Read Biblija - Pe Baltitko Romani čib (Romanes) 2019 Baltic Romani Bible Judénge 12 Bible Online

Judénge 12 - Biblija - Pe Baltitko Romani čib (Romanes) 2019 Baltic Romani Bible bible

Judénge 12

¹Pal-dová so trusciál aménde adiáke-pac' isyn adákicy but jakhítka/iakhalé (svidietieli), javén čhurdasa péstyr liubo ĥámo pharipnasa i grého, savó priphandelape ke ame syr felý (sietka) i javása so isyn zor te vyrikiras, javása te pričhuvas zor te džas pir amaró džiibnytko drom, savó isyn angíl aménde;

²i javása te dykhas pe Isusóste, Savéstyr isyn amaró patiaibén, i Savó keréla amen bidošakirenca, Savó zamiést rádyma, saví javélas vaš Léske, i Savó vyrikiribnasa piridživdia trušulyben ke meribén, na dykhí pe ladž, i besciá pir čačó (pravo) vast Devléstyr.

³Obduminen xor pal Isusóste, Savó pirilydžija vergitko bipatyvakiro saben grehitkonendyr, davá saró déla vast tuménge te na xasiakirén zor dro dúho (fáno) i te na zden zorjása.

⁴Tumé iščo (inké) na mardépe ke rat, kiéli tumé sánas terdé proti grého.

⁵I tumé bistyrde lavá, savé Devél rakirdiá te podrikirél tumen, syr Péskire čhavén: “Čhavoa miro, na le pe ilo lokhes, kiéli Devél sykliakiréla tut, i na zdepe duhósa, kiéli Jov phenéla zorjása bang túke;

⁶Devél sykliakiréla odolé manušés, konés Jov vykedéla, i marela kažnoné manušés, savés Jov priléla, syr Péskire čhavés.”

⁷Javén vyrikirde, kiéli Devél sykliakiréla tumen, davá sykavéla, so Devél dykhéla pe tuménde, syr pe Péskire čhavorende. Ci isyn vari-kaj adasavó čhavó, savés léskiro dad na sykliakiréla?

⁸Kóli tumen na sykliakiréna, syr trej vaš saré čhavorenge, tedy tumé san khelby, a na čačuné Devléskire čhavé.

⁹I iščo (inké): kiéli aménde sys dadá pir amaró rat, savé sykliakirdé amen, i paldavá ame kutiakirdiam len, tedy ci pe but butýr aménge trej te kandas amaré Dadés pe dúho (fáno), sob (kaj) te dživás?

¹⁰Amaré dadá sykliakirdé amen nábut dyvesá, ne Devél sykliakiréla vaš amaró mištypén, sob (kaj) aménge te javél paš khetané Lésa dre Léskiri sventyma.

¹¹Kažno sykliakiribén dro akakanatuno časo isyn vaš aménge na dre rádyma, a dro piridživiben, ne paló (poslie) dová, kon vysyklyja dalé sykliakiribnástyr, doreséla pale ramánjo (miro) čačipnáskire džiibnastyr.

¹²Rikirén mamúj (priames) péskire vastá i terdjon syr trej pe péskire ĥerá, savé khinyne.

¹³Psirén tumaré ĥerénca pir mamúj (priama) dromore, sob (kaj) odolé manušéske, savó isyn langalo, te na zmarelpe ĥerendyr, a sob (kaj) jov te džal mamúj (priames).

¹⁴Pričhuvén zor, sob (kaj) tuménge te javén dro ramánjo (miro) sarénca i dre sventyma, bi saveskiro nikón na dykhéla Ras-Devlés.

¹⁵Dykhén mištés, sob (kaj) nikón tuméndyr te na xasiakirél Devléskiro bahtiakiribén, sob (kaj) te na javél maškír tuménde kirkó rukh (kornjo), savó moginéla te janel fuipén, i sob (kaj) lésa te na javén magirdé but javír manušá;

¹⁶sob (kaj) maškír tuménde te na javél manúš, savó dživéla džuvliénca bi sevlakiro, ci bidevlytkari, syr Isávo, savó pal jekh čaró xabnasa bikindia péskiri l'góta, saví isyn pervoné bijatoste.

¹⁷I tumé ž džinéna, so paló (poslie) dová jov myslindia, sob (kaj) dad te bahtiakirél les, ne kodová na priĥalyja les, pal-dová so jov na mogindiá te riskirél pale dová, so kerdiá.

¹⁸Tumé na javné pašyledýr ke bérga Sinajo, saví saštý (možna) te čilaven vastésa, i saví xačola baré jagása, i na ke kalypén (t'ma), na ke mígla (mrako), na ke xoliami balvál,

¹⁹tumé na javné pe rogóskiro (trubakiro) bašaiben, i pe zan, saví rakiréla dasavé lavá, so manušá, savé šunéna len, mangena pal dová, sob (kaj) lénge butýr dalé lavá te na šunén;

²⁰pal-dová so jone na mogindlé te šunén dová, so lénge sys phendló: “Kóli i savó riskiribnáskiro murdál (zvierjo) dočilavelape ke daja bérga, jov javéla zamardo (muliakirdo) barénca”;

²¹pe saró davá sys adiáke darano te dykhés, so Mójza phendiá: “Me drieván izdrava darátyr;

²²a tumé javné ke bérga Sióno, ke Bolybnáskiro Jerusalimo, ke džidé-Devléskiro fóro, kaj isyn Jangóly, Save skedynépe khetané,

²³tumé javné pašyledýr ke Khangirí, kaj skedynépe radymása čhavoré, savé pérva bijandjona, koneskire lavá isyn začhindlé dro Bolybnáskiro Rajo, i ke Devél, Savó isyn Sendári pe sarénde i ke manušéngire dúhi, so jačné bidošakirenca;

²⁴i ke Isúso, Savó piridyja aménge Nevó Zavieto Devlésa i ke drógo rat, so sys pročhudo, savó isyn zoraledýr Avieljoskire ratestyr.

²⁵Dykhén, na otrisjon krig Odoléstyr, Savó rakiréla tuménge. Kóli odolé manušá, savé otrisine krig te šunén Les, Savó rakirdiá lénge Bolybnástyr pe phuv, na mienindle kára, tedy butýr saréstyr i ame na mieninasa la, savénge Jov rakiréla Bolybnástyr:

²⁶Konéskiri zan zatrinskirdiá sarí phuv, i Kon dyjá lav kakaná: “Me iščo (inké) mólo triinskirava na jekh phuv, ne i bolybén.

²⁷Ne lav “iščo (inké) mólo” sykavéla pe dová, so Devél kerdiá, i so moginéla te xasjol, sob (kaj) te jačélpe dová, so nijékhvar na trinskirlape.

²⁸Pal-dová so ame prilasa kralipén, savó nijékhvar na triinskirelape, javása te rakhas bahtalypén, savésa ame moginasa te kerás butý vaš Devléske darása angíl Léste i vorohósa (baré darása).

²⁹Pal-dová so amaró Devél isyn jag, saví saró xačkiréla.