Read Biblija - Pe Baltitko Romani čib (Romanes) 2019 Baltic Romani Bible Judénge 11 Bible Online

Judénge 11 - Biblija - Pe Baltitko Romani čib (Romanes) 2019 Baltic Romani Bible bible

Judénge 11

¹Patiaibén — davá isyn zoraló (tvardo) džinybén dro dová, pe so aménde isyn nadiéia, so odová kerélape pherdés, i zoraló patiaibén dro dová, so isyn vari-savé čačipená pe svéto, mek ame na dykhasa len,

²pir davá patiaibén Devél pridžindia dophenybén amaré godé-phuréngiro.

³Jekhé patiaibnása ame ĥaljovasa, so saró svéto isyn sozdynó Devléskire lavésa, i so saró, so ame dykhasa, sys kerdó doléstyr, so nane bicialó.

⁴Patiaibnása Avieljo jandiá Devléske fededýr svénto dyibén, syr Kaino; pir patiaibén jov doresciá dophenybén Devléstyr, so jov isyn čačunó manúš, kiéli Devél rakirdiá pal léskiro svénto dyibén i pir Péskiro patiaibén, syr i angledýr, Avieljo rakiréla aménge, mek jov uže myjá.

⁵Patiaibnása Jenoho sys lynó pe bolybén, i jov na dykhciá meribén, i les nikón na mogindiá te lathel, pal-dová so Devél lyjá les. Ne angíl, syr Devél lyjá les, jov doresciá dophenybén, so jov kerdiá kučes Devléske.

⁶Ne naštý te kerés kučes Devléske bi patiaibnaskiro, pal-dová so trej, sob (kaj) manúš, savó javdiá ke Devél te patial, so Jov i vaš odolénge, kon rodéla Les, Devél otdéla lačhipnása.

⁷Patiaibnása Nojo doresciá podrakhiben pal dová, so na sys džindló ni konéske; jov sventoné darása kerdiá kovčego i zrakhciá péskiri sém'ia (irí). Patiaibnása jov sendindia svéto, i Devél priĥalyja les čačipnaskire čhavésa pal léskiro patiaibén.

⁸Patiaibnása Avraámo, savó sys khardo te kandel i sys bičhadó te džal pe dová štéto, pal savó sys léske dynó lav te doresel paš; jov gijá i na džindiá, karik jov džálas.

⁹Patiaibnása jov lyjá te lodel syr javire — rigakiro manúš pir phuv, pal saví Devél dyjá lav léske; i jov dživdiá šatrénca Isaakosa i Jakovosa, savénge adiáke-pac' sys dynó lav te doresen paš khetané;

¹⁰jov užakirdia fóro, savó sys bangó (musindia) te javél pe zoraló fundámiento, saveskiro Devél Kokoró javéla arhitiektoro i javéla te kerél les.

¹¹Patiaibnása Saara, savjate na sys čhavoré, saví adiáke-pac' doresciá sastypen, sob (kaj) te javén čhavoré láte, bijandiá tel phuripen, pal dová so joj dopatiandyja Odoléske, Kon dyjá lav.

¹²Paldavá jekhé kadalé Avraamostyr, savó sys phuró ke meribén te javél dadésa, bijándyne adákicy but manušá, adákicy ci but isyn čergeniá pe bolybén i syr naštý te gines saro práho pe morjoskiro (derjavéskiro) brégo.

¹³Saré kadalé manušá myné patiaibnása, jone na doresné dová, pal so Devél dyjá lav lénge, jone dykhné saró davá durál i phendlé “ramánjo” (miro) doléske i pridžindlepe, so jone sys čúža manušá i lodena pir doiá phuv.

¹⁴Pal-dová, so odolé manušá, savé rakiréna adiáke, sykavéna, so jone rodéna péskiro them (otiečestvo).

¹⁵I kóli jone priripirenas péske pal dová them, savéstyr jone vyginé, lénde javélas časo odorík te risjon;

¹⁶ne jone kakaná zoralés mangena fededýr them, savó isyn dro Bolybnáskiro Rajo, paldavá Devléske nane ladžavo, kiéli jone kharéna Les péskire Devlésa; pal-dová so Jov prigotovindia fóro vaš lénge.

¹⁷Patiaibnása Avraámo jandiá Isaakos dro svénto dyibén, kiéli Devél propatiakirelas les; Devél dyjá lav i jov skedyjape te janel dro svénto dyibén péskire jekhore čhavés;

¹⁸pal savéste sys phendló: “Isaakostyr javéla te džal duredyr tyró ródo”;

¹⁹jov dumindia péske, so Devléste isyn zor i muléndyr te otdžidiakirel léskire čhavés, i sýrby Avraámo doresciá les pale.

²⁰Patiaibnása Isaáko bahtiakirdiá Jakovós i Isavos.

²¹Patiaibnása Jakovo angíl, syr te merél, bahtiakirdiá Jozáskire (Iosifóskire) čhavén, terdijá pe čangá i pomangdiape Devléske, kiéli rikirdiape pal péskiro destó.

²²Patiaibnása, so javéla angíl, Joza angíl péskiro meribén priripirelas Izrailjoskire čhavénge pal vygiiben Jegiptóstyr i priphendiá, so te kerén léskire kokalenca.

²³Patiaibnása Mojzáskire dadá garavenas les trin čhoná paló léskiro bijanypén, pal-dová so jone dykhné, so jov sys šukár, i jone na darándyne kralískiro priphenybnastyr.

²⁴Patiaibnása Mójza, kiéli jaciá baró, otphendiape te kharelpe Faraonóskire-čhakire čhavésa;

²⁵i vykedyjá fededýr te pirilydžal mén'ki (muki) Devléskire manušénca, syr léste te javél baht pe nabaró časo grehosa,

²⁶i xoliamó saben pal/pe Miesijáste (Xristosóste), savo pyja pe Leste korigedýr (pozžedýr), jov gindia vaš péske drogedyr saré Jegiptóskire kučipnástyr, pal-dová so jov dykhciá nadejása, so les užakiréla otdyibén Devléstyr.

²⁷Patiaibnása jov gijá Jegiptóstyr i na darandyja kralískire xoliátyr; jov vyrikirelas duredýr saró, pal-dová so jov dykhciá angíl péste Odolés, Kon na sys bicialó.

²⁸Patiaibnása jov svenkindia Patradí i obmakhcia ratésa vudarengire kasiaki, sob (kaj) Meribnytko jangólo, savó muliakirelas pervoné bijatén, te na čilavel len.

²⁹Patiaibnása jone piriginé Loló mórjo (derjáv), syr pir šukí phuv; i kiéli Jegiptóskire manušá sprobindle adiáke-pac' te piridžan mórjo (derjáv), jone tasadyne.

³⁰Patiaibnása pyné Jerihonoskire vánty paló (poslie) dová, syr manušá obdžanas trusciál fóro pal eftá dyvesá.

³¹Patiaibnása Raav (Rahab), biladžakuny džuvlý, na myjá khetané odolé manušénca, savé na kandyné Devlés, pal-dová so joj prilyjá Izrailjoskire poddykhibnaskiren (čorahanen), syr péskire malen.

³²I so me mogináva butýr te phenáv? Na uhtyléla (nádosi) mánge časo, kóli me javáva te rakiráv pal Giedieonoste, Varakoste, Salosonoste, Jefajoste i Davidóste i Samuiloste i pal javire prorokénde:

³³savé péskire patiaibnása pirizorjakirenas javír kralipená, kerénas pir čačipén, doresenas dová, pal so Devél dyjá lav lénge, phandenas muiá ščerénge (lievenge),

³⁴murdiakirenas baré-zorjakiri jag, zrakhenaspe kurtalakire vojstrimátyr (čolypnastyr); léngiro bizorjakiriben kerdiá len zoralenca, jone mardépe zoralés pe meribén i vytradenas čužoné xaladén, savé javénas maribnása pe lénde javire rigéndyr.

³⁵Džuvliá lenas pale péskire mulen, savé sys otdžidiakirde; javír manušá, savé na zakamle, sob (kaj) len te otmeken ke vólia, sys zamenčindle pe meribén, sob (kaj) te doresen fededýr otdžidiakiribena,

³⁶pe javire manušénde sys xoliamó saben, len mardé čhupniása, len phandenas dre sastyrá i čhuvénas dro štaribén.

³⁷Len domarenas barénca, propatiakirenas pe mén'ki te pirilydžan, len pilinenas (rizilinénas) pe duj pašá; jone merenas kurtalátyr, psirenas dre bakrané i buznýtka (kozýtka) cýpi, jone dživdé dro nauhtylyben, dre mén'ki; stradyndle manušéndyr,

³⁸adasavé manušá, savén saró svéto na sys mol, dživdé pe čhučé prahi, dre bérgi, pir ĥiebará (pieščery), pir loščyny pe phuv.

³⁹I sarénge lénge isyn lačhó dophenybén pal léngiro patiaibén, ne nijékh léndyr na doresciá dová, pal so Devél dyjá lav lénge.

⁴⁰Pal-dová so Devél pridumindia angíl te kerél vaš aménge vari-so fededýr, sob (kaj) jone khetané aménca te jačen bidošakirenca.