i buznengiro (kozlengiro) rat te otmekél grého manušéstyr.

⁵Paldavá, kiéli Xristóso javdiá pe svéto, Jov phendiá Devléske: “Túke isyn na pir iló ni dáry, ni svénta dyibená; ne Tu prigotovindian masá (loč) vaš Mánge.

⁶A celoné-xačkiribnaskire janybená i svénta dyibená pal grého nane túke dre rádyma.

⁷Tedy Me phendjom: “Gada, Me džáva, syr isyn čhindló angíl dre lylvarí pal mánde; sob (kaj) te spolninav, Dévla, vólia Tyrí.”

⁸Angledýr Xristóso phendiá: “Tu na mangdian ni dáro, ni svénto dyibén, ni celoné-xačkiribnaskire janybená, ni dáry pal gréhi, savé janéna pir Zakóno.”

⁹Tén'ci Jov phendiá: Ĥáda, Me javdjom, sob (kaj) te spolninav Tyrí vólia.” Jov čhuvéla krig anglatunó mangipén (pátieri) Devléske, sob (kaj) te čhuvél i podrikirél javír;

¹⁰i pir Devléskiri vólia ame sam svencyndle Isusóskire Xristosóskire men'kendyr dre masá, savé sys jandlé syr dáro jékhvar, pal sarénde.

¹¹I kažno (sváko) rašáj dyvés dro dyvés keréla Devléskiri butý i janéla but móly odolé-pac' svénta dyibená, savé nijékhvar na moginéna te zlen gréhi,

¹²a Jov, Xristóso, otdyjá Pes jékhvar dro svénto dyibén pal gréhi i besciá pe saró časo pir čačí (pravo) rig Devléstyr,

¹³kaj kakaná Jov užakiréla, kiéli Léskire vérgi javéna čhudé tel Léskire ĥerá.

¹⁴Pal-dová so Jov jekhe sventoné janybnasa kerdiá bidošakirenca pe saró časo odolén, savé isyn vyžužakirde grehéndyr.

¹⁵I Svénto Dúho (Fáno) dophenéla aménge: paló (poslie) dová, syr Devél phendiá:

¹⁶“Ĥáda, isyn davá zavieto, savó Me keráva lénca paló odolé dyvesá, — rakiréla Raj Devél: — Me piridava Miré Zakóny dre léngire ilé i Me čhináva len pe léngiri godý”;

¹⁷i léngire gréhi i dová, so jone kerdé proti Zakóno, Me na priripirava ni jekh mólo.

¹⁸A kiéli grého isyn otmekno, tedy na trej butýr nisó te janén syr svénto dyibén pal lénde.

¹⁹Paldavá, pšalále, ame moginasa murškanés te zadžas pe Svénto Štéto, pal-dová so Isúso pročhudia Péskiro rat;

²⁰Jov dyjá zor aménge te prodžas pir šýrma nevoné i džidé dromésa, savó isyn pir Léskiri loč (plot');

²¹Jov isyn amaró Baró Rašáj pe Devléskiro Kher, savó isyn dro Bolybnáskiro Rajo;

²²paldavá javén pašyledýr ke Devél čačuné ilésa, pherdé patiaibnása, sob (kaj) te javén amaré ile vyžužakirde grehéndyr i te na čuinas fujes, so ame sam bangé; te javén amaré masá obmorde žužé paniésa.

²³Javása te rikiraspe zoralés pal nadiéia, saví ame pridžindiam bi kunipnáskiro, pal-dová so Devél, Kon dyjá lav, isyn patiaibnýtko;

²⁴iavén te dykhas jekh pe jekhéste, sob (kaj) te sykavén patýv jekh jekhéske i te kerén lačhipén jekh jekhéske;

²⁵i na javása te mekas te skedaspe dre khangirí, syr davá prisyklyne javír manušá, a javása te sykliakiras jekh jekhés butedýr, kóli tumé dykhéna, so Ráskire-Devléskiro Dyvés javéla syg.

²⁶Pal-dová so, kóli ame udžindiam čačipén, ne usajékh kerása grého kokoré péstyr, tedy nane butýr nisavó svénto dyibén te zlel dalé gréhi,

²⁷ne aménge jačélape baré darása te užakiras séndo i jag, saví xačkiréla saré Devléskire vergén.

²⁸Kóli kažno manúš, kon na déla patýv Mojzáskire Zakonóske, meréla bitangipnaskiro pir lavá dujé ci triné jakhitkonengiro (svidietieliengiro):

²⁹to, syr tumé duminéna, ci pe but pharedyr javéla kára pe odolé manušéste, savó sýrby štakirela ĥerénca Devléskire Čhavés i na ginéla pal svénto zavietóskiro rat, savésa jone kokoró sys svencyndlo, i rakiréla nalačhé lavá pe Dúho (Fáno), Savéstyr ame lyjam bahtalypén?

³⁰Ame džinása Odolés, Kon phendiá: “Me otháva palé (Me otomstinava), i Me javáva te čhuvav bída” — rakiréla Raj Devél.” I nevéstyr: “Raj Devél javéla te sendiakirél Péskire manušén.”

³¹Davá isyn darano te perén dre džidé Devléskire vastá.

³²Priripiren tumaré pérva dyvesá, kiéli tumé udžindlé i patiandyné dre Xristosóste, tumé sánas zoralé pir dúho (fáno) dre pharé mén'ki;

³³iekhe rigátyr, manušá xoliames sandlepe tuméndyr angíl manušénde, kerdé bída tuménge; javire rigátyr, tumé kokoré sánas khetané javire manušénca, savé adiáke-pac' dživénas i menčynenaspe.

³⁴Tumé piridživenas khetané manušénca, savé sys bešté dro štaribén, i kiéli lyné zorjása tumaró mištypén, tumé davá prilyné radymása, pal-dová so tumé džinéna, so tuménde isyn dro Bolybnáskiro Rajo fededýr mištypén, savó jačélape viéčnes.

³⁵Na mekén tumaró patiaibén, pal so tumé doreséna baró otdyibén Devléstyr.

³⁶Tuménge trej te vyrikiren, sob (kaj) te kerén saró pir Devléskiri vólia i te doresen dová, pal so Jov dyjá lav tuménge.

³⁷Pal-dová so sarésa nábut jaciápe te užakiras, i Odová, Kon džála, na zarikirelape.

³⁸Miré čačuné manušá javéna te dživén pir péskiro patiaibén, ne kóli vari-kon délape palé, tedy odová manúš nane lačhó Miré ileske.

³⁹Ne ame na sam odolé manušéndyr, savé denape pale péskire patiaibnastyr i džána ke xasibén; ne ame patiása, so Devél zrakhéla amen.